اناعۇرلىم زور تەبىنمەن، اناعۇرلىم ناقتى شارالارمەن نەگىزدىك زەرتتەۋدى كۇشەيتىپ، عىلىم - تەحنولوگيادا قۋاتتى مەملەكەت قۇرىلىسى نەگىزىن ونان ارى بەكەمدەۋ كەرەك 

4 - ايدىڭ 30 - كۇنى تۇستەن بۇرىن جۇڭگو كوممۋنيستىك پارتياسى ورتالىق كوميتەتىنىڭ باس شۋجيى، مەملەكەت ءتوراعاسى، ورتالىق اسكەري ىستەر كوميتەتىنىڭ ءتوراعاسى شي جينپيڭ شاڭحايدا نەگىزدىك زەرتتەۋدى كۇشەيتۋ جونىندەگى اڭگىمە ماجىلىسىنە قاتىناستى ءارى ماڭىزدى ءسوز سويلەدى.

□ سۋرەتتى شينحۋا اگەنتتىگىنىڭ ءتىلشىسى جاي جيانلان تۇسىرگەن

شينحۋا اگەنتتىگىنىڭ 4 - ايدىڭ 30 - كۇنى شاڭحايدان بەرگەن حابارى. جۇڭگو كوممۋنيستىك پارتياسى ورتالىق كوميتەتىنىڭ باس شۋجيى، مەملەكەت ءتوراعاسى، ورتالىق اسكەري ىستەر كوميتەتىنىڭ ءتوراعاسى شي جينپيڭ 4 - ايدىڭ 30 - كۇنى تۇستەن بۇرىن شاڭحايدا نەگىزدىك زەرتتەۋدى كۇشەيتۋ جونىندەگى اڭگىمە ماجىلىسىنە قاتىناستى ءارى ماڭىزدى ءسوز سويلەدى. ول بىلاي دەپ باسا دارىپتەدى: نەگىزدىك زەرتتەۋ − تۇتاس عىلىم جۇيەسىنىڭ قاينار كوزى، بارلىق تەحنولوگيالىق ماسەلەلەردىڭ باس تەتىگى. اناعۇرلىم زور تەبىنمەن، اناعۇرلىم ناقتى شارالارمەن نەگىزدىك زەرتتەۋدى كۇشەيتىپ، ەلىمىزدىڭ العاشقى جاسامپازدىق قابىلەتىن جوعارىلاتىپ، عىلىم - تەحنولوگيادا قۋاتتى مەملەكەت قۇرىلىسىنىڭ نەگىزىن ونان ارى بەكەمدەۋ كەرەك.

جۇڭگو كوممۋنيستىك پارتياسى ورتالىق كوميتەتى ساياسي بيۋروسىنىڭ تۇراقتى مۇشەسى، ورتالىق كوميتەت كەڭسەسىنىڭ مەڭگەرۋشىسى ساي چي اڭگىمە ماجىلىسىنە قاتىناستى، جۇڭگو كوممۋنيستىك پارتياسى ورتالىق كوميتەتى ساياسي بيۋروسىنىڭ تۇراقتى مۇشەسى، مەملەكەتتىك كەڭەستىڭ ورىنباسار زۇڭليى ديڭ شۋەشياڭ اڭگىمە ءماجىلىسىن باسقاردى.

اڭگىمە ماجىلىسىندە عىلىم - تەحنولوگيا مينيسترلىگىنىڭ مينيسترى يىن حىجۇن، وقۋ - اعارتۋ مينيسترلىگىنىڭ مينيسترى حۋاي جينپىڭ، جۇڭگو عىلىم اكادەمياسىنىڭ باستىعى حوۋ جيانگو، شاڭحاي قالالىق پارتكومنىڭ شۋجيى چىن جي - نيڭ، بەيجيڭ داشۋەسى ماتەماتيكا عىلىمى شۋەيۋانىنىڭ باستىعى ليۋ روچۋان، جۇڭگو عىلىم اكادەمياسى شىنجىن وزىق تەحنولوگيا زەرتتەۋ مەكەمەسىنىڭ باستىعى ليۋ چىنلي، پۋجياڭ تاجىريبەحاناسىنىڭ پروفەسسورى چياۋ يۇي، باتىس بولىك اسقىن وتكىزگىش ماتەريالى عىلىم - تەحنولوگيا جارنا شەكتى سەرىكتەستىگىنىڭ باس عالىمى جاڭ پيڭشياڭ ىلگەرىندى - كەيىندى ءسوز سويلەپ، نەگىزدىك زەرتتەۋدى كۇشەيتۋ جونىندەگى قىزمەت جاعدايىن تانىستىرىپ، ۇسىنىس - پىكىر بەردى.

كوپشىلىكتىڭ ءسوزىن تىڭداعاننان كەيىن، شي جينپيڭ ماڭىزدى ءسوز سويلەدى. ول بىلاي دەپ اتاپ كورسەتتى: پارتيا 18 - قۇرىلتايىنان بەرى، پارتيا ورتالىق كوميتەتى نەگىزدىك زەرتتەۋگە وسكەلەڭ ءمان بەرىپ، عىلمي زەرتتەۋدىڭ ورنالاسىمىن ساپالىلاندىرۋ، ۇسىنىلىم قامتاماسىزدىعىن كۇشەيتۋ، ءتۇزىلىس - مەحانيزمدە جاڭالىق اشۋ سياقتىلار ارقىلى ەلىمىزدىڭ نەگىزدىك زەرتتەۋ دەڭگەيىنىڭ كورنەكتى جوعارىلاۋىن ىلگەرىلەتتى. كەزەكتە جاڭا عىلىم - تەحنولوگيا توڭكەرىسى مەن كاسىپ سالاسى وزگەرىسىندە جەدەل سەرپىلىس بولىپ، الەمدىك عىلىم - تەحنولوگيا باسەكەسى نەگىزدىك الدىڭعى لەكتىك سالالارعا اناعۇرلىم نازار اۋدارىپ،ءتول جاسامپازدىق سيپاتتى، اۋدارۋ سيپاتتى جاڭالىق اشۋدىڭ ماڭىزدىلىعى كۇن سايىن كورنەكتىلەندى. ءبىز ورايدى مىقتى يگەرىپ، سىن - سايىستارعا توتەپ بەرىپ، نەگىزدىك زەرتتەۋ قىزمەتىن شىن مانىندە ماڭىزدى كۇن تارتىپكە قويىپ، ۇزدىكسىز يگەرىپ، ۇزدىكسىز تىڭ تابىستارعا قول جەتكىزۋىمىز كەرەك.

شي جينپيڭ بىلاي دەپ باسا دارىپتەدى: ءبىر تۇتاس جوسپارلاۋ مەن جوعارى دەڭگەيدە جوبالاۋدى كۇشەيتىپ، نەگىزدىك زەرتتەۋ جۇيەسىنىڭ ورنالاسىمىن ساپالىلاندىرۋ كەرەك. ”ءتورتتى بەتكە الۋ“ ستراتەگيالىق بەتالىسىنا تاباندى بولىپ، نەگىزدىك زەرتتەۋدىڭ نەگىزگى قامال الۋ باعىتى مەن ءتۇيىندى سالالارىن ونان ارى ايقىنداۋ كەرەك. مەملەكەتتىڭ عىلمي زەرتتەۋ قۇرىلىمدارى، جوعارى دەڭگەيلى زەرتتەۋ تيبىندەگى جوعارى مەكتەپ سياقتىلاردىڭ جەتەكشىلىك رولىن كۇشەيتىپ، جاڭاشا زەرتتەۋ - اشۋ قۇرىلىمدارىن دامىتۋعا دەم بەرىپ جانە ونى ارناعا ءتۇسىرىپ، كاسىپورىندار جەتەكشىلىك ەتكەن ءوندىرىس، وقىتۋ، زەرتتەۋ، قولدانۋدىڭ تەرەڭدەي توعىسۋىن ىلگەرىلەتىپ، نەگىزدىك زەرتتەۋ، قولدانىلمالى اشۋ، جەتىستىكتەردى كادەگە جاراتۋ سىندى جاڭالىق اشۋ تىزبەگىن تۇتاستىرۋ كەرەك. نەگىزدىك پاندەر قۇرىلىسىن كۇشەيتىپ، قولدانىلمالى پاندەر مەن نەگىزدىك پاندەردىڭ سايكەستى دامۋىن جەبەۋ كەرەك.

شي جينپيڭ بىلاي دەپ اتاپ كورسەتتى: وقۋ - اعارتۋ، عىلىم - تەحنولوگيا، دارىندىلاردىڭ دامۋىن ءبىر تۇلعالى ىلگەرىلەتىپ، باۋلۋ، ەنگىزۋ، پايدالانۋ قىزمەتىن جان - جاقتى جاقسى ىستەپ، نەگىزدىك زەرتتەۋ دارىندىلارى قوسىنىن زورايتۋ كەرەك. دارىندىلاردىڭ ءوسىپ - جەتىلۋ زاڭدىلىعىنا بويسۇنىپ، وقۋ - اعارتۋ ساپاسىن جوعارىلاتىپ، نەگىزدىك زەرتتەۋ زاپاس كۇشتەرىن ۇزدىكسىز جەتىلدىرۋ كەرەك. عىلىم - تەحنيكا سالاسى مەن وقۋ - اعارتۋ سالاسى سايكەسىپ ادام تاربيەلەۋ مەحانيزمىن ساپالىلاندىرىپ، عىلمي زەرتتەۋدىڭ ءبىرىنشى شەبىندە دارىندىلاردى بايقاۋعا جانە جەتىلدىرۋگە ءمان بەرۋ كەرەك. مىندەت ارقىلى جەتەكتەۋگە، اعا بۋىندار جاستاردى تاربيەلەۋگە تاباندى بولىپ، جاس دارىندىلاردى كۇش سالا سۇيەمەلدەۋ كەرەك. عالىمدار رۋحىن ساۋلەلەندىرىپ، عىلىم جالپىلاستىرۋ ۇگىتىن كۇشەيتىپ، جاستار مەن ورەندەردىڭ قيال قابىلەتى مەن ىزدەنۋ ىنتاسىن قوزعاپ، نەگىزدىك زەرتتەۋگە ات سالىسۋدى ءتىپتى دە كوپ جاستار مەن ورەندەردىڭ ومىرلىك تالپىنىسىنا اينالدىرۋ كەرەك.

شي جينپيڭ بىلاي دەپ باسا دارىپتەدى: نەگىزدىك زەرتتەۋدى قولداۋدى، قامتاماسىز ەتۋدى كۇشەيتۋ كەرەك. نەگىزدىك زەرتتەۋ قاراجاتىنىڭ سالىستىرماسىن بىرتىندەپ جوعارىلاتىپ، كوپ نەگىزدى ۇسىنىلىم جاعدايىن قالىپتاستىرۋ كەرەك. كەلەلى عىلىم - تەحنولوگيا نەگىزدىك قۇرىلعىلارىن جۇيەلى ورنالاستىرىپ قۇرىپ، زەردەلىلەنگەن عىلمي زەرتتەۋ تۇعىرى جۇيەسىن ورناتۋ كەرەك. نەگىزدىك زەرتتەۋدىڭ ەرەكشەلىگىنە ۇيلەسەتىن تۇرگە ءبولىپ باعالاۋ جۇيەسىن اقاۋسىزداندىرىپ، نەگىزدىك زەرتتەۋمەن شۇعىلدانۋشىلاردىڭ قىزمەت، تۇرمىس شارت - جاعدايىن جاقسارتىپ، اشىق، سيىسىمدى، ساتسىزدىككە كەڭشىلىكپەن قارايتىن جاڭالىق اشۋ ورتاسىن جاراتۋ كەرەك. عىلمي زەرتتەۋدەگى سەنىمدىلىك قۇرىلىسىن كۇشەيتۋ كەرەك.

شي جينپيڭ بىلاي دەپ اتاپ كورسەتتى: الەمدىك جاڭالىق اشۋ تورىمەن ىرىقتى تۇردە توعىسىپ، نەگىزدىك زەرتتەۋ جاعىنداعى حالىقارالىق اۋىس - كۇيىستى، سەلبەستىكتى تەرەڭدەتىپ، كليمات وزگەرىسى، ەنەرگيا ورتاسى، تىرشىلىك اقاۋسىزدىعى سياقتى كەلەلى عىلمي ماسەلەلەردەن قامال الۋدى بىرلەسىپ ورىستەتىپ، الەمدىك عىلىم - تەحنولوگيانى باسقارۋعا بەلسەنە ات سالىسۋ كەرەك.

ديڭ شۋەشياڭ ءماجىلىستى باسقارعاندا مىنالاردى ءبىلدىردى: باس شۋجي شي جينپيڭ ماڭىزدى سوزىندە ەلىمىزدىڭ نەگىزدىك زەرتتەۋدە قول جەتكىزگەن تابىستارىن تولىق تۇراقتاندىرىپ، ءدوپ كەلگەن جاڭا جاعدايعا، جاڭا سىن - سايىستارعا جان - جاقتى تالداۋ جاساپ، نەگىزدىك زەرتتەۋدى كۇشەيتۋ جونىندە ستراتەگيالىق ورنالاستىرۋ جاساپ، ايقىن تالاپتار قويدى. ءسوز بيىكتە تۇرىپ الىستى بولجاعان، مازمۇنى باي، اسا كۇشتى ساياسي سيپاتقا، يدەيالىق سيپاتقا، جەتەكشىلىك سيپاتقا يە، نەگىزدىك زەرتتەۋدى كۇشەيتۋگە العا باسۋ بەتالىسىن كورسەتىپ، ءتۇبىرلى بويسۇنۋ ولشەمىن ازىرلەدى. ءبىز باس شۋجيدىڭ ماڭىزدى ءسوزىنىڭ رۋحىن ىشكەرىلەي ۇيرەنىپ، جەتە ءتۇسىنىپ، پارتيا ورتالىق كوميتەتىنىڭ ستراتەگيالىق ويىن دۇرىس يگەرىپ، كوكەي تەستىلىك سەزىمدى، جاۋاپكەرشىلىك سەزىمدى، بورىشتىلىق سەزىمدى كۇشەيتىپ، اناعۇرلىم بەرىك سەنىم جانە بەكىم، اناعۇرلىم ناقتى شارا جانە ارەكەت ارقىلى نەگىزدىك زەرتتەۋدى جاپپاي كۇشەيتىپ، ءتول جاسامپازدىق قابىلەتىن كۇش سالا جوعارىلاتىپ، جوعارى دەڭگەيدەگى عىلىم - تەحنولوگيادا ءوز كۇشىنە سۇيەنىپ ءوزىن الۋەتتەندىرۋدى جۇزەگە اسىرۋ، عىلىم - تەحنولوگيادا قۋاتتى مەملەكەت قۇرۋ جولىندا قۇلشىنا كۇرەس جۇرگىزۋىمىز كەرەك.

يىن لي، شى تايفىڭ، ليۋ گوجۇڭ، جاڭ گوچيڭ، حۋاڭ كۇنميڭ اڭگىمە ماجىلىسىنە قاتىناستى.

ورتالىق پەن مەملەكەت ورگاندارىنىڭ قاتىستى تاراۋلارىنداعى، ارميانىڭ قاتىستى ورىندارىنداعى، ءىشىنارا ولكە، قالالارداعى نەگىزگى جاۋاپتى جولداستار، قاتىستى جوعارى مەكتەپتەردىڭ، عىلمي زەرتتەۋ قۇرىلىمدارىنىڭ، مەملەكەتتىك تاجىريبەحانالاردىڭ، كاسىپورىنداردىڭ جاۋاپتىلارى جانە عىلمي زەرتتەۋ قىزمەتكەرلەرىنىڭ ۋاكىلدەرى قاتارلىلار اڭگىمە ماجىلىسىنە قاتىناستى.