مەملەكەت بويىنشا قوعام حاۋىپسىزدىگى ورگاندارى جوعارى مەكتەپ ەمتيحانىنا قاتىستى ينتەرنەتتەگى وسەك - اياڭداردى قاتاڭ تەكسەرىپ، قاتاڭ سوققى بەرەدى 

شينحۋا اگەنتتىگىنىڭ ءتىلشىسى لي ميڭحۇي 6 – ايدىڭ 8 – كۇنى بەيجيڭنەن حابارلايدى. 2026 – جىلعى جوعارى مەكتەپ ەمتيحانى الىندى، ەلىمىز بويىنشا قوعام حاۋىپسىزدىگى ورگاندارى ەڭ جوعارى ولشەم، ەڭ قاتاڭ تالاپ، ەڭ قاتاڭ شارالاردى قولدانىپ، ەمتيحانعا قاتىستى زاڭعا قايشى قىلمىستىق ارەكەتتەردى قاتاڭ تەكسەرىپ، قاتاڭ سوققى بەرىپ، جوعارى مەكتەپ ەمتيحانىنىڭ حاۋىپسىز، ورنىقتى، ءتارتىپتى وتكىزىلۋىن كۇش سالا قورعادى. 6 – ايدىڭ 8 – كۇنى، قوعام حاۋىپسىزدىك مينيسترلىگى ينتەرنەت حاۋىپسىزدىگى مەڭگەرمەسى جوعارى مەكتەپ ەمتيحانىنا قاتىستى ينتەرنەتتەگى وسەك – اياڭدارعا ساياتىن تيپتىك 10 دەلونى جاريالاپ، جوعارى مەكتەپ ەمتيحانىنىڭ جۇرت نازارىن اۋدارىپ وتىرعانىنان پايدالانىپ، جۇرتتىڭ نازارىن باۋراپ، كورەرمەن جيناۋدى ويلاعانداردىڭ بارلىعىنا ساقتىق دابىلىن قاقتى.

تيپتىك دەلولاردىڭ جاعدايىنان الىپ قاراعاندا، ءبىر ءبولىم زاڭسىز ەلەمەنتتەر جوعارى مەكتەپ ەمتيحانىنىڭ قوعامداعىلاردىڭ نازارىن ەرەكشە اۋدارۋى سىندى ەرەكشەلىگىنەن پايدالانىپ، AI قۇرالى ارقىلى جالعان ينفورماتسيا جاساۋ، ”ىشكى جاقتاعى ارنالاردى“ ويدان قيىستىرۋ قاتارلى تاسىلدەرمەن كورىلىمگە يە بولىپ، كورەرمەننىڭ نازارىن باۋراپ، جۇرتشىلىقتى بارىنشا الجاستىرىپ، قالىپتى ەمتيحان ءتارتىبىن بۇلدىرەدى.

AI تەحنولوگياسىنان پايدالانىپ جالعان ينفورماتسيا جاساۋ. گۋاڭدۇڭ ولكەسى چاۋجوۋ قالاسىنداعى شىن Xحۇڭنىڭ دەلوسىندا، شىن Xحۇڭ AI قۇرالىن پايدالانىپ ”2026 – جىلعى جوعارى مەكتەپ ەمتيحانىندا وتىرىپ، قول تەلەفونمەن ەمتيحان ورنىن كەسكىنگە ءتۇسىرىپ جاتقان“ جالعان سۋرەتتى جاساعان ءارى وعان ”الىپ كىرگەن ەكەنمىن، ەندەشە دوۋينعا دا جولداي سالايىن“ دەگەن ءسوزدى قوسىپ جاريالاپ، كوپتەگەن توراپتاستاردى الجاستىرعان. حىنان ولكەسى جۋماديان قالاسىنداعى ۋ Xشۋايدىڭ دەلوسىندا، ۋ Xشۋاي AI قۇرالىن پايدالانىپ ”2026 – جىلعى ادەتتەگى جوعارى مەكتەپكە وقۋشى قابىلداۋ مەملەكەتتىك ءبىرتۇتاس ەمتيحانىنىڭ ءتىل – ادەبيەت ەمتيحانى قاعازىنىڭ“ سۋرەتىن جالعاننان جاساعان ءارى ينتەرنەت تەكشەسىندە جاريالاپ، كوپتەگەن توراپتاستاردى الجاستىرعان، توراپتاستار بۇل ىسكە نازار اۋدارعان ءارى تالقىلاعان.

”ىشكى جاقتاعى ارنالاردى“ ويدان قيىستىرۋ. حۋنان ولكەسى لەيياڭ قالاسىنداعى ليۋ Xتاۋدىڭ دەلوسىندا، ليۋ Xتاۋ ينتەرنەت تەكشەسىندە وزىندە ”جوعارى مەكتەپ ەمتيحانىنىڭ جاۋابى“ بار ەكەنىن ءارى ونى ساتاتىنىن ايتقان، وسى ارقىلى كوپتەگەن توراپتاستاردى الجاستىرعان، توراپتاستار بۇل ىسكە نازار اۋدارعان ءارى تالقىلاعان، بۇل ءىس قوعامدا ناشار ىقپال تۋدىرعان.

كەزەكتە، اتالعان زاڭعا قايشى ارەكەتتەرگە باعىتتاي وتىرىپ، جەرگىلىكتى قوعام حاۋىپسىزدىگى ورگاندارى قاتىستى زاڭ – ەرەجەلەرگە ساي، قاتىستى ادامداردى اكىمشىلىك جاقتان جازالاعان.

قوعام حاۋىپسىزدىگى مينيسترلىگى ينتەرنەت حاۋىپسىزدىگى مەڭگەرمەسى مىنانى ەسكەرتەدى: ينتەرنەت كەڭىستىگى زاڭنان تىس جەر ەمەس، جالعان ينفورماتسيا جاساۋشىلار، تاراتۋشىلار سايكەستى زاڭدىق جاۋاپكەرشىلىك ارقالايدى. جوعارى مەكتەپ ەمتيحانى وقۋ – اعارتۋدىڭ ادىلدىگى مەن قوعامدىق ادىلدىككە ساياتىن ءىس، ءارقانداي ادامنىڭ ينتەرنەتتەن پايدالانىپ وسەك – اياڭ تاراتۋىنا، ەمتيحان ءتارتىبىن بۇلدىرۋىنە بولمايدى. بارشا توراپتاستاردىڭ وسەك - اياڭ قۇراستىرماۋىن، وسەك - اياڭعا سەنبەۋىن، وسەك - اياڭ تاراتپاۋىن، پاك، جاراسىمدى، مەيىرگە تولى ەمتيحان ورتاسىن بىرگە جاراتۋىن ءۇمىت ەتەمىز.

كەلۋ قاينارى: حالىق تورابى