قوعام حاۋىپسىزدىگى مينيسترلىگى قاتىناس باسقارۋ مەڭگەرمەسى ەسكەرتۋ جاريالادى 

جۋىردا جوعارى قارقىندى تاس جولدا تۇندە جۇرگەندە كوپ ادام قازا بولعان جانە جارالانعان قاتىناس شىرعالاڭى ۇزدىكسىز تۋىلعاندىقتان، قوعام حاۋىپسىزدىگى مينيسترلىگى قاتىناس باسقارۋ مەڭگەرمەسى 5 - ايدىڭ 12 - كۇنى بارشا اۆتوموبيل جۇرگىزۋشىلەرگە مىنانى ەسكەرتتى: تۇندە جوعارى قارقىندى تاس جولدا اۆتوموبيل جۇرگىزگەندە نازاردى شوعىرلاندىرىپ، ابايلاپ جۇرگىزگەن ءجون.

قوعام حاۋىپسىزدىگى مينيسترلىگى قاتىناس باسقارۋ مەڭگەرمەسىنىڭ جاريالاۋىنشا، 5 - ايدىڭ 7 - كۇنى ساعات 0 دەن 5 مينۋت وتكەندە، ءبىر اۋىر تيپتى جارتىلاي تىركەمەلى اۆتوموبيل بەيجيڭ - حاربين جوعارى قارقىندى تاس جولىمەن شىعىستان باتىسقا قاراي ءجۇرىپ، حىبەي ولكەسىندەگى چينحۋاڭداۋدىڭ ماڭىنا كەلگەندە، الدىڭعى جاقتاعى شۇعىل جاعدايدا پايدالاناتىن جولدان اۆتوموبيل جولىنا ەندى كىرىپ، باياۋ قارقىنمەن جۇرگەن شاعىن جولاۋشىلار اۆتوموبيلىنە سوعىلىسپ، 3 ادام قازا بولىپ، 2 ادام جارالانعان.

5 - ايدىڭ 7 - كۇنى ساعات 0 دە 25 مينۋت وتكەندە، ءبىر شاعىن جولاۋشىلار اۆتوموبيلى داچيڭ - گۋاڭجوۋ جوعارى قارقىندى تاس جولىمەن وڭتۇستىكتەن سولتۇستىككە قاراي ءجۇرىپ، بەيجيڭ قالاسى داشيڭ رايونىنداعى يۇڭديڭحى كوپىرى ماڭىنا كەلگەندە، الدىڭعى جاقتا كەزەك كۇتىپ توقتاپ تۇرعان اۋىر تيپتەگى جارتىلاي تىركەمەلى اۆتوموبيلگە سوعىلىسپ، 4 ادام قازا بولىپ، ءبىر ادام جارالانعان.

5 - ايدىڭ 8 - كۇنى ساعات 21 دە 33 مينۋت وتكەندە، ءبىر اۋىر تيپتەگى جارتىلاي تىركەمەلى اۆتوموبيل ۋحى – بوجوۋ جوعارى قارقىندى تاس جولىمەن باتىستان شىعىسقا قاراي ءجۇرىپ، انحۇي ولكەسى بوجوۋ قالاسى چياۋچىڭ رايونى ماڭىنداعى جول بولىگىنە كەلگەندە، الدىڭعى جاقتاعى تەلەفون قابىلداۋ ءۇشىن اۆتوموبيل جولىنا توقتاعان شاعىن جولاۋشىلار اۆتوموبيلىمەن سوعىلىسپ، 4 ادام قازا بولىپ، 3 ادام جارالانعان.

قوعام حاۋىپسىزدىگى مينيسترلىگى قاتىناس باسقارۋ مەڭگەرمەسى مىنانى ەسكەرتتى: تۇندە جوعارى قارقىندى تاس جولدا اۆتوموبيل جۇرگىزگەندە شوفەر وڭاي شارشايدى، بايقاۋ قۋاتى دا السىرەيدى، سونىمەن بىرگە كورۋ اياسى شەكتەمەگە ۇشىرايتىندىقتان، شىرعالاڭ وڭاي تۋىلادى.

• تۇندە جوعارى قارقىندى تاس جولدا اۆتوموبيل جۇرگىزگەندە، نازاردى شوعىرلاندىرىپ، ءسات سايىن الدى - ارتىنداعى اۆتوموبيلدەردى بايقاپ، ”قارقىندى تەجەۋ، ارالىق ساقتاۋ، شىراقتى ۇيلەسىمدى پايدالانۋ، جول اۋىستىرۋدا ابايلاۋ“ پرينسيبىن ورىنداپ، شارشاعاندا اۆتوموبيل جۇرگىزۋدەن، اۆتوموبيل جۇرگىزگەندە نازاردى وزگەگە اۋدارۋدان، اۆتوموبيلدى تومەن قارقىنمەن جۇرگىزۋدەن ساقتانۋ كەرەك.

• اينالما جولدان، قىزمەت وتەۋ اۋماعىنان جانە شۇعىل جاعدايدا پايدالاناتىن جولدان، شۇعىل توقتاۋ بەلدەۋىنەن جوعارى قارقىندى تاس جولداعى اۆتوموبيل جولىنا كىرگەندە، ارتقى جاقتى باقىلاۋ ايناسىمەن الدىن الا باقىلاپ، باعىت وزگەرتۋ شىراعىن جاعىپ، اۆتوموبيل جولىنداعى اۆتوموبيلدەردىڭ قالىپتى جۇرۋىنە كەدەرگى كەلتىرمەگەن جاعدايدا تەزدەتىپ كىرۋ كەرەك.

• جوعارى قارقىندى تاس جولدان شىققاندا، الدىن الا ەڭ وڭ جاقتاعى جولعا اۋىسىپ، باعىت وزگەرتۋ شىراعىن جاعىپ، قارقىندى باسەڭدەتىپ شىعۋ كەرەك؛ شىعۋ اۋزىن وتكىزىپ العان جاعدايدا، كەلەسى شىعۋ اۋزىنا دەيىن جالعاستى ءجۇرىپ، سودان كەيىن كەرى بۇرىلىپ قايتۋ كەرەك، شۇعىل تورموزداۋ، كەرى شەگىنۋ نەمەسە قارسى باعىتتا جۇرۋدەن قاتتى ساقتانۋ كەرەك.

كەلۋ قاينارى: حالىق تورابى