6 - ايدىڭ 1 - كۇنىنەن باستاپ، شينجياڭداعى وسى توتە اۋە لەنياسى رەسمي قالپىنا كەلتىرىلەدى 

6 - ايدىڭ 1 - كۇنىنەن باستاپ، فلايارىستان اۆياتسياسىنىڭ ءۇرىمجى - استانا اراسىنداعى توتە اۋە لەنياسى رەسمي قالپىنا كەلتىرىلەدى.

اۋە لەنياسى جوسپارىنا نەگىزدەلگەندە، 6 - ايدىڭ 1 - كۇنىنەن 10 - ايدىڭ 23 - كۇنىنە دەيىن، اتالعان اۋە لەنياسىندا ءار اپتانىڭ دۇيسەنبى، سارسەنبى، جۇما كۇندەرى ءبىر رەت ۇشاق قاتىنايدى.

بۇل جولى ءۇرىمجى - استانا اۋە لەنياسىنىڭ قالپىنا كەلتىرىلۋى، جولاۋشىلاردىڭ ساپارعا شىعۋ قاجەتىنە سايكەسۋ ءارى فلايارىستان اۆياتسياسىنىڭ جۇڭگو بازارىن ۇزدىكسىز ىشكەرىلەي اشۋىنداعى، اۋە لەنياسى تورىن كەمەلدەندىرۋىندەگى ماڭىزدى شاراسى بولىپ تابىلادى.

قازاقستان مەن جۇڭگونىڭ شينجياڭىن بايلانىستىراتىن ماڭىزدى اۋە ارناسى رەتىندە، بۇل اۋە لەنياسى قالپىنا كەلتىرىلىپ تيجارات جۇرگىزگەننەن كەيىن، ءۇرىمجى حالىقارالىق اۆياتسيالىق توراپ ورتالىعىنىڭ ىقپال جاساۋ قۋاتىن اناعۇرلىم كۇشەيتىپ، قازاقستان مەن جۇڭگو ەكى ەلدىڭ ەكونوميكا - ساۋدا سەلبەستىگى، مادەنيەت اۋىس - كۇيىسى، ادامداردىڭ بارىس - كەلىسى ءۇشىن اناعۇرلىم جوعارى ءونىمدى، قولايلى اۋە كوپىرىن قالىپتاستىرادى.

شينجياڭ اۋەجايى (توبى) شەكتى جاۋاپكەرشىلىك سەرىكتەستىگى ءارقايسى اۆياتسيالىق سەرىكتەستىكتەرمەن ۇزدىكسىز سەلبەسىپ، اۋە لەنياسى تورابىن ورنالاستىرۋدى ساپالىلاندىرىپ، توراپ ورتالىعىنىڭ تيجاراتتىق قامتاماسىزداندىرۋ دەڭگەيى مەن جولاۋشىلارعا قىزمەت وتەۋ ساپاسىن جاپپاي جوعارىلاتىپ، ءۇرىمجى حالىقارالىق اۆياتسيالىق توراپ ورتالىعى قۇرىلىسىنا دەم بەرىپ، جىبەك جولى ەكونوميكالىق بەلدەۋى وزەكتى رايونىنداعى ەلدەردىڭ ەكونوميكا - ساۋدا سەلبەستىگى مەن گۋمانيتارلىق اۋىس – كۇيىسىنە بەرىك، قۋاتتى اۆياتسيالىق تىرەك ازىرلەيدى.

كەلۋ قاينارى: حالىق تورابى