جاۋ لىجي جاڭا زەلانديانىڭ پارلامەنت باستىعى بلانليمەن كەڭەس وتكىزدى

شينحۋا اگەنتتىگى، 4 - ايدىڭ 13 - كۇنى، بەيجيڭ. مەملەكەتتىك حالىق قۇرىلتايى تۇراقتى كوميتەتىنىڭ باستىعى جاۋ لىجي 4 - ايدىڭ 13 - كۇنى بەيجيڭدەگى حالىق سارايىندا جاڭا زەلانديانىڭ پارلامەنت باستىعى بلانليمەن كەڭەس وتكىزدى.

جاۋ لىجي مىنالاردى ءبىلدىردى: قازىر جۇڭگو - جاڭا زەلانديا قارىم - قاتىناسى تاماشا دامۋ جاعدايىن ساقتاپ، ءار سالاداعى سەلبەستىك جەتىستىكتەرى ۇزدىكسىز جارىققا شىقتى. جۇڭگو جاق جاڭا زەلانديا جاقپەن بىرگە ءتوراعا شي جينپيڭ مەن جاڭا زەلانديا باسشىلارىنىڭ ماڭىزدى ورتاق تانىمىن تياناقتاندىرىپ، ستراتەگيالىق تىلدەسۋدى كۇشەيتىپ، ناقتى سەلبەستىكتى تەرەڭدەتىپ، جۇڭگو مەن جاڭا زەلانديانىڭ جالپى بەتتىك ستراتەگيالىق سەرىكتەستىك قارىم - قاتىناسىنىڭ العا قاراي دامۋىن ىلگەرىلەتۋدى قالايدى.

جاۋ لىجي بىلاي دەپ اتاپ كورسەتتى: ءوزارا قۇرمەت ەتۋ، ءوزارا كەشىرىمشىل بولۋ، نازاردى سەلبەستىككە شوعىرلاندىرۋ، بىرگە دامۋ _ جۇڭگو مەن جاڭا زەلانديانىڭ ديپلوماتيالىق قارىم - قاتىناس ورناتقان 50 نەشە جىلدىق باعالى تاجىريبەسى. ەكى جاق ءتۇسىنىسۋ مەن ءوزارا سەنىمدىلىكتى تەرەڭدەتىپ، ديپلوماتيالىق قارىم - قاتىناس ورناتۋداعى اۋەلگى ماقساتتان جازباي، ”الدا ءجۇرۋ“ رۋحىن ساۋلەلەندىرىپ، سەلبەستىك بەتالىسى ارقىلى تەڭ يگىلىككە كەنەلۋدى ىلگەرىلەتىپ، ءبىر - ءبىرىنىڭ وزەكتى مۇددەسى مەن ءجىتى قاداعالاپ وتىرعان كەلەلى ىستەرىنە قۇرمەت ەتۋى كەرەك. جۇڭگو جاق جاڭا زەلانديا جاقتىڭ ءبىر جۇڭگو ساياساتىنا تاباندى بولۋعا تالاي رەت ۋادە بەرگەندىگىن القايدى. جۇڭگو جاق جاڭا زەلانديا جاقپەن بىرگە نازاردى دامۋ مەن سەلبەستىككە شوعىرلاندىرىپ، اۋىل شارۋاشىلىعى، ورمان شارۋاشىلىعى، ماشينا - ەلەكتر سياقتى ءداستۇرلى سالالارداعى سەلبەستىكتى تەرەڭدەتىپ، سيفرلى ەكونوميكا، جاسىل تيپكە بۇرىلىس جاساۋ، جاساندى زەردە سياقتى جاڭادان گۇلدەنگەن سالالارداعى سەلبەستىكتى كۇشەيتۋ جونىندە ىزدەنىس جاساپ، ەكى ەلدىڭ دامۋ قاجەتىنە ۇيلەسەتىن اناعۇرلىم كوپ سەلبەستىكتىڭ ارتۋ تۇيىندەرىن قالىپتاستىرۋدى قالايدى. ەكى جاق اۋىس - كۇيىس پەن دوستىقتى كۇشەيتىپ، ەكى ەل حالقىنىڭ، اسىرەسە، جاس ۇرپاقتاردىڭ دوستىق بارىس - كەلىسىن تەرەڭدەتىپ، جەرگىلىكتى ورىنداردىڭ اۋىس - كۇيىسىن جەبەۋى كەرەك. بىرلەسكەن مەملەكەتتەر ۇيىمى، دۇنيە جۇزىلىك ساۋدا ۇيىمى سياقتى كوپ جاقتى جۇلگەدەگى پىكىرلەسۋدى، سايكەسۋدى كۇشەيتىپ، تەڭ، ءتارتىپتى دۇنيە ءجۇزىنىڭ كوپ ۇيەكتەنۋىن، جالپىعا ءتيىمدى، سيىسىمدى ەكونوميكانىڭ جاھاندانۋىن بىرگە ىلگەرىلەتۋ كەرەك.

جاۋ لىجي بىلاي دەپ باسا دارىپتەدى: جۇڭگو مەملەكەتتىك حالىق قۇرىلتايى جاڭا زەلانديا پارلامەنتىمەن بىرگە كوپ ساتىلى، كوپ سالالى بارىس - كەلىس، اۋىس - كۇيىس سىندى تاماشا جاعدايدى ساقتاپ، زاڭ شىعارۋ قۇرىلىمدارىنىڭ فۋنكتسياسى مەن ەرەكشەلىگىن تياناق ەتىپ، ەل باسقارۋ تاجىريبەلەرىن اۋىستىرۋدى ورىستەتىپ، ەكى ەلدىڭ ناقتى سەلبەستىگىن زاڭدىق كەپىلمەن قامداۋدى قالايدى. جاۋ لىجي ”15 - بەسجىلدىق“ جوبا باعدارلاماسى مەن ەكولوگيالىق ورتا زاڭناماسىنا قاتىستى جاعدايلاردى تانىستىرىپ، مىنانى ءبىلدىردى: اناعۇرلىم كوپ جاڭا زەلانديا كاسىپورىندارىنىڭ جۇڭگو بازارىن كەڭەيتۋىن جانە وعان ىشكەرىلەي ارالاسۋىن قارسى الامىز، جۇڭگو جاق جاڭا زەلانديا جاقپەن ەكولوگيالىق ورتا جونىندە زاڭ شىعارۋ، جاسىل، تومەن كومىرتەكتى دامۋ، كليمات وزگەرىسىنە توتەپ بەرۋ جاعىنداعى تاجىريبە اۋىس - كۇيىسى مەن ناقتى سەلبەستىكتى ورىستەتۋدى قالايدى.

بلانلي مىنالاردى ءبىلدىردى: جاڭا زەلانديا جۇڭگومەن سەلبەستىكتى دامىتۋعا ايرىقشا ءمان بەرەدى، ءوزارا سەنۋ، بۇكپەسىز اۋىس - كۇيىس جاساۋ نەگىزىندە، جاڭا زەلانديا - جۇڭگو قارىم - قاتىناسى توتەنشە پىسىپ - جەتىلدى. جاڭا زەلانديا ءبىر جۇڭگو ساياساتىنا تاباندى بولادى. ەكى ەل دە حالىق تۇرمىسىن اناعۇرلىم جاقسارتۋعا كۇش سالدى، جاڭا زەلانديا جۇڭگونىڭ دامۋدا قول جەتكىزگەن وراسان زور تابىستارىن قۋانا كورىپ وتىر. ەكى ەلدىڭ ەكونوميكا - ساۋدا، جاڭا ەنەرگيا، وقۋ - اعارتۋ، جاستار، كليمات وزگەرىسى سياقتى سالالارداعى سەلبەستىگى سۇبەلى تابىستارعا قول جەتكىزدى، گۋمانيتارلىق اۋىس - كۇيىس ەكى جاقتى قارىم - قاتىناستا ماڭىزدى رول اتقارۋدا. جاڭا زەلانديا پارلامەنت ۋاكىلدەر ۇيىرمەسىنىڭ مۇشەلەرى جاڭا زەلانديانىڭ ءارقايسى ساياسي پارتياسىنان قۇرالعان، بارلىعى جۇڭگومەن قارىم - قاتىناستى ىشكەرىلەي دامىتۋدى قولدايدى. جاڭا زەلانديا پارلامەنتى جۇڭگو مەملەكەتتىك حالىق قۇرىلتايىمەن دوستىق بارىس - كەلىستى كۇشەيتىپ، زاڭ شىعارۋ سياقتى سالالاردا اۋىس - كۇيىستى تەرەڭدەتىپ، ءوزارا ءتۇسىنىسۋدى جانە حالىقتار دوستىعىن كۇشەيتىپ، جاڭا زەلانديا مەن جۇڭگونىڭ ناقتى سەلبەستىگىن ىلگەرىلەتۋ ءۇشىن بەلسەندى ۇلەس قوسۋدى قالايدى.

جاڭ چيڭۋەي كەڭەستە بىرگە بولدى.