فۋجيان مەن نيڭشيانىڭ سەلبەستىگى سياقتى ءتيىمدى تاجىريبەلەردى قورىتىندىلاپ جانە قولدانىپ، وڭىرلىك دامۋدىڭ سايكەسىمدىلىگىن ۇزدىكسىز كۇشەيتىپ، جالپى حالىقتىڭ بىرگە اۋقاتتانۋىن ىلگەرىلەتۋدە نىق قادام تاستاۋ كەرەك

شينحۋا اگەنتتىگى، 6 - ايدىڭ 17 - كۇنى، بەيجيڭ. جۇڭگو كوممۋنيستىك پارتياسى ورتالىق كوميتەتىنىڭ باس شۋجيى، مەملەكەت ءتوراعاسى، ورتالىق اسكەري ىستەر كوميتەتىنىڭ ءتوراعاسى شي جينپيڭ تاياۋدا شىعىس، باتىس بولىكتەردىڭ سەلبەستىگى قىزمەتىن ۇدايىلاندىرىپ ويداعىداي ىستەۋ جونىندە ماڭىزدى نۇسقاۋ بەرىپ، بىلاي دەپ اتاپ كورسەتتى: شىعىس، باتىس بولىكتەردىڭ سەلبەستىگى ورىستەتىلگەن 30 جىلدان بەرى كەدەيلىكتەن ارىلتۋدان قامال الۋعا دەم بەرۋ، وڭىرلەردىڭ سايكەستى دامۋىن جەبەۋ سياقتى جاقتاردا ماڭىزدى رول اتقاردى، پارتيامىزدىڭ ساياسي ابزالدىعى مەن ەلىمىزدىڭ سوتسياليستىك ءتۇزىمىنىڭ ابزالدىعىن ايگىلەدى.

شي جينپيڭ بىلاي دەپ باسا دارىپتەدى: بيىل − ”15 - بەسجىلدىقتىڭ“ باستاما جىلى ءارى ۇدايىلانعان كومەكتەسۋ - سۇيەمەلدەۋ ورىستەتىلگەن ءبىرىنشى جىل. فۋجيان مەن نيڭشيانىڭ سەلبەستىگى سياقتى پايدالى تاجىريبەلەردى قورىتىندىلاپ جانە قولدانىپ، سەلبەستىك مەحانيزمىن ونان ارى كەمەلدەندىرىپ، سەلبەستىك ءتاسىلىن ساپالىلاندىرىپ، سەلبەستىك سالاسىن كەڭەيتىپ، شىعىس، باتىس بولىكتەردىڭ كاسىپ سالاسىنىڭ ءبىرىن - ءبىرى تولىقتاۋىن، قىزمەتكەرلەردىڭ ءوزارا ىقپالداستىعىن، تەحنيكانى ءوزارا ۇيرەنۋىن، كوزقاراسىن ءوزارا توعىستىرۋىن، ستيلدە ءوزارا ۇلگى الۋىن ىلگەرىلەتىپ، ءوزارا پايدا جەتكىزىپ، تەڭ يگىلىككە كەنەلۋدى، بىرگە دامۋدى جۇزەگە اسىرۋ كەرەك. ءار دارەجەلى پارتكومدار مەن ۇكىمەتتەر ۇدايىلانعان كومەكتەسۋ - سۇيەمەلدەۋ جاۋاپكەرشىلىگىن مۇقيات تياناقتاندىرىپ، كولەمدەنگەن قايتا كەدەيلەسۋ، كەدەيلەسۋ تومەنگى شەگىن باتىل بەكەمدەپ، اۋىل - قىستاقتى جاپپاي گۇلدەندىرۋدى تىڭعىلىقتى ىلگەرىلەتىپ، وڭىرلىك دامۋدىڭ سايكەسىمدىلىگىن ۇزدىكسىز كۇشەيتىپ، جالپى حالىقتىڭ بىرگە اۋقاتتانۋعا نىق قادام تاستاۋىن ىلگەرىلەتۋى كەرەك.

مەملەكەتتىك شىعىس بولىك پەن باتىس بولىكتىڭ سەلبەستىگى قىزمەتى ءماجىلىسى 6 - ايدىڭ 17 - كۇنى نيڭشيانىڭ يىنچۋانىندا اشىلدى.

ماجىلىستە شي جينپيڭنىڭ ماڭىزدى نۇسقاۋى جەتكىزىلدى.

جۇڭگو كوممۋنيستىك پارتياسى ورتالىق كوميتەتى ساياسي بيۋروسىنىڭ مۇشەسى، مەملەكەتتىك كەڭەس زۇڭليىنىڭ ورىنباسارى ليۋ گوجۇڭ ماجىلىسكە قاتىناستى ءارى ءسوز سويلەدى. ول بىلاي دەپ باسا دارىپتەدى: باس شۋجي شي جينپيڭنىڭ ماڭىزدى نۇسقاۋى بيىكتە تۇرىپ الىستى بولجاعان، تەرەڭ ويلى، كۇشتى ساياسي سيپاتقا، يدەيالىق سيپاتقا، جەتەكشىلىك سيپاتقا يە، شىعىس، باتىس بولىكتەردىڭ سەلبەستىگىن ۇدايىلاندىرىپ ويداعىداي ىستەۋدى ءتۇبىرلى تياناقپەن قامدادى، ءسوز جوق، ىشكەرىلەي ۇيرەنىپ، ءتۇسىنىپ، باتىل دايەكتىلەندىرۋ، تياناقتاندىرۋ كەرەك. ساياسي جاۋاپكەرشىلىكتى باستان - اياق بەرىك ارقالاپ، دۇرىس ساياسي ناتيجە كوزقاراسىن بەرىك ورناتىپ جانە امالياتتا ايگىلەپ، فۋجيان مەن نيڭشيانىڭ سەلبەستىگى سياقتى پايدالى تاجىريبەلەردى قورىتىندىلاپ جانە قولدانىپ، شىعىس، باتىس بولىكتەردىڭ كاسىپ سالاسى سەلبەستىگىن، ەڭبەك سەلبەستىگىن تەرەڭدەتىپ، كادر - دارىندىلاردىڭ اۋىس - كۇيىسىن كۇشەيتىپ، عىلىم - تەحنيكا، فينانس سياقتى سەلبەستىكتەردى كەڭەيتىپ، جەرگىلىكتى جاعدايعا قاراي قىزمەتتى جاسامپازدىقپەن ورىستەتىپ، سەلبەستىكتىڭ ساپاسى مەن ونىمدىلىگىن ۇزدىكسىز جوعارىلاتىپ، قوس باعىتتا قۋات ۇستەپ، بىرگە دامۋدى جەبەۋ كەرەك.

ماجىلىستە شىعىس، باتىس بولىكتەردىڭ سەلبەستىگى قىزمەتىنە قاتىستى جاعدايلار حابارلاندىرىلدى. نيڭشيا حۇيزۋ اۆتونوميالى رايونىنىڭ، فۋجيان ولكەسىنىڭ جاۋاپتى جولداستارى فۋجيان مەن نيڭشيانىڭ سەلبەستىك تاجىريبەلەرىن، ادىستەرىن جەكە - جەكە تانىستىردى، بەيجيڭ قالاسىنىڭ، شاڭحاي قالاسىنىڭ، جياڭسۋ ولكەسىنىڭ، گۋاڭدۇڭ ولكەسىنىڭ، سىچۋان ولكەسىنىڭ، گانسۋ ولكەسىنىڭ جاۋاپتى جولداستارى ماجىلىستە ءسوز سويلەدى.

شىعىس، باتىس بولىكتەردىڭ سەلبەستىگى مىندەتىن ۇستىنە العان قاتىستى ولكە، اۆتونوميالى رايون، قالالارداعى جاۋاپتى جولداستار، ورتالىقتىڭ اۋىل - قىستاق قىزمەتىنە باسشىلىق ەتۋ گرۋپپاسىنا ءىشىنارا مۇشە ورىندارداعى جاۋاپتى جولداستار قاتارلىلار ماجىلىسكە قاتىناستى.

كەلۋ قاينارى: حالىق تورابى