جاڭادان قارجىنى باقىلاۋ - مەڭگەرۋ شارالارى قوسىلدى، ينفورماتسيا اۋىستىرۋ مەحانيزمى ورناتىلدى

جاڭا جاعدايداعى جالعامالاپ ساتۋعا سوققى بەرۋ، جونگە سالۋ قىزمەتىنىڭ قاجەتىنە سايكەسىپ، تابيعي تۇلعالاردىڭ، زاڭدىق تۇلعالاردىڭ جانە زاڭدىق تۇلعاعا جاتپايتىن ۇيىمداردىڭ زاڭدى ۇقىق ـ مۇددەسىن، بازار ءتارتىبى مەن قوعامنىڭ ورنىقتىلىعىن قورعاۋ ءۇشىن، مەملەكەتتىك بازاردى باقىلاۋ ـ باسقارۋ باس مەكەمەسى تاياۋدا «جالعامالاپ ساتۋعا تيىم سالۋ ەرەجەسى (وزگەرىس ەنگىزىلگەن پىكىر الۋ نۇسقاسى)» (تومەندە قىسقارتىلىپ «پىكىر الۋ نۇسقاسى» دەلىنەدى) جونىندە قوعامنان اشىق پىكىر الدى. وسى رەتكى اشىق پىكىر الۋ ۋاقىتى 2026 – جىلى 5 – ايدىڭ 29 – كۇنىنەن 6 – ايدىڭ 28 – كۇنىنە دەيىن بولادى.

«پىكىر الۋ نۇسقاسىنداعى» بەلگىلەمەگە نەگىزدەلگەندە، جالعامالاپ ساتۋدى ۇيىمداستىرعان، جوسپارلاعان زاڭدىق تۇلعالاردىڭ، زاڭدىق تۇلعاعا جاتپايتىن ۇيىمداردىڭ زاڭدىق ۋاكىلدەرىنىڭ، جاۋاپتىلارىنىڭ، تىكەلەي جاۋاپتى باسقارۋشىلارىنىڭ جانە باسقا دا تىكەلەي جاۋاپكەرشىلىگى بارلارىنىڭ جازا ۇيعارىمى شىعارىلعان كۇننەن باستاپ 3 جىل ىشىندە ءارقانداي تيجارات تۇلعالارىندا زاڭدىق ۋاكىل، جاۋاپتى، جورا، باقىلاۋشى جانە جوعارى دارەجەلى باسقارۋشى بولۋىنا بولمايدى.

«پىكىر الۋ نۇسقاسىندا» قارجىنى باقىلاۋ - مەڭگەرۋ شارالارى تىڭنان قوسىلىپ، حالىق بانكەسى، فينانستى باقىلاۋ - باسقارۋ تاراۋلارى فينانس قۇرىلىمدارى مەن بانكەگە جاتپايتىن اقشا تولەۋ قۇرىلىمدارىنىڭ جالعامالاپ ساتۋ كۇمانى تاعىلعان قارجىنى باقىلاۋ - تەكسەرۋ قىزمەتىن كۇشەيتۋىنە قۋزاۋشىلىق ەتۋى جانە جەتەكشىلىك ەتۋى ءارى بازاردى باقىلاۋ - باسقارۋ تاراۋلارىمەن، قوعام حاۋىپسىزدىگى ورگاندارىمەن ينفورماتسيا اۋىستىرۋ مەحانيزمىن ورناتۋى كەرەك دەپ بەلگىلەندى. سونىمەن بىرگە، ولكەلىك، اۆتونوميالى رايوندىق، توتە قاراستى قالالىق حالىق ۇكىمەتتەرىنىڭ ءوز اكىمشىلىك وڭىرلەرىندەگى جالعامالاپ ساتۋدان ساقتانۋ جانە ونى جازالاۋ قىزمەتىنە جالپى جاۋاپتى بولۋ مازمۇنى قوسىلىپ، ينتەرنەت ينفورماتسياسى، حابارلاسۋ، فينانستى باقىلاۋ – باسقارۋ قاتارلى قاتىستى تاراۋلار مەن ورىندار جالعامالاپ ساتۋعا سوققى بەرۋگە قاتىستى تاراۋلار قاتارىنا قوسىلدى.

كەلۋ قاينارى: حالىق تورابى