شينجياڭ: اۋىل - قىستاق شيپاگەرلەرىنە بەرىلەتىن قازىنالىق كومەك قاراجاتتى يكەمدى رەتتەۋ مەحانيزمىن ورناتىپ، كومەك قاراجات ولشەمىن لايىقتى جوعارىلاتۋ كەرەك

تاياۋدا، شينجياڭ ۇيعۇر اۆتونوميالى رايوندىق دەنساۋلىق ساقتاۋ جانە سالاماتتىق كوميتەتى قاتارلى 16 تاراۋ بىرلەسىپ اۋىل ـ قىستاق ەمدەۋ جانە دەنساۋلىق ساقتاۋ قۇرىلىمدارىن اناعۇرلىم ويداعىداي قۇرۋ جونىندەگى ءبىرقانشا شارانى باسىپ تاراتتى. مۇندا قازىنالىق قامتاماسىزداندىرۋدى كۇشەيتۋ ورتاعا قويىلدى. اۋىل - قىستاق شيپاگەرلەرىنە قازىنالىق كومەك قاراجات بەرۋ اۋقىمدىق رەتتەۋ مەحانيزمىن ورناتىپ، پرينسيپتىك جاقتان ءار 5 جىلدا ەكونوميكالىق، قوعامدىق دامۋ ورەسى، قازىنانىڭ كوتەرىمدىلىك قۋاتى قاتارلى فاكتورلارعا نەگىزدەلىپ، ءبىر رەت كومەك قاراجات بەرۋ ولشەمىن زەرتتەپ تۇراقتاندىرۋ كەرەك. شارت - جاعدايى بار ايماقتار (وبلىس، قالا)، اۋداندار (قالا، رايون) ءوز جەرىنىڭ قازىناسى كوتەرە الاتىن جاعدايدا، اۋىل - قىستاق شيپاگەرلەرىنە بەرىلەتىن قوسىمشا قاراجات ولشەمىن لايىقتى جوعارىلاتۋدى اقىلداسىپ، ءتارتىپ بويىنشا ءبىر دارەجە جوعارى دەنساۋلىق ساقتاۋ جانە سالاماتتىق كوميتەتتەرىنە، قازىنا تاراۋلارىنا مالىمدەپ ەستەلىككە الدىرعاننان كەيىن اتقارۋىنا بولادى، بۇكىل رايوننىڭ نەگىزگى قوسىمشا قاراجات ولشەمىنەن جوعارى بولعان بولەگىن جەرگىلىكتى ورىن ءوزى كوتەرەدى.

جەر - جەر پارتكوم شتات كوميتەتىنىڭ قۇرىلىم شتاتىن بەكىتۋ پىكىرىنە قاتاڭ بويسۇنىپ، ۇكىمەت قۇرعان اۋىل - قالاشىق شيپاحانالارىنىڭ (الەۋمەتتىك اۋماق دەنساۋلىق ساقتاۋعا قىزمەت وتەۋ ورتالىعى) نەگىزگى قامتاماسىزداندىرۋىن تياناقتاندىرىپ، جىلدىق مەجە ەسەپتى تولىق جاساپ، اۋىل - قىستاق شيپاگەرلەرىنىڭ زەينەتكەرلىك قامتاماسىزداندىرۋ مامىلەسىن بەلگىلەمە بويىنشا تياناقتاندىرۋ كەرەك. جەر - جەر وڭىرلىك دەنساۋلىق ساقتاۋ پلانى مەن قازىنانىڭ كوتەرىمدىلىك قۋاتىنا نەگىزدەلىپ، نەگىزگى قۇرىلىس پەن جابدىق ساتىپ الۋ قاتارلى دامۋ قۇرىلىسى شىعىسىن اقىلداسىپ تياناقتاندىرادى.