باس شۋجي شي جينپيڭ جۇڭگو گومينداڭ پارتياسىنىڭ ءتوراعاسى جىڭ لي ـ ۋىنمەن كەزدەستى

4 ـ ايدىڭ 10 ـ كۇنى تۇستەن بۇرىن جۇڭگو كوممۋنيستىك پارتياسى ورتالىق كوميتەتىنىڭ باس شۋجيى شي جينپيڭ بەيجيڭدە جىڭ لي ـ ۋىن ءتوراعا باستاعان جۇڭگو گومينداڭ پارتياسىنىڭ ساپارلاۋ ۇيىرمەسىندەگىلەرمەن كەزدەستى.

□ سۋرەتتى شينحۋا اگەنتتىگىنىڭ ءتىلشىسى شيە حۋانچى تۇسىرگەن

4 ـ ايدىڭ 10 ـ كۇنى تۇستەن بۇرىن جۇڭگو كوممۋنيستىك پارتياسى ورتالىق كوميتەتىنىڭ باس شۋجيى شي جينپيڭ بەيجيڭدە جىڭ لي ـ ۋىن ءتوراعا باستاعان جۇڭگو گومينداڭ پارتياسىنىڭ ساپارلاۋ ۇيىرمەسىندەگىلەرمەن كەزدەستى.

□سۋرەتتى شينحۋا اگەنتتىگىنىڭ ءتىلشىسى لي شياڭ تۇسىرگەن

شينحۋا اگەنتتىگىنىڭ 4 ـ ايدىڭ 10 ـ كۇنى بەيجيڭنەن بەرگەن حابارى. جۇڭگو كوممۋنيستىك پارتياسى ورتالىق كوميتەتىنىڭ باس شۋجيى شي جينپيڭ 4 ـ ايدىڭ 10 ـ كۇنى تۇستەن بۇرىن بەيجيڭدە جىڭ لي ـ ۋىن ءتوراعا باستاعان جۇڭگو گومينداڭ پارتياسىنىڭ ساپارلاۋ ۇيىرمەسىندەگىلەرمەن كەزدەستى.

شي جينپيڭ جىڭ لي ـ ۋىننىڭ ۇيىرمە باستاپ ساپارلاي كەلگەندىگىن قارسى الدى. ول بىلاي دەپ اتاپ كورسەتتى: گومينداڭ پارتياسى مەن جۇڭگو كوممۋنيستىك پارتياسى سىندى ەكى پارتيا باسشىلارىنىڭ اراعا 10 جىل سالىپ تاعى دا جۇزدەسۋى ەكى پارتيا قارىم ـ قاتىناسىنىڭ، ەكى جاعالاۋ قاتىناسىنىڭ دامۋى جونىنەن ماڭىزدى مانگە يە. ەكى جاعالاۋداعى باۋىرلاستار بىردەي جۇڭحۋا ۇلتىنا ءتان، تايۋاندىق باۋىرلاستاردى قامتىعان ءار ۇلت حالقى ءبىر تۇتاس كوپ ۇلتتى مەملەكەتتى بىرگە قۇردى، ايبىندى جۇڭگو تاريحىن بىرگە جازدى، شۇعىلالى جۇڭحۋا وركەنيەتىن بىرگە جاراتتى، ۇلى ۇلت رۋحىن بىرگە جەتىلدىردى، سونداي ـ اق مەملەكەت تەرريتورياسى بولشەكتەنبەۋ، مەملەكەت بىلىقپاۋ، ۇلت ىدىراماۋ، وركەنيەت ۇزىلمەۋ سىندى ورتاق سەنىمدى سومداپ، جۇڭحۋا ۇلتىنىڭ ءوزىن تالىقپاي الۋەتتەندىرۋىنە، جۇڭحۋا وركەنيەتىنىڭ ۇزىلمەي جالعاسۋىنا جەتەكشىلىك ەتتى.

شي جينپيڭ بىلاي دەپ باسا دارىپتەدى: حالىقارالىق جاعداي، تايۋان بۇعازى جاعدايى مەيلى قالاي وزگەرسە دە، جۇڭحۋا ۇلتىنىڭ ۇلى گۇلدەنۋى سىندى ۇلكەن بەتالىس وزگەرمەيدى، ەكى جاعالاۋداعى باۋىرلاستاردىڭ ەتەنە، ارالاس ـ قۇرالاس بولۋى، ءبىر نىسانانى بەتكە الىپ ءجۇرۋى سىندى ۇلكەن اۋقىم وزگەرمەيدى. ەكى جاعالاۋداعى باۋىرلاستاردىڭ بارلىعى تايۋان بۇعازىنىڭ بەيبىتشىلىگىن، تىنىشتىعىن اڭسايدى، ەكى جاعالاۋ قاتىناسىنىڭ جاقسارۋىن، دامۋىن اڭسايدى، تۇرمىستارىنىڭ ءتىپتى دە جاقسى بولۋىن اڭسايدى، بۇل گومينداڭ پارتياسى مەن جۇڭگو كوممۋنيستىك پارتياسى سىندى ەكى پارتيانىڭ باس تارتۋعا بولمايتىن جاۋاپكەرشىلىگى ءارى قول ۇستاسا سەلبەسۋىنىڭ قوزعاۋشى كۇشى. ءبىز ”92 ـ جىلعى ورتاق تانىمعا“ تاباندى بولۋ، ”تايۋاندى دەربەستەندىرۋگە“ قارسى تۇرۋ سىندى ورتاق ساياسي نەگىزدە جۇڭگو گومينداڭ پارتياسىن قامتىعان تايۋانداعى ساياسي پارتيالارمەن، ۇيىمدارمەن جانە قوعامداعى ءار سالا قايراتكەرلەرىمەن بىرگە اۋىس ـ كۇيىستى، تىلدەسۋدى كۇشەيتىپ، ەكى جاعالاۋدىڭ بەيبىتشىلىگى ءۇشىن، باۋىرلاستاردىڭ قۇت ـ ىرىسى ءۇشىن، ۇلتتىڭ گۇلدەنۋى ءۇشىن، ەكى جاعالاۋ قارىم ـ قاتىناسىنىڭ بولاشاعىن جۇڭگولىقتاردىڭ ءوز قولىندا مىقتاپ ۇستاۋىن قالايمىز.

شي جينپيڭ ەكى جاعالاۋ قارىم ـ قاتىناسىنىڭ دامۋى جونىندە 4 ءتۇرلى پىكىردى ورتاعا قويدى.

ءبىرىنشى، دۇرىس شىنايى مويىنداۋ ارقىلى جۇرەكتەردىڭ توعىسۋىن جەبەۋگە تاباندى بولۋ كەرەك. ەكى جاعالاۋداعى باۋىرلاستار − تامىرى ءبىر، توركىنى ءبىر، مادەنيەتى ءبىر، تەگى ءبىر، قان تامىرى جالعاسقان، بەينەت پەن زەينەتتى بىرگە وتكەرەتىن تاعدىرلاس ورتاق تۇلعا. ءبىر ءۇيلى جاندار بىرگە جاساعاندا، ءسوز بولسا جاقسىراق اڭگىمەلەسسە، ءىس بولسا كوبىرەك اقىلداسسا بولعانى، شەشىلمەيتىن قايشىلىق پەن الاۋىزدىق بولمايدى. قوعامدىق ءتۇزىمىنىڭ ۇقساماۋى بولشەكتەنۋدىڭ سىلتاۋى بولا المايدى. گومينداڭ پارتياسى مەن جۇڭگو كوممۋنيستىك پارتياسى سىندى ەكى پارتيا، ەكى جاعالاۋداعى باۋىرلاستار ۇلتتىق تۇرعىدا بەرىك تۇرىپ، جۇڭحۋا مادەنيەتىن جالعاستىرىپ جانە اسقاقتاتىپ، جۇڭحۋا ۇلتى، جۇڭحۋا مادەنيەتى، ۇلى وتان جونىندەگى شىنايى مويىنداۋدى بەكەمدەپ، ناعىز جۇڭگولىق بولۋ ەركىن، جىگەرىن، بەكىمىن نىعايتۋى كەرەك.

ەكىنشى، بەيبىت دامۋ ارقىلى ورتاق مەكەندى قورعاۋعا تاباندى بولۋ كەرەك. ۇلى قۇرلىق پەن تايۋان بىردەي ءبىر جۇڭگوعا ءتان، جۇڭگو − جۇڭحۋا ۇلتىنىڭ ورتاق مەكەنى. ەكى جاعالاۋداعى باۋىرلاستاردىڭ وسى ورتاق مەكەندى ويداعىداي قورعاۋىنىڭ، ويداعىداي قۇرۋىنىڭ ءتۇپ نەگىزى − ”92 ـ جىلعى ورتاق تانىمعا“ تاباندى بولۋ، ”تايۋاندى دەربەستەندىرۋگە“ قارسى تۇرۋ، ونىڭ وزەگى − ەكى جاعالاۋدىڭ ءبىر جۇڭگوعا ءتان ەكەندىگىن شىنايى مويىنداۋ. وتباسى بەرەكەلى بولسا، بارلىق ءىس گۇلدەنىپ ـ كوركەيەدى. ەكى جاعالاۋ قارىم ـ قاتىناسىنىڭ بەيبىت دامۋىنا ءتيىمدى قۋاتتامالار بولسا، ءبىز تۇگەلدەي قارسى الامىز، ەكى جاعالاۋ قاتىناسىنىڭ بەيبىت دامۋىنا ءتيىمدى ىستەر بولسا، ءبىز كۇش سالا ىستەيمىز. ”تايۋاندى دەربەستەندىرۋ“ − تايۋان بۇعازىنىڭ بەيبىتشىلىگىن بۇلدىرەتىن پالە باسى، ءبىز استە ىرقىنا جىبەرمەيمىز، استە جول بەرمەيمىز. گومينداڭ پارتياسى مەن جۇڭگو كوممۋنيستىك پارتياسى سىندى ەكى پارتيا، ەكى جاعالاۋداعى باۋىرلاستار ۇلتتىڭ اقيقات ىستەرىنە تاباندى بولىپ، ”تايۋاندى دەربەستەندىرۋدى“ كوزدەيتىن بولشەكتەۋشىلىك پەن سىرتتىڭ كيلىگۋىنە قارسى تۇرىپ، ەكى جاعالاۋ قارىم ـ قاتىناسىنىڭ بەيبىت دامۋىن ىلگەرىلەتىپ، جۇڭحۋا ۇلتىنىڭ ورتاق مەكەنىن باتىل قورعاۋى كەرەك.

ءۇشىنشى، اۋىس ـ كۇيىس جاساۋ، توعىسۋ ارقىلى حالىق تۇرمىسى قۇت ـ ىرىسىن ارتتىرۋعا تاباندى بولۋ كەرەك. ەكى جاعالاۋ قارىم ـ قاتىناسىن دامىتۋدىڭ نىساناسى − ەكى جاعالاۋداعى باۋىرلاستاردى ءتىپتى دە تاماشا تۇرمىسقا كەنەلتۋ. ءبىز ەكى جاعالاۋداعىلار ءبىر ءۇيلى جاندار ۇستانىمىنان ۇزدىكسىز جازباي، تايۋاندىق باۋىرلاستار ءۇشىن بەلسەنە ناقتى ىستەردى بىتىرەمىز، يگى ىستەردى ىستەيمىز، قيىنشىلىقتاردى شەشەمىز. وتانىمىز ۇلى قۇرلىعىنىڭ تاۋ ـ وزەندەرى كوركەم، بازارى كەڭ، تايۋاندىق باۋىرلاستاردىڭ ۇنەمى ۇيلەرىنە قايتىپ امانداسىپ تۇرۋىن قارسى الامىز، تايۋان جاستارىنىڭ ۇلى قۇرلىققا كەلىپ اۋىس ـ كۇيىس جاساپ، دامۋىن قارسى الامىز، تايۋاننىڭ اۋىل شارۋاشىلىعى، بالىقشىلىق ونىمدەرىنىڭ، ساپالى تاۋارلارىنىڭ ۇلى قۇرلىقتاعى سان مىڭداعان وتباسىلارىنا جەتكىزىلۋىن قارسى الامىز. گومينداڭ پارتياسى مەن جۇڭگو كوممۋنيستىك پارتياسى سىندى ەكى پارتيا، ەكى جاعالاۋداعى باۋىرلاستار ەكى جاعالاۋدىڭ ارالاسۋىن، ىشتەسۋىن، توعىسۋىن بىرگە كەڭەيتىپ، ەكى جاعالاۋداعى باۋىرلاستاردىڭ تۋىسقاندىق سۇيىسپەنشىلىگىن، قۇت ـ ىرىسىن ارتتىرۋى كەرەك.

ءتورتىنشى، ىنتىماقتاسا كۇرەس جۇرگىزۋ ارقىلى جۇڭحۋا ۇلتىنىڭ ۇلى گۇلدەنۋىن جۇزەگە اسىرۋعا تاباندى بولۋ كەرەك. بيىل − سۇن جۇڭشان مىرزا دۇنيەگە كەلگەندىگىنىڭ 160 جىلدىعى، جۇڭحۋانى گۇلدەندىرۋ، مەملەكەتتى بىرلىككە كەلتىرۋ ونىڭ ومىرلىك تالپىنىسى بولدى. بۇگىنگى تاڭدا ءبىز جۇڭگو ۇلگىسىندەگى وسىزامانداندىرۋ جولىن ءساتتى اشتىق، جۇڭحۋا ۇلتىنىڭ ۇلى گۇلدەنۋى بوگەۋ بەرمەيدى. ءبىز اناعۇرلىم كوپ تايۋاندىق باۋىرلاستاردىڭ ۇلى قۇرلىقتىڭ قوعامدىق ءتۇزىمى مەن دامۋ جولىن دۇرىس تانيتىندىعىنا، تايۋاننىڭ دامۋ بولاشاعىنىڭ قۇدىرەتتى وتاندا ەكەندىگىن، تايۋاندىق باۋىرلاستاردىڭ مۇددەسىنىڭ، قۇت ـ ىرىسىنىڭ جۇڭحۋا ۇلتىنىڭ ۇلى گۇلدەنۋىمەن بايلانىستى ەكەندىگىن تەرەڭ تانيتىندىعىنا كامىل سەنەمىز. بيىل − ۇلى قۇرلىق ”15 ـ بەسجىلدىعىنىڭ“ باستاما جىلى، ءبىز قالىڭ تايۋاندىق باۋىرلاستارمەن دامۋ ورايى مەن جەتىستىكتەرىنەن بىرگە يگىلىكتەنۋدى، جۇڭحۋا ۇلتى ەكونوميكاسىن بىرگە زورايتۋدى قالايمىز. گومينداڭ پارتياسى مەن جۇڭگو كوممۋنيستىك پارتياسى سىندى ەكى پارتيا ساياسي ءوزارا سەنىمدىلىكتى بەكەمدەپ، ۇتىمدى ىقپالداستىقتى ساقتاپ، ەكى جاعالاۋداعى باۋىرلاستاردى ىنتىماقتاستىرىپ، قول ۇستاسا وتىرىپ وتاندى بىرلىككە كەلتىرۋ، ۇلتتى گۇلدەندىرۋ سىندى كوركەم بولاشاقتى بىرگە اشۋى كەرەك.

جىڭ لي ـ ۋىن مىنالاردى ءبىلدىردى: ەكى جاعالاۋ حالقى بىردەي ياندي ـ حۋاڭدي ۇرپاقتارى، بىردەي جۇڭحۋا ۇلتىنا ءتان، بارلىعى جۇڭحۋا مادەنيەتىنەن ءنار العان، بارلىعى جۇڭگولىق، ءبىر ءۇيلى جاندار، سۇن جۇڭشان مىرزا العا قويعان جۇڭحۋانى گۇلدەندىرۋدى قول ۇستاسا ىلگەرىلەتۋى كەرەك. گومينداڭ پارتياسى مەن جۇڭگو كوممۋنيستىك پارتياسى سىندى ەكى پارتيا ”92 ـ جىلعى ورتاق تانىمعا“ تاباندى بولۋ، ”تايۋاندى دەربەستەندىرۋگە“ قارسى تۇرۋ سىندى ورتاق ساياسي نەگىزدە ساياسي ءوزارا سەنىمدىلىكتى كۇشەيتىپ، بايلانىس تۇعىرىنىڭ يقۋاتىن ساۋلەلەندىرىپ، جۇڭحۋا تاريحىن قورعاۋعا، جۇڭحۋا مادەنيەتىن اسقاقتاتۋعا كۇش سالىپ، ەكى جاعالاۋدىڭ حالىقتىق، نەگىزگى ساتى، ەكونوميكا ـ ساۋدا، مادەنيەت سياقتى سالالارداعى اۋىس ـ كۇيىسىن، سەلبەستىگىن ىلگەرىلەتىپ، جاستاردىڭ اۋىس ـ كۇيىسىن، دامۋىن قولداپ، حالىقتىڭ ورتاق قۇت ـ ىرىسىن ارتتىرىپ، ەكى جاعالاۋ قارىم ـ قاتىناسىنىڭ بەيبىت دامۋىن ىلگەرىلەتىپ، ەكى جاعالاۋ قارىم ـ قاتىناسىنىڭ كوركەم بولاشاعىن اشىپ، جۇڭحۋا ۇلتىنىڭ ۇلى گۇلدەنۋىن جۇزەگە اسىرۋى كەرەك.

ۋاڭ حۋنيڭ، ساي چي قاتارلىلار كەزدەسۋگە قاتىناستى.