«شي جينپيڭ ەل باسقارۋ جونىندە» 5 - تومىنىڭ اعىلشىن تىلىندەگى باسىلىمىنىڭ جۇڭگو - مالايزيا وقىرماندار ءماجىلىسى كۋالا - لۋمپۋردا وتكىزىلدى

شينحۋا اگەنتتىگىنىڭ 4 - ايدىڭ 30 - كۇنى كۋالا − لۋمپۋردان بەرگەن حابارى (تىلشىلەر حى گۋاڭحاي، يۋان رۇي). «شي جينپيڭ ەل باسقارۋ جونىندە» 5 - تومىنىڭ اعىلشىن تىلىندەگى باسىلىمىنىڭ جۇڭگو − مالايزيا وقىرماندار ءماجىلىسى 4 - ايدىڭ 30 - كۇنى مالايزيانىڭ استاناسى كۋالا − لۋمپۋردا وتكىزىلدى.

ماجىلىسكە قاتىناسقان قايراتكەرلەر بىلاي دەپ قارادى: ءتوراعا شي جينپيڭنىڭ ماڭىزدى شىعارمالارى شىعىستىڭ اقىل - پاراساتىنا ۋاكىلدىك ەتەتىن ۇلى دامۋ تاجىريبەسى مەن باسقارۋ ۇستانىمىن ارقالاعان، اسىرەسە، قازىرگى وڭىرلىك ساياسي جاعداي كۇردەلى دە قۇبىلمالى، الەمدىك باسقارۋ جۇيەسى تەرەڭ وزگەرىسكە ۇشىراعان جاعدايدا، جۇڭگو مەن مالايزيا شىعارمالاردى تاراتۋ ارقىلى ەل باسقارۋ تاجىريبەلەرى جونىندە ىشكەرىلەي اۋىس - كۇيىس جاسادى، بۇل جۇڭگو مەن مالايزيانىڭ دوستىعىن، ءوزارا سەنىمدىلىگىن جانە ءوزارا پايدا جەتكىزىپ تەڭ يگىلىككە كەنەلۋىن تەرەڭدەتىپ، جوعارى دەڭگەيدەگى ستراتەگيالىق سيپاتتى جۇڭگو − مالايزيا تاعدىرلاس ورتاق تۇلعاسىن قۇرۋدى ىلگەرىلەتۋدە ماڭىزدى ءمان الادى.

مالايزيا پارلامەنتى تومەنگى پالاتاسىنىڭ باستىعى زوحاري ارناۋ سوزىندە بىلاي دەدى: «شي جينپيڭ ەل باسقارۋ جونىندەدە» جۇڭگونىڭ دامۋ ۇستانىمى، كەلەلى ستراتەگياسى، سونداي - اق الەمدىك جاعدايداعى ورنى تۇسىندىرىلگەن، وقىرمانداردىڭ جۇڭگو ساياساتىنىڭ استارىنداعى يدەيالىق لوگيكانى اناعۇرلىم ىشكەرىلەي تۇسىنۋىنە ءتيىمدى. مالايزيا جونىنەن العاندا، بۇل جۇڭگونى ءتۇسىنۋدىڭ تەرەزەسى عانا ەمەس، ونان دا ماڭىزدىسى، ەكى جاق قارىم - قاتىناسىنىڭ ورنىقتى قاداممەن الىسقا جەتۋىن ىلگەرىلەتۋدىڭ ماڭىزدى نەگىزى. ەكى جاقتىڭ وقىرماندار ءماجىلىسى سياقتى اۋىس - كۇيىس قيمىلدارىندا كوزقاراس اۋىستىرىپ، ءتۇسىنىسۋدى تەرەڭدەتىپ، سەلبەستىكتى بەكەمدەپ، مالايزيا − جۇڭگو قارىم - قاتىناسىنىڭ بولاشاق دامۋىنا دەم بەرۋىن ءۇمىت ەتەمىن.

مالايزيا قاتىناس مينيسترى لۋ جاۋفۋ مىنالاردى ءبىلدىردى: «شي جينپيڭ ەل باسقارۋ جونىندەنىڭ» 5 - تومىنداعى جوعارى ساپالى دامۋ، جوعارى دەڭگەيدە سىرتقا ەسىك اشۋ جانە ”ءبىر بەلدەۋ، ءبىر جولدى“ بىرگە قۇرۋ سياقتىلار جونىندەگى ماڭىزدى بايىمداۋلار مالايزيا مەن جۇڭگونىڭ ۇلاسۋىن، تۇتاسۋىن تەرەڭدەتۋ جونىنەن ماڭىزدى وي سالادى. جۋىقتاعى جىلدارى مالايزيا مەن جۇڭگو ”ءبىر بەلدەۋ، ءبىر جولدى“ جوعارى ساپالى بىرگە قۇرۋ جاعىندا كورنەكتى ناتيجەگە قول جەتكىزدى، مالايزيا جاق جۇڭگو جاقپەن ءار سالاداعى اۋىس - كۇيىستى، سەلبەستىكتى ۇزدىكسىز تەرەڭدەتۋدى قالايدى. ول تاعى ءوزىنىڭ جۇڭگودا ساپاردا بولعان كەزىندە، جۇڭگونىڭ كۇشتى شوعىرلاندىرا وتىرىپ ءىرى ىستەر ىستەۋ ارقىلى مەملەكەتتىڭ دامۋىن، گۇلدەنۋىن جەبەيتىن باسقارۋ ارتىقشىلىعىن تەرەڭ سەزىنگەندىگىن ايتتى.

مالايزيا شىعىس وڭتۇستىك ازيا قوعامدىق عىلىمدار زەرتتەۋ ورتالىعىنىڭ ءتوراعاسى لياڭ جىحۋا مىنالاردى ءبىلدىردى: «شي جينپيڭ ەل باسقارۋ جونىندەدە» جۇڭگونىڭ ەكونوميكالىق، قوعامدىق دامۋى مەن جۇڭگونىڭ دۇنيە جۇزىمەن قارىم - قاتىناسىنىڭ ساياسي فيلوسوفياسى قامتىلعان، مالايزيا مەن جۇڭگونىڭ سەلبەستىگىنىڭ تەرەڭدەۋىنە، ناقتىلانۋىنا ماڭىزدى نەگىز قالادى. «وڭىرلىك جالپى بەتتىك ەكونوميكالىق سەرىكتەستىك قارىم - قاتىناس كەلىسىمىنىڭ» ىشكەرىلەي اتقارىلۋىنا جانە جۇڭگو − شىعىس وڭتۇستىك ازيا ەلدەرى وداعى ەركىن ساۋدا رايونىنىڭ 0. 3 نۇسقاسىنىڭ ىلگەرىلۋىنە بايلانىستى مالايزيا − جۇڭگو قارىم - قاتىناسى جۇيەلى سايكەسۋگە قاراي دارەجەسىن جوعارىلاتۋدىڭ جاڭا كەزەڭىنە ويىسۋدا، ەكى جاقتىڭ ەكونوميكا - ساۋدا، قارجى قوسۋ، سيفرلى ەكونوميكا، جاسىل دامۋ سياقتى سالالارداعى سەلبەستىگىنىڭ بولاشاعى نۇرلى.

قيمىلدا جۇڭگو جاق شەتەلدىك سيلى قوناقتارعا «شي جينپيڭ ەل باسقارۋ جونىندە» 5 - تومىنىڭ اعىلشىن تىلىندەگى باسىلىمىن تارتۋ ەتتى. ماجىلىسكە قاتىناسقان ماماندار مەملەكەتتى باسقارۋ، جۇڭگو − شىعىس وڭتۇستىك ازيا ەلدەرى وداعى وڭىرلىك سەلبەستىگى، جۇڭگو - مالايزيا تاعدىرلاس ورتاق تۇلعاسى سياقتى كەڭەستىك تاقىرىپتار توڭىرەگىندە پىكىر اۋىستىرىپ، زەرتتەۋ - تالقى جۇرگىزدى.

وسى رەتكى قيمىلدى جۇڭگو مەملەكەتتىك كەڭەسىنىڭ اقپارات كەڭسەسى، جۇڭگو شەتەل تىلىندە باسىلىمدار شىعارۋ جانە تاراتۋ مەكەمەسى، سونداي - اق جۇڭگونىڭ مالايزيادا تۇراتىن باس ەلشىلىگى ۇيىمداستىردى، جۇڭگو مەن مالايزيا ەكى ەلدىڭ باسپا ءسوز، اقىل - پاراسات قويماسى، مەديا سياقتى ءار سالا قايراتكەرلەرىنەن 200دەي ادام قيمىلعا قاتىناستى.