وقۋ – اعارتۋ مينيسترلىگى قاتىستى ارەكەتتەردى ورنالاستىرىپ، جوعارى مەكتەپ بىتىرەتىندەردىڭ ءساتتى تۇردە جۇمىسقا ورنالاسۋىن جەبەدى 

شينحۋا اگەنتتىگىنىڭ ءتىلشىسى ۋاڭ پىڭ 6 – ايدىڭ 8 – كۇنى بەيجيڭنەن حابارلايدى. ءتىلشىنىڭ 6 - ايدىڭ 8 – كۇنى وقۋ – اعارتۋ مينيسترلىگىنەن ۇعىسۋىنشا، مەكتەپ ءبىتىرۋدىڭ الدى – ارتىنداعى جۇمىسقا ورنالاسۋدىڭ شەشۋشى مەزگىلىن مىقتى يگەرىپ، جوعارى مەكتەپ بىتىرەتىندەردىڭ ءساتتى تۇردە جۇمىسقا ورنالاسۋىن كۇش سالا جەبەۋ ءۇشىن، وقۋ – اعارتۋ مينيسترلىگى 6 – ايدان 8 – ايعا دەيىن 2026 – جىلعى جوعارى مەكتەپ بىتىرەتىندەردى جۇمىسقا ورنالاستىرۋ جاعىنداعى ”ءجۇز كۇندىك قۇلشىنىس“ ارەكەتىن ورىستەتۋ جونىندە ورنالاستىرۋ جاساعان.

ساندى مالىمەتتەرگە قاراعاندا، ارەكەت مەزگىلىندە، جەر – جەردەگى جوعارى مەكتەپتەر مەكتەپ اۋلاسىندا جۇمىسقا قابىلداۋ قيمىلىن 4000 نەشە رەت وتكىزۋدى، 5 ميلليوننان استام قىزمەت ورنى ينفورماتسياسىن ازىرلەۋدى جوسپارلاعان. مەملەكەتتىك ستۋدەنتتەردىڭ جۇمىسقا ورنالاسۋىنا قىزمەت وتەۋ تەكشەسى ينتەرنەت ارقىلى جۇمىسقا قابىلداۋ ارناۋلى قيمىلىن 10 نەشە رەت وتكىزىپ، ءبىر ميلليون 500 مىڭنان استام قىزمەت ورنىن شوعىرلاندىرادى.

ۇعىسۋعا قاراعاندا، بۇل جولعى ارەكەتتە «ءجۇز كۇندىك قۇلشىنىس بارىسىندا قايتا كۇش سالىپ، دالمە – ءدال قىزمەت وتەۋ ارقىلى جۇمىسقا ورنالاستىرۋدى جەبەۋ» نەگىزگى تاقىرىپ ەتىلەدى. وقۋ – اعارتۋ مينيسترلىگىنىڭ تالابىنا ساي، ارەكەت مەزگىلىندە، جەر – جەردەگى جوعارى مەكتەپتەر قازىرعى جۇمىسقا ورنالاستىرۋ قىزمەتىنىڭ ءتۇيىندى، قيىن تۇيىندەرىنە نازاردى شوعىرلاندىرىپ، بازارلانعان فورمادا جۇمىسقا ورنالاستىراتىن جۇمىس ورىندارىن كۇش سالا كەڭەيتەدى. جۇمىسقا ورنالاستىرۋدى ىلگەرىلەتۋى باياۋ بولعان ولكەلەرگە، جوعارى مەكتەپتەرگە، پاندىك ماماندىقتار مەن ەكىنشى دارەجەلى فاكۋلتەتتەرگە باعىتتاي وتىرىپ، ادام كۇشى بايلىعى جانە قوعامدىق قامتاماسىزداندىرۋ مەڭگەرمەسىنىڭ (مەكەمەسىنىڭ) باستىعىن، جۇمىسقا ورنالاستىرۋ مەكەمەسىنىڭ باستىعىن ۇيىمداستىرىپ، جوعارى مەكتەپتەرمەن ”دالمە – ءدال“ بەلگىلەپ بايلانىس جاساۋدى ءتۇيىندى تۇردە ورىستەتىپ، «شاعىن ءارى ساپالى، كاسىپتىك ماماندىق جاعىندا ۇزدىك» شۋەيۋاندار مەن فاكۋلتەتتەردە قىزمەتكەر قابىلداۋ قيمىلىن ارناۋلى تۇردە ۇيىمداستىرۋعا كۇش سالادى.

مۇنان سىرت، وقۋ – اعارتۋ مينيسترلىگى جۇمىسقا ورنالاستىرۋ جاعىنداعى ساندى مالىمەتتەردى تىركەۋگە الۋدى قاتاڭ، ويداعىداي ورىستەتۋدى، مەكتەپ بىتىرگەندەردىڭ تاڭداعان باعدارىن تىركەۋگە الۋ ءتۇزىمىن مۇقيات تياناقتاندىرۋدى، قاتىستى بەلگىلەمەلەرگە قايشىلىق جاساعان ورىندار مەن قىزمەتكەرلەردىڭ جاۋاپكەرشىلىگىن قاتاڭ قۋزاستىرۋدى تالاپ ەتتى؛ مەكتەپ بىتىرەتىندردىڭ جۇمىسقا ورنالاسۋ جاعىنداعى ۇقىق – مۇددەسىن شىنايى قورعاپ، ادام كۇشى بايلىعى بازارىنىڭ ءتارتىبىن رەتتەۋ – وڭاۋ ارناۋلى ارەكەتىن ىشكەرىلەي ورىستەتىپ، ”قىزمەتكە قابىلداۋ الدىندا كۋرسقا قاتىناسۋعا قارىز بەرۋ“ سىندى الدامكوستىك، ”اقى تولەۋ ارقىلى ىشكى جاقتا كورسەتۋگە قول جەتكىزۋ“، جۇمىسقا قابىلداۋ تۋرالى جالعان اقپارات، سىناق رەتىندە ىستەتۋ مەرزىمىن الباتى پايدالانۋ قاتارلى زاڭعا قايشى ارەكەتتەرگە قاتاڭ سوققى بەرەدى.

كەلۋ قاينارى: حالىق تورابى