شي جينپيڭ بيرمانىڭ زۇڭتۇڭى مين اڭلايمەن كەڭەس وتكىزدى

6 - ايدىڭ 16 - كۇنى تۇستەن بۇرىن مەملەكەت ءتوراعاسى شي جينپيڭ بەيجيڭدەگى حالىق سارايىندا جۇڭگوعا مەملەكەتتىك ساپارمەن كەلگەن بيرمانىڭ زۇڭتۇڭى مين اڭلايمەن كەڭەس وتكىزدى.

سۋرەتتى شينحۋا اگەنتتىگىنىڭ ءتىلشىسى حۋاڭ جيڭۋىن تۇسىرگەن

6 - ايدىڭ 16 - كۇنى تۇستەن بۇرىن مەملەكەت ءتوراعاسى شي جينپيڭ بەيجيڭدەگى حالىق سارايىندا جۇڭگوعا مەملەكەتتىك ساپارمەن كەلگەن بيرمانىڭ زۇڭتۇڭى مين اڭلايمەن كەڭەس وتكىزدى. سۋرەتتە: كەڭەستەن بۇرىن شي جينپيڭ حالىق سارايىنىڭ سولتۇستىك زالىندا مين اڭلايعا ارناپ قارسى الۋ سالتىن وتكىزۋدە.

سۋرەتتى شينحۋا اگەنتتىگىنىڭ ءتىلشىسى لي شياڭ تۇسىرگەن

شينحۋا اگەنتتىگى، 6 - ايدىڭ 16 - كۇنى، بەيجيڭ (ءتىلشى ما جويان). 6 - ايدىڭ 16 - كۇنى تۇستەن بۇرىن مەملەكەت ءتوراعاسى شي جينپيڭ بەيجيڭدەگى حالىق سارايىندا جۇڭگوعا مەملەكەتتىك ساپارمەن كەلگەن بيرمانىڭ زۇڭتۇڭى مين اڭلايمەن كەڭەس وتكىزدى.

شي جينپيڭ بىلاي دەپ اتاپ كورسەتتى: جۇڭگو مەن بيرمانىڭ باۋىرلاستىق سۇيىسپەنشىلىگى تەرەڭ، ديپلوماتيالىق قاتىناس ورناتقان 76 جىلدان بەرى باستان - اياق ءبىر جاعادان باس، ءبىر جەڭنەن قول شىعارىپ، ءوزارا قارايلاسىپ، بەيبىت قاتار تۇرۋدى بىرگە دارىپتەپ جانە امالياتتا ايگىلەپ، مەملەكەت پەن مەملەكەتتىڭ تەڭ مامىلە جاساۋىنىڭ، ءوزارا پايدا جەتكىزىپ، تەڭ يگىلىككە كەنەلۋىنىڭ ۇلگىسىن ورناتتى.

جۇڭگو جاقىن، ادال، ءتيىمدى، كەشىرىمشىل بولۋ ۇستانىمىن ۇستانىپ، بيرمامەن قاتىناستى دامىتۋدى توڭىرەكتىك ديپلوماتيادا ماڭىزدى ورىنعا قويادى. جۇڭگو ىشكى ىستەرگە كيلىكپەۋ پرينسيپىنە تاباندى بولادى، بيرماعا ۇستانعان دوستىق ساياساتى بيرماداعى بۇكىل حالىققا باعىتتالادى، بيرما جاقتىڭ يەلىك ۇقىعى مەن تەرريتوريا تۇتاستىعىن قورعاۋىن باتىل قولدايدى، بيرما جاڭا ۇكىمەتىنىڭ دامۋ مەن حاۋىپسىزدىكتى ءبىر تۇتاس جوسپارلاپ، مەملەكەت جاعدايىنا ۇيلەسەتىن، حالىق قولدايتىن دۇرىس دامۋ جولىن تابۋىن قولدايدى.

بيىل _ جۇڭگونىڭ ”15 - بەسجىلدىق“ جوباسى باستالاتىن جىل، جۇڭگو جاق بيرما جاقپەن دامۋ تاجىريبەلەرىنەن بىرگە يگىلىكتەنىپ، ساياسيدا دوس، ءوزارا سەنىمدى، دامۋدا ءوزارا پايدا جەتكىزەتىن، حاۋىپسىزدىك جاعىندا سايكەسەتىن، ءبىرىن - ءبىرى جەبەيتىن، گۋمانيتارلىق جاقتا توعىسىپ، ءوزارا ۇلگى الاتىن جۇڭگو - بيرما تاعدىرلاس ورتاق تۇلعاسىن بىرگە قۇرىپ، ەكى ەل حالقىنا اناعۇرلىم مول ىرىس - قۇت اكەلىپ، ءوڭىردىڭ بەيبىتشىلىگى مەن دامۋىنا اناعۇرلىم كوپ ۇلەس قوسۋدى قالايدى.

شي جينپيڭ بىلاي دەپ باسا دارىپتەدى: جۇڭگو _ بيرمانىڭ ورتاق شەكاراسى ەڭ ۇزىن كورشىسى، سەنىم ارتۋعا بولاتىن دوسى جانە سەرىگى. وزگەرىس پەن بىلىقپالىق قاباتتاسقان حالىقارالىق جاعداي الدىندا، ەكى جاق ستراتەگيالىق سەرگەكتىكتى جانە تاباندىلىقتى ساقتاپ، ىنتىماقتى، سەلبەستىكتى كۇشەيتۋى كەرەك. جۇڭگو - بيرما ەكونوميكالىق ءدالىزى _ ەكى ەلدىڭ ”ءبىر بەلدەۋ، ءبىر جولدى“ بىرگە قۇرۋداعى باستاۋشى نىسانى، ەكى جاق حاۋىپسىزدىككە شىنايى كەپىلدىك ەتۋ العى شارتىندا، ءتۇيىندى نىسان قۇرىلىستارىن ورنىقتى قاداممەن ىلگەرىلەتىپ، بيرمانىڭ ەكونوميكانى دامىتۋىنا، حالىق تۇرمىسىن جاقسارتۋىنا دەم بەرۋى كەرەك. جۇڭگو جاق بيرمانىڭ سىلكىنىستەن كەيىنگى قايتا قۇرۋىنا كۇش سالا قولداۋ كورسەتىپ، اناعۇرلىم كوپ ”شاعىن دا كوركەم“ كومەكتى تياناقتاندىرىپ، جۇڭگو مەن بيرمانىڭ ءوزارا ءتيىمدى سەلبەستىك حيكاياسىن بىرگە ويداعىداي بايانداۋدى قالايدى. ەكى جاق ينتەرنەتتە قۇمار ويناۋ، تەلەگراف الدامكوستىگى، ەسىرتكى اتكەزشىلىگى سياقتى قىلمىستىق ارەكەتتەرگە ۇزدىكسىز قاتاڭ سوققى بەرىپ، ەكى ەل حالقىنىڭ مۇددەسى مەن حاۋىپسىزدىگىن شىنايى قورعاۋى كەرەك. جۇڭگو جاق ءار جاقتىڭ بەيبىتشىلىك كەلىسسوزى ارقىلى بەيبىتشىلىك پەن تاتۋلىقتى ىلگەرىلەتىپ، بيرمانىڭ سولتۇستىگىندە باياندى تىنىشتىقتى جۇزەگە اسىرۋدى قولدايدى، بۇل بيرمانىڭ مەملەكەتى مەن حالقىنىڭ ءتۇبىرلى جانە ۇزاق بولاشاقتىق مۇددەسىنە ۇيلەسەدى.

مين اڭلاي بىلاي مىنالاردى ءبىلدىردى: بيرما مەن جۇڭگونىڭ باۋىرلاستىق سۇيىسپەنشىلىگى ارىدان باستاۋ الادى، باستان - اياق ءوزارا كومەكتەسىپ، ءوزارا قولداپ، بەيبىت قاتار تۇرۋدىڭ بەس پرينسيبىنە تاباندى بولىپ، بەرىك تاتۋ كورشىلىك، دوستىق سەرىكتەستىك قاتىناس ورناتىپ، راقاتتا دا، جاپادا دا بىرگە بولاتىن تاعدىرلاس ورتاق تۇلعا قۇرۋدىڭ جاڭا كەزەڭىنە قادام تاستادى.

بيرما جاق جۇڭگو جاقتىڭ ۇزاق ۋاقىتتان بەرى بيرمانىڭ دامۋىنا، ورنىقتىلىعىنا، بەيبىتشىلىگىنە، تاتۋلىعىنا قالتقىسىز قولداۋ كورسەتكەندىگىنە العىس ايتادى، ءبىر جۇڭگو پرينسيبىنە باتىل بويسۇنادى. بيرما جاڭا ۇكىمەتى ەل ءىشىنىڭ بەيبىتشىلىگى مەن دامۋىن بار كۇشپەن ىلگەرىلەتىپ، ءوز جاعدايىنا ۇيلەسەتىن ساياسي ءتۇزىمدى جانە دامۋ جولىن بەلسەنە قاراستىرۋدا. جۇڭگو ”15 - بەسجىلدىق“ جوبانى اتقارۋدى ىلگەرىلەتىپ، بيرمانى قامتىعان ازياداعى كورشى ەلدەرگە ماڭىزدى وراي ازىرلەدى. بيرما جاق جۇڭگو جاقپەن جان - جاقتى سەلبەستىكتى كۇشەيتىپ، بيرما - جۇڭگو ەكونوميكالىق ءدالىزىن بىرگە قۇرىپ، ساۋدا، قارجى قوسۋ دەڭگەيىن جوعارىلاتۋدى ءۇمىت ەتەدى. بيرما جاق بيرماداعى جۇڭگو قارجىلاندىرعان كاسىپورىندار مەن قىزمەتكەرلەردىڭ حاۋىپسىزدىگىنە ايرىقشا ءمان بەرەدى ءارى بار كۇشپەن كەپىلدىك ەتەدى. بيرما جاق جۇڭگو جاقپەن تىعىز سايكەسىپ، ينتەرنەتتە قۇمار ويناۋ، تەلەگراف الدامكوستىگىنە باتىل سوققى بەرىپ، شەكارانىڭ حاۋىپسىزدىگى مەن ورنىقتىلىعىن قورعاۋدى قالايدى.

بيرما جاق ءتوراعا شي جينپيڭ العا قويعان 4 ۇلكەن دۇنيە جۇزىلىك باستامانى بار كۇشپەن قولدايدى، جۇڭگو جاقپەن كوپ جاقتى تىلدەسۋدى، سايكەسۋدى كۇشەيتۋدى قالايدى.

كەڭەستەن كەيىن ەكى ەل مەملەكەت باسشىلارى قاتىناس، حالىق تۇرمىسى سياقتى سالالارداعى كوپ ءتۇرلى سەلبەستىك قۇجاتتارىنا قول قويۋعا بىرگە كۋا بولدى.

كەڭەستەن ىلگەرى شي جينپيڭ حالىق سارايىنىڭ سولتۇستىك زالىندا مين اڭلايعا ارناپ قارسى الۋ سالتىن وتكىزدى.

مين اڭلاي كەلگەن كەزدە قۇرمەت قاراۋىلى ساپ تۇزەپ قۇرمەت ءبىلدىردى. ەكى ەلدىڭ مەملەكەت باسشىلارى پارات مىنبەسىنە شىقتى، اسكەري وركەستر جۇڭگو مەن بيرمانىڭ مەملەكەت اندەرىن ورىندادى، تيان - انمىن الاڭىندا 21 رەت قۇرمەت ساليۋتى اتىلدى. مين اڭلاي شي جينپيڭنىڭ سەرىك بولۋىندا جۇڭگو حالىق ازاتتىق ارمياسىنىڭ قۇرمەت قاراۋىلىن كوزدەن كەشىردى ءارى سالتانات قاتارىن كوردى.

سول كۇنى تۇستە شي جينپيڭ حالىق سارايىنىڭ التىن ءتۇستى زالىندا مين اڭلايعا ارناپ قارسى الۋ قوناعاسىن بەردى.

ۋاڭ ي، ۋاڭ شياۋحۇڭ جوعارىداعى قيمىلدارعا قاتىناستى.