العاشقى اقشا قار ءلاززاتى

( فوتو شالقىما) 

ماقالاسىن جازىپ سۋرەتتەرىن تۇسىرگەن باقىتبەك ءجۇمادىل ۇلى

2014.10.30 16:18   كەلۋ قاينارى : حالىق تورابى

　　العاشقى اقشا قار جاۋىپ تاعى ءبىر قىس كەلە جاتقانىن حابارلادى. راس-اۋ， قىس قىتىمىر، قىراۋ قاباق دەيمىز. الايدا قىستىڭ قاھارى تىرشىلىك دۇنيەسىن شىڭايدى. ول ادامزات قانا ەمەس جان-جانۋارلار مەن وسىمدىكتەرگە دەيىنگى تىرشىلىك اتاۋلىنى قاجىرلىلىققا، توزىمدىلىككە باۋليدى. «قىس كورمەگەن جاز قادىرىن بىلمەيدى» دەگەندەي قىس بولماسا كۇلىمدەگەن كوكتەمنىڭ، جايدارى جازدىڭ، قوڭىر كۇزدىڭ قادىر-قاسيەتى قاستەرلەنبەگەن بولار ەدى.

　　قىس سۋرەتى العاشقى قاردان باستالادى. اقشا قار ءوز كوركىمەن، ءوز بوياۋىمەن كوز تارتادى. جازدا جاپىراق جايىپ، الۋان گۇل شەشەك اتاتىن وسىمدىكتەر مەن اعاشتار كۇز سوڭى بولىپ، قىس كەلىسىمەن اق قار بۇركەگەن كۇمىس ساۋكەلەمەن ساندەنەدى. اسقار تاۋ، بايتاق دالا قىس كەلىسىمەن كوكتەمگى گۇل بەدەرىن، جازعى جاسىل وڭىن، كۇزگى التىنمەن اپتالعانداي سارى، القىزىل بوياۋىن تۇتاسىمەن وزگەرتىپ، بىرىڭعاي اق جىبەك ورامالداي كۇمىس رەڭدى اق كورپەسىن ايقارا جامىلادى. اساۋ وزەن، ايدىن كول كوك جالتىر مۇزبەن قۇرسانادى. مىنە بۇل قىستىڭ كوركى. مىنە بۇل العاش جاۋعان كىرشىكسىز اقشا قاردىڭ سىمباتىمەن باستالاتىن شەكسىز قيال الەمى. تابيعاتى سىرلى دا سۇلۋ ىلە اڭعارىنىڭ جەر-جەرىنەن العاش جاۋعان اقشا قاردى قۋالاي فوتو اپپارات كوزىنە ءتۇسىرىپ، وقىرمانعا ۇسىنىلىپ وتىرعان مىنا كۇز سوڭىنداعى العاشقى قار سۋرەتتەرىنە زەر سالساڭىز، العاشقى قاردىڭ اينالانى بوياعان اقشاعي ءتۇسىنىڭ شەكسىز اسەمدىگىن كورەسىز. وسى اسەم تۇسكە زەر سالا قاراپ تۇرىپ، قيال قۇسىڭىزدى ونان ارى شارىقتاتا ويعا باتساڭىز قىس قىراۋىمەن كورىكتى ەكەندىگىن تىلمەن جەتكىزە الماعانىمىزدى ايقىن سەزىنەسىز! ءجا، وندا وسىنداي ءتاتتى سەزىم قۇشاعىنا باتقىڭىز كەلسە، وڭاتىن تاۋىپ قىرعا شىعىپ قىس باسىنداعى العاشقى قاردى كورۋگە كۇيكى تىرلىكتەن وراي تابا الماي جۇرگەن وقىرماندارىمىزعا وسى فوتو تۋىندىم ارقىلى العاشقى قاردىڭ ءلاززاتىن باعىشتايمىن!

　　اۆتوردىڭ ءادىرىسى: ىلە حالىق راديو ىستانسياسى

　　2014-جىلى قازاننىڭ سوڭى

　　كەلۋ قاينارى: حالىق تورابى