كوكقامىر ساحاراسىندا سالت - سانا مادەنيەت قيمىلى مارەسىنە جەتتى

باعداۋلەت باتىربەك ۇلى، تولقىن جايىربەك ۇلى حابارلايدى

2014.08.12 13:14   كەلۋ قاينارى : حالىق تورابى

　　اتاعى التى الاشقا ايگىلى اسەت نايمانباي ۇلى، كۇيشى يگەن كۇرىشباي ۇلى، ءانشى اپپاق انا سياقتى ۇلى تۇلعالاردىڭ ءىزى قالعان كوكقامىر ساحاراسىنىڭ تۋراسۋ جايلاۋىندا ىلە قازاق اۆتونوميالى وبلىسى قۇرىلعاندىعىنىڭ 60 جىلدىعىن قۇتتىقتاۋ جەلىلەس قيمىلدارىنىڭ ءبىرى بولعان قۇلجا اۋدانىنىڭ 9 - كەزەكتى كوكقامىر ساحارا مادەنيەت قيمىلى دابىرالى باستالىپ، مارەسىنە جەتتى.

　　بۇل جولعى قيمىلدا ۇلتىمىزدىڭ قايماعى بۇزىلماعان تۇيەلى كوش مادەنيەتى، بۇركىتشىلەردىڭ دۋماندى قوسىنى، قىز قۋار، كوكبار، بالۋان سياقتى سالت – سانا مادەنيەتى كورەرمەن مەن ساياحاتشىلارعا كورسەتىلىپ، اقىندار ايتىسى مەن ءانشى – كۇيشىلەردىڭ سونى جىرى، اسەم اۋەنى كورەرمەننىڭ قۇلاق قۇرىشىن قاندىردى.

　　2 كۇنگە جالعاسقان بۇل قيمىلدا مال تۇقىمىن ناسىلدەندىرۋ ناتيجەسىن باسەكەلەستىرە كورسەتۋ قيمىلى وتكىزىلىپ، اۋدانداعى مال شارۋاشىلىعىن نەگىز ەتكەن اۋليە، مازار، قاراعاش قاتارلى قازاق اۋىلدارىن نەگىز ەتىپ، ءناسىلدى قوي - سيىرلاردى باعالاپ، باعالانعان مال يەلەرىنە اقشالاي سيلىق تاراتىلدى. سونداي - اق، 10 مىڭ كيلومەترلىك بايگە وتكىزىلدى.

　　اۋداندىق مال - شارۋاشىلىق مەكەمەسى، جوسپارلى تۋىت، عىلىم - تەحنيكا كوميتەتى ورايدى يگەرىپ، مال شارۋاشىلىعىنا قاتىسىتى «جايىلىم زاڭى»، «جابايى اڭداردى قورعاۋ زاڭى» قاتارلى زاڭ - تۇزىمدەردى ۇگىتتەپ، سۇتشىلىك كاسىبىن باسقارۋ، جەم -ءشوپتى عىلمي باسقارۋ، عىلىم - تەحنيكا ارقىلى مال باعىپ - باسقارۋ، ءبىلىم مەنشىگى ۇقىعىن قورعاۋ، اپاتتان ساقتانۋعا قاتىستى ماتەريالدار، ايدىستەن ساقتانۋ قاتارلى كىتاپتار مەن ۇگىت ماتەريالدارىنان مالشىلارعا 18000 نۇسقا تاراتتى. دەنساۋلىق ساقتاۋ سالاسىنان كەلگەن 15 شيپاگەر مەن مامان 500 مالشىنىڭ دەنساۋلىعىن تەگىن تەكسەرىپ، مۇنداعى مالشىلاردىڭ القاۋىنا بولەندى. سۋرەتتە: سالت – سانا مادەنيەت قيمىلىىنان فوتو قيىقتار

　　سۋرەتىن تۇسىرگەن: باعداۋلەت باتىربەك ۇلى

　　كەلۋ قاينارى: حالىق تورابى