جاڭادان 12 ورىن قوسىلدى! شينجياڭدا ەرەكشە جاعدايعا بايلانىستى كەتىلگەن، بىلعانعان حالىق اقشاسىن اۋىستىرۋ ورىندارى رەتتەلدى 

تيانشان تورابى – شينجياڭ گازەتىنىڭ حابارى (ءتىلشى ۋاڭ يۇڭفەي حابارلايدى) ءتىلشىنىڭ جۇڭگو حالىق بانكەسىنىڭ شينجياڭ بولىمشە بانكەسىنەن ۇعىسۋىنشا: جۇرتشىلىقتىڭ ەرەكشە جاعدايعا بايلانىستى كەتىلگەن، بىلعانعان حالىق اقشاسىن اۋىستىرۋىنا اناعۇرلىم قولايلىلىق جاراتۋ، ناق اقشا جاعىنداعى قىزمەتتى ۇزدىكسىز جاقسارتۋ ءۇشىن، جۋىردا جۇڭگو حالىق بانكەسىنىڭ شينجياڭ بولىمشە بانكەسى ۇيلەسىمدى ورنالاستىرۋ، ءونىمدى قامتىلىم، جۇرتشىلىققا قولايلى بولۋى پرينسيبى بويىنشا، شينجياڭ كولەمىندەگى ەرەكشە جاعدايعا بايلانىستى كەتىلگەن، بىلعانعان حالىق اقشاسىن اۋىستىرۋ ورىندارىن يكەمدى تۇردە رەتتەدى.

رەتتەلگەننەن كەيىنگى اۋىستىرۋ ورنىنىڭ سانى 195 بولىپ، بۇرىنعىداعىمەن سالىستىرعاندا 12 ورىن جاڭادان قوسىلعان، بۇكىل شينجياڭداعى 14 ايماق، وبلىس، قالانى قامتىعان.

«جۇڭگو حالىق بانكەسىنىڭ ەرەكشە جاعدايعا بايلانىستى كەتىلگەن، بىلعانعان حالىق اقشاسىن اۋىستىرۋ ءادىسى» (جۇڭگو حالىق بانكەسىنىڭ 2026 – جىلعى 2 – نومىرلى بۇيرىعى) بيىل 3 – ايدىڭ 31 – كۇنىنەن باستاپ اتقارىلدى. بۇل «ادىستە» كەتىلگەن، بىلعانعان حالىق اقشاسى دەگەنىمىز جىرتىلعان، كەتىلگەن، نەمەسە سىرتقى كورىنىسى، ماتەريالى بۇلىنگەن، ءتۇسى وزگەرگەن، ورنەكتەرى ايقىن كورىنبەيتىن، جالعان اقشادان ساقتانۋ بەلگىلەرى بۇلىنگەن، جالعاستى اينالىمعا ءتۇسىرىپ پايدالانۋعا بولمايتىن حالىق اقشاسىن كورسەتەدى دەپ بەلگىلەنگەن.

فينانس قۇرىلىمدارى كەتىلگەن، بىلعانعان حالىق اقشاسىن اۋىستىرماقشى بولعان جۇرتشىلىققا اقىسىز قىزمەت وتەۋى كەرەك، جۇمىستى بىتىرۋدەن باس تارتۋىنا بولمايدى.

ۇزاق ۋاقىتتان بەرى، جۇڭگو حالىق بانكەسىنىڭ شينجياڭ بولىمشە بانكەسى فينانس سالاسىندا حالىق ءۇشىن قىزمەت ىستەۋ تانىمىندا تاباندى بولىپ، قاراماعىنداعى رايونداعى بانكە سالاسىنداعى فينانس قۇرىلىمدارىنىڭ كەتىلگەن، بىلعانعان حالىق اقشاسىن ساراپتاۋ مەن اۋىستىرۋ قىزمەتىن ويداعىداي ىستەۋىنە بەلسەندى جەتەكشىلىك ەتىپ، ”دارەجەگە ءبولىپ باسقارۋ، ءونىمدى تۇردە قامتۋ، جۇرتشىلىققا قولايلى بولۋ“ پرينسيبى بويىنشا، بۇكىل شينجياڭدا ەرەكشە جاعدايعا بايلانىستى كەتىلگەن، بىلعانعان حالىق اقشاسىن اۋىستىرۋ ورىندارىن ورنالاستىرۋدى جاقسارتتى. 2025 – جىلى 10 – ايدىڭ سوڭىنا دەيىن، ەرەكشە جاعدايعا بايلانىستى كەتىلگەن، بىلعانعان حالىق اقشاسىن ساراپتاۋ مەن اۋىستىرۋ جۇمىسى 6550 رەت ورىندالىپ، قاتىستى سوما 9 ميلليون ءجۇز مىڭ يۋاننان اسقان.

كەلۋ قاينارى: حالىق تورابى