سىرتقا تاعام جەتكىزۋ كاسىبىمەن شۇعىلداناتىن اسحاناسىنىڭ توڭازىتقىشىن تات باسقان، قوسپا زاتتاردى بەتالدى قولدانعان… ءۇرىمجى قالاسى جەلىلىك اس – سۋ كاسىبىنىڭ حاۋىپسىزدىگىنە ساياتىن ماسەلەلەر جونىندە ارناۋلى جونگە سالۋ ارەكەتىن ورىستەتتى 

”سىرتتان تاعام بۇيىرتۋ“ قازىرگى قالا تۇرعىندارىنىڭ كۇندەلىكتى تۇرمىسىنداعى قولايلى تاماقتانۋ تالعامىنا اينالدى، جەلىلىك اس – سۋ سالاسىنداعى ازىق – تۇلىك حاۋىپسىزدىگى تۇتىنۋشىلاردىڭ دەنساۋلىعىمەن تىكەلەي قاتىستى. جەلىدەگى اس – سۋ سالاسىنىڭ كولەمى ۇزدىكسىز كەڭەيگەن سايىن، سىرتقا تاعام جەتكىزەتىن ءىشىنارا دۇكەندەردە كۋالىكسىز تيجارات جۇرگىزۋ، اسحانا ورتاسىنىڭ لاس بولۋى، ىدىس - اياقتى زالالسىزداندىرۋىنىڭ ولشەمگە ۇيلەسپەۋى، اسحانا قوقسىعىن ۇيلەسىمدى ءبىرجاقتى ەتپەۋ قاتارلى ماسەلەلەر ساقتالىپ وتىر، بۇل جونىندە جۇرتشىلىقتىڭ اڭىسى كۇشتى. جۋىردا، ءۇرىمجى قالالىق بازاردى باقىلاۋ - باسقارۋ مەكەمەسى كوپتەگەن تاراۋلارمەن بىرگە، جەلىلىك اس – سۋ سالاسىنىڭ حاۋىپسىزدىگى جونىندەگى ارناۋلى جونگە سالۋ ارەكەتىن باستاپ، قالا رايونىنداعى دايار تاعام دۇكەندەرى، ينتەرنەت ارقىلى تاعامدى كوپ ساتاتىن سىرتقا تاعام جەتكىزۋ دۇكەندەرى سياقتى ءتۇيىندى كاسىپ تۇرلەرىنە شوعىرلى نازار اۋداردى.

بۇل رەتكى ارناۋلى جونگە سالۋ ارەكەتى ءۇرىمجى قالاسىنىڭ نەگىزگى قالا رايونىن قامتىدى، جەلىلىك اس – سۋ سالاسىنىڭ تۇتاس تىزبەگىندەگى كورنەكتى ماسەلەلەرگە باعىتتاي وتىرىپ، كۋالىكسىز تيجارات جۇرگىزۋ، تيجارات كولەمىنەن اسىپ تيجارات جاساۋ، اسحانا تازالىعى ولشەمگە تولماۋ، ازىق - تۇلىكتى ۇيلەسىمدى ساقتاماۋ، ىدىس - اياقتى زالالسىزداندىرۋدى تەك فورماعا اينالدىرۋ، اسحانا قوقسىعىن بەتالدى تاستاۋ سياقتى زاڭعا، ەرەجەگە قايشى ارەكەتتەردى ءتۇيىندى تەكسەردى.

ءۇرىمجى قالالىق بازاردى باقىلاۋ - باسقارۋ مەكەمەسىنىڭ قاتىستى جاۋاپتىسى جەلىلىك اس – سۋ سالاسىنىڭ حاۋىپسىزدىگى جونىندەگى ارناۋلى جونگە سالۋ ارەكەتىن ۇزدىكسىز تەرەڭدەتىپ، ۇدايىلانعان باقىلاۋ – اسقارۋ مەحانيزمىن ورناتىپ، جەلىدەگى تەكشەلەردى باقىلاۋدى كۇشەيتىپ، جۇرتشىلىقتىڭ شاعىمدانۋ ارناسىن ىركىلىكسىزدەندىرىپ، ”كۇندەلىكتى تەكسەرۋ + تۇتقيىل تەكسەرۋ + پاراساتتى باقىلاۋ“ سىندى ءادىستى ۇشتاستىرۋ ارقىلى، جەلىلىك اس – سۋ سالاسىنداعى ازىق - تۇلىك حاۋىپسىزدىگىن باقىلاۋ - باسقارۋ تەبىنىن ارتتىرىپ، جۇرتشىلىقتىڭ ”ءتىل ۇشىنداعى حاۋىپسىزدىگىن“ قورعايتىنىن ءبىلدىردى.

تىلشىلەر: جاڭ شياۋچىڭ، ۋاڭ فەي، ياڭ چىن

كەلۋ قاينارى: حالىق تورابى