ءىشىنارا جەرلەردە نوسەر نەمەسە قار جاۋادى! شينجياڭدا ءبىر رەت ورتاشا كۇشەمەلىكتەگى سۋىق اعىس بولادى

ءتىلشىنىڭ شينجياڭ اۋا رايى ستانسياسىنان ۇعىسۋىنشا، وسى اپتادا (4 - ايدىڭ 27 - كۇنىنەن 5 - ايدىڭ 3 - كۇنىنە دەيىن) شينجياڭدا ءبىر رەت ورتاشا كۇشەمەلىكتەگى سۋىق اعىس بولادى. سولتۇستىك شينجياڭنىڭ باسىم كوپ بولەگى جانە شىعىس شينجياڭ، وڭتۇستىك شينجياڭنىڭ ءىشىنارا رايوندارىندا ىلگەرىندى - كەيىندى جاۋىن – شاشىن بولادى، بوران، قۇمدى بوران سوعادى جانە تەمپەراتۋرا تومەندەيدى، كوكتەم لەبى ەندى ەسە باستاعاندا قۇمدى بوران مەن جاۋىن – شاشىن قاتارلاساتىن بولادى.

الدىن الا مالىمەتتە كورسەتىلۋىنشە، 4 – ايدىڭ 27 – كۇنى تۇننەن 5 – ايدىڭ 1 - كۇنىنە دەيىن سولتۇستىك شينجياڭنىڭ باسىم كوپ بولەگى مەن وڭتۇستىك شينجياڭنىڭ باتىس بولەگىندەگى تاۋلى وڭىرلەر، اقسۋ ايماعىنىڭ باتىس سولتۇستىك بولەگى، بايىنعولىن موڭعۇل اۆتونوميالى وبلىسىنىڭ سولتۇستىك بولەگى، كۇنلۇن تاۋىنىڭ سولتۇستىك بەتكەيى، تۇرپان قالاسىنىڭ تاۋلى رايونى، قۇمىل قالاسى قاتارلى جەرلەردىڭ ءىشىنارا وڭىرلەرىندە تولاسسىز جاڭبىر جاۋادى، مۇنىڭ ىشىندە ىلە اڭعارىنىڭ وڭتۇستىك، شىعىس بولەگى، بۇراتالا موڭعۇل اۆتونوميالى وبلىسى، تارباعاتاي ايماعىنىڭ تاۋلى رايونى، التاي ايماعى، شىحىزى قالاسىنىڭ وڭتۇستىگىندەگى تاۋلى رايون، ءۇرىمجى قالاسىنىڭ تاۋلى رايونى، سانجى حۇيزۋ اۆتونوميالى وبلىسىنىڭ تاۋلى رايونى، وڭتۇستىك شينجياڭنىڭ باتىس بولەگىندەگى تاۋلى رايون جانە وڭتۇستىك بولەگىندەگى تاۋلى رايون قاتارلى جەرلەردىڭ ءىشىنارا وڭىرلەرىندە ورتاشادان باستاپ قالىڭ جاڭبىر نەمەسە قار جاۋادى، تاۋلى وڭىرلەردىڭ ءىشىنارا جەرلەرىندە نوسەر نەمەسە قار جاۋادى.

سۋىق اعىستىڭ اسەرىنەن سولتۇستىك شينجياڭنىڭ باسىم كوپ بولەگى مەن شىعىس شينجياڭدا باتىس سولتۇستىكتەن 5 بال اينالاسىندا بوران سوعادى، جەل وتتەرىندە 9 دا 10 بال بوران سوعادى، 30 شاقىرىمدىق، 100 شاقىرىمدىق جەل وتىندە مەزەتتىك جەل كۇشى 11 بالعا جەتەدى. وڭتۇستىك شينجياڭ ويپاتىنىڭ ورتا، شىعىس بولەگىندە قيىس شىعىستان 5 تە 6 بال بوران سوعادى، مەزەتتىك وتكىنشى جەل كۇشى 8 دە 9 بالعا جەتەدى، ءىشىنارا جەرلەردە قۇمدى بوران سوعادى. سولتۇستىك شينجياڭ مەن شىعىس شينجياڭنىڭ تەمپەراتۋراسى 5 سەلتسي گرادۋس اينالاسىندا تومەندەيدى.

ءۇرىمجى قالاسىنىڭ وسى اپتاداعى اۋا رايى ءبىرشاما قۇبىلمالى بولادى، 4 – ايدىڭ 28 – كۇنى تۇننەن 29 – كۇنى تاڭەرتەڭگە دەيىن ءۇرىمجى قالاسىنىڭ كوپ جەرىندە سەبەزگى جاڭبىر جاۋادى، تاۋلى وڭىردەگى ءىشىنارا جەرلەردە ورتاشا جاڭبىر جاۋادى، باتىس سولتۇستىكتەن 5 بال اينالاسىندا بوران سوعادى، دابانچىڭ رايونىندا كۇن بۇلتتى بولادى، قيىس باتىستان 9 دا 10 بال بوران سوعادى، ءار رايوننىڭ تەمپەراتۋراسى 4 سەلتسي گرادۋس اينالاسىندا تومەندەيدى، وسى اپتانىڭ باسقا ۋاقىتتارىندا نەگىزىنەن كۇن اشىق نەمەسە بۇلتتى بولادى.

شينجياڭ اۋا رايى ستانسياسى مىنانى ەسكەرتتى: وسى اپتادا سولتۇستىك شينجياڭنىڭ باتىس سولتۇستىك بولەگى، تيانشان تاۋلى رايونى، بايىنعولىن وبلىسىنىڭ سولتۇستىك بولەگى، قۇمىل قالاسى قاتارلى جەرلەردىڭ ءىشىنارا جەرلەرىندە قىسقا ۋاقىت كۇشتى جاۋىن - شاشىن، ناجاعايلى بوران، بۇرشاق سياقتى كۇشتى كونۆەكسيالىق اۋا رايىنىڭ تۋىلۋ مۇمكىندىگى ءبىرشاما زور. تاۋلى رايونداردا جاۋىن – شاشىن ءبىرشاما كوپ بولادى، ونىڭ ۇستىنە تاياۋ مەزگىلدە اۋا تەمپەراتۋراسىنىڭ جوعارىلاۋىنا بايلانىستى، ارالاسپا تاسقىن جانە جەر كوشكىنى، لاي تاسقىنى سياقتى گەولوگيالىق اپاتتاردان ساقتانۋ كەرەك. بۇدان سىرت، جەل وتىندەگى بوران مەن وڭتۇستىك شينجياڭ ويپاتىنداعى قۇمدى بوران قاتىناس ـ تاسىمال، ساياحات، ەگىن، مال شارۋاشىلىق وندىرىسىنە، سونداي ـ اق بۇقارانىڭ ءجۇرىس ـ تۇرىسىنا ءتيىمسىز ىقپال جاسايدى، قاتىستى تاراۋلار مەن جۇرتشىلىقتى الدىن الا ساقتانۋ دايىندىعىن جاقسى ىستەپ، ءجۇرىس ـ تۇرىس جوسپارىن ۇيلەسىمدى ورنالاستىرۋىن ۇسىنىس ەتەمىز.