ساياتشىلار مەكەنىندە «ساياتشىلار قوعامى» قۇرىلدى

2015.01.13 14:55  

　　ەرىكتى ءتىلشى ەجەنحان بۇلەۋباي ۇلى حابارلايدى. قۇسبەگىلىك پەن ساياتشىلىق ۇلتىمىزدىڭ مايەكتى مادەنيەتتەرىنىڭ ءبىرى، شىڭگىل اۋدانى 2013 - جىلدان بەرى ساياتشىلىق مادەنيەتىمىزدى ونان ارى جالعاستىرىپ دامىتۋ ماقساتىندا، «سالبۋرىن سالتاناتى» اتتى ساحارالىق قيمىلدى ۇيىمداستىرىپ، جۇرتتىڭ القاۋىنا بولەنگەن ەدى. ساياتشىلار ۋاكىلى قازاقستان، موڭعۇليا ەلدەرىنە دەيىن بارىپ تاجىريبە الماستىرىپ، اۋداننىڭ بۇدان كەيىنگى ساياتشىلىق ىستەرىنىڭ دامۋىنا وي ءتۇيىپ قايتقان بولاتىن.

　　وسى ءبىر سۇبەلى ەڭبەكتەردىڭ ارقاسىندا 2014 - جىلى 15 - جەلتوقسان كۇنى شىڭگىل اۋدانى مەملەكەتتىك مادەنيەت مينيستىرلىگى جاعىنان «ساياتشىلار مەكەنى» دەگەن داڭقتى اتقا يە بولىپ، وسى ءبىر مادەنيەتىمىزدىڭ قۇندىلىعىن ارتتىرا ءتۇستى.

　　شىڭگىل اۋدانى 2015 - جىلى 3 - كەزەكتى «سالبۋرىن سالتاناتى» جانە ساحارا مادەنيەتى اتتى قيمىلدى وتكىزۋ قارساڭىندا ساياتشىلاردىڭ زاڭدىق ۇقىق – مۇددەسىن قورعاۋ شارالارىن كەمەلدەندىرۋ، مەرەكەنىڭ مەرەيىن اسىرۋدى ويلاستىرىپ، 10 - قاڭتار كۇنى «ساياتشىلار قوعامىن» قۇرىپ، ساياتشىلارعا تاعى دا ءبىر قولايلىلىق جاراتتى.

　　سول كۇنى ايماقتىق مادەنيەت مەكەمەسىنىڭ باسشىلارى، اۋدان باسشىلارى جانە قاتىستى ورىنداردان كەلگەن 70 نەشە قۇسبەگىنىڭ قاتىسۋىمەن قۇسبەگىلىككە قاتىستى كەيبىر اتاۋلاردى ارناعا ءتۇسىرۋ تۋرالى تالقى وتكىزىلدى.

　　كەلۋ قاينارى: حالىق تورابى