شي جينپيڭ برۋنەيدىڭ پاتشا مۇراگەرى بيللاحپەن كەزدەستى

5 - ايدىڭ 12 - كۇنى تۇستەن كەيىن مەملەكەت ءتوراعاسى شي جينپيڭ بەيجيڭدەگى حالىق سارايىندا جۇڭگوعا رەسمي ساپارمەن كەلگەن برۋنەيدىڭ پاتشا مۇراگەرى بيللاحپەن كەزدەستى.

سۋرەتتى شينحۋا اگەنتتىگىنىڭ ءتىلشىسى حۋاڭ جيڭۋىن تۇسىرگەن

شينحۋا اگەنتتىگى، 5 - ايدىڭ 12 - كۇنى، بەيجيڭ (ءتىلشى ۋىن شين). 5 - ايدىڭ 12 - كۇنى تۇستەن كەيىن مەملەكەت ءتوراعاسى شي جينپيڭ حالىق سارايىندا جۇڭگوعا رەسمي ساپارمەن كەلگەن برۋنەيدىڭ پاتشا مۇراگەرى بيللاحپەن كەزدەستى.

شي جينپيڭ بىلاي دەپ اتاپ كورسەتتى: جۇڭگو مەن برۋنەي _ تاتۋ كورشى ەلدەر، تەڭىزدەگى جىبەك جولى ەكى ەلدى تىعىز بايلانىستىرادى. جۇڭگو - برۋنەي سەلبەستىگى ەكى ەل حالقىنا ناقتى پايدا جەتكىزۋمەن بىرگە، ۇلكەندى - كىشىلى ەلدەردىڭ تەڭ تۇرعىدا مامىلە جاساۋىنىڭ، سەلبەسىپ تەڭ يگىلىككە كەنەلۋىنىڭ ۇلگىسىن ورناتتى. بىلتىر حاساننار سۇلتان ەكەۋىمىز جۇڭگو - برۋنەي تاعدىرلاس ورتاق تۇلعاسىن قۇرۋ جونىندە ماڭىزدى ورتاق تانىمعا كەلىپ، ەكى جاقتى قارىم - قاتىناستىڭ شىت جاڭا تاراۋىن اشتىق.

بيىل _ جۇڭگو مەن برۋنەيدىڭ ديپلوماتيالىق قارىم - قاتىناس ورناتقاندىعىنىڭ 35 جىلدىعى. اۋمالى - توكپەلى حالىقارالىق جاعداي الدىندا، ەكى جاق جۇڭگو - برۋنەي تاعدىرلاس ورتاق تۇلعاسىن قۇرۋدى جەتەكشى ەتىپ، ستراتەگيالىق تىلدەسۋدى كۇشەيتىپ، ناقتى سەلبەستىكتى تەرەڭدەتىپ، ءوڭىردىڭ بەيبىتشىلىگى مەن ورنىقتىلىعىنا اناعۇرلىم كوپ وڭ ەنەرگيا قوسۋى كەرەك.

شي جينپيڭ بىلاي دەپ باسا دارىپتەدى: بيىل _ جۇڭگونىڭ ”15 - بەسجىلدىق“ جوباسىنىڭ باستاما جىلى، برۋنەي ”2035 - جىلعا دەيىنگى ۇلى ارمانعا“ قاراي ۇدەرە العا تارتۋدا، ەكى جاق وسىنى سايكەسۋ ءتۇيىنى ەتىپ، جۇڭگو - برۋنەي سەلبەستىگىنىڭ تىڭ ساتىعا كوتەرىلۋىن ىلگەرىلەتۋى كەرەك. ءبىرىنشى، ءبىر - بىرىنە ايرىقشا سەنىم ارتاتىن ستراتەگيالىق سەرىك بولىپ، ءبىر - ءبىرىن ۇزدىكسىز تاباندىلىقپەن قولداپ، ءار سالاداعى اۋىس - كۇيىستى، سەلبەستىكتى ءبىر تۇتاس جوسپارلاپ ىلگەرىلەتۋ كەرەك. ەكىنشى، ءوزارا پايدا جەتكىزىپ، تەڭ يگىلىككە كەنەلەتىن دامۋ سەرىگى بولىپ، كەلەلى باستاماشى سەلبەستىك نىساندارىن ىلگەرىلەتىپ، جاساندى زەردە، سيفرلى ەكونوميكا سياقتى جاڭادان گۇلدەنگەن سالالارداعى سەلبەستىكتى كەڭەيتۋ كەرەك. ءۇشىنشى، ءوزارا تۇسىنىسەتىن، ەتەنە وركەنيەت سەرىكتەرى بولىپ، دۇنيە جۇزىلىك وركەنيەت باستاماسىن بىرگە امالياتتا ايگىلەپ، گۋمانيتارلىق اۋىس - كۇيىستى جيىلەتىپ، حالىق تىلەگىنىڭ توعىسۋىنداعى جاڭا كورىنەۋ تۇيىندەردى قالىپتاستىرۋ كەرەك. ءتورتىنشى، دۇنيە جۇزىلىك جونگە سالۋدىڭ سەلبەستىك سەرىگى بولىپ، شىعىس وڭتۇستىك ازيا وداعىنداعى ەلدەرمەن بىرگە، اناعۇرلىم تىعىز جۇڭگو - شىعىس وڭتۇستىك ازيا ەلدەرى وداعىنىڭ تاعدىرلاس ورتاق تۇلعاسىن قۇرۋدى ىلگەرىلەتىپ، ءوز ءوڭىرىن عاسىرلىق وزگەرىس بارىسىنداعى بەيبىتشىلىك، ورنىقتىلىق جانە دامۋ، گۇلدەنۋدىڭ ۇلگى تۇعىرى ەتىپ قۇرىپ شىعۋ كەرەك.

بيللاح حاساننار سۇلتاننىڭ ءتوراعا شي جينپيڭگە جولداعان ىقىلاستى سالەمىن جەتكىزدى. بيللاح مىنالاردى ءبىلدىردى: جۇڭگو _ برۋنەيدىڭ ۇزاق ۋاقىتتىق دوسى، ەكى ەل حالقىنىڭ دوستىعى تەرەڭ. برۋنەي جاق ءبىر جۇڭگو ساياساتىن باتىل اتقارادى، جۇڭگو جاقپەن ەكى ەلدىڭ مەملەكەت باسشىلارى تۇراقتاندىرعان تاعدىرلاس ورتاق تۇلعا قۇرۋ تىلەگىن بىرگە ىلگەرىلەتىپ، ستراتەگيالىق سەلبەستىك سەرىكتەستىك قارىم - قاتىناستى تەرەڭدەتىپ، جوعارى جىكتەگىلەردىڭ ءجيى بارىس - كەلىسىن ساقتاپ، ساۋدا، قارجى قوسۋ سەلبەستىگىن كۇشەيتىپ، ەكى جاق حالقىن باقىتقا كەنەلتۋدى قالايدى. ءتوراعا شي جينپيڭنىڭ دانىشپان باسشىلىعىندا جۇڭگونىڭ ەكونوميكالىق، قوعامدىق دامۋىندا قول جەتكەن تابىستارى كۇللى دۇنيە ءجۇزىن جالت قاراتتى. جۇڭگونىڭ ”15 - بەسجىلدىق“ جوبانى ءساتتى اتقارىپ، اناعۇرلىم زور دامۋعا قول جەتكىزەتىندىگىنە سەنەمىن. جۇڭگو دۇنيە ءجۇزىنىڭ بەيبىتشىلىگى مەن ورنىقتىلىعىن جەبەۋدە، كوپ جاقتىلىقتى جانە حالىقارالىق ءتارتىپتى قورعاۋدا شەشۋشى رول اتقاردى، برۋنەي جاق ءتوراعا شي جينپيڭ العا قويعان ادامزاتتىڭ تاعدىرلاس ورتاق تۇلعاسىن قۇرۋ ۇستانىمى مەن دۇنيە جۇزىلىك جونگە سالۋ باستاماسىن ايرىقشا القايدى. شىعىس وڭتۇستىك ازيا ەلدەرى وداعى مەن جۇڭگونىڭ جان - جاقتى ستراتەگيالىق سەرىكتەستىك قارىم - قاتىناسى وڭىرگە باقىت اكەلەدى، برۋنەي جاق جۇڭگو جاقپەن تىعىز سايكەسىپ، شىعىس وڭتۇستىك ازيا ەلدەرى وداعى مەن جۇڭگونىڭ سەلبەستىگىن تەرەڭدەتىپ، ءوڭىردىڭ گۇلدەنۋى مەن ورنىقتىلىعىن قورعاۋدى ءۇمىت ەتەدى.

ۋاڭ ي كەزدەسۋدە بىرگە بولدى.

كەلۋ قاينارى: حالىق تورابى