توعىزتاراۋدا «كاۋسار» كىتاپ دۇكەنىنىڭ تۇڭعىش تۇساۋكەسەرى ءوتتى

2015.07.20 09:01   كەلۋ قاينارى : حالىق تورابى

　　نۇربولات ءابدىقادىر، جاڭىلقان قوجا قىزى حابارلايدى: 2015-جىلى شىلدەنىڭ 15-كۇنى (سارسەنبى) تۇستەن كەيىنگى جەرگىلىكتى ساعات 3 تە، «كاۋسار» كىتاپ دۇكەنىنىڭ اشىلۋ مۇراسىمىنا وراي لەنتا قيۋ سالتى توعىزتاراۋ اۋدانىندا دابىرالى تۇردە باستالدى.

　　اتالعان يگى شاراعا توعىزتاراۋ اۋداندىق پارتكومنىڭ تۇراقتى مۇشەسى، ۇگىت ءبولىمىنىڭ باستىعى ءابدىنۇر، اۋداندىق ساياسي كەڭەس ءتوراعاسىنىڭ ورىنباسارى شاكەن، شينجياڭ داشۋەنىڭ پروفەسسورى بابي توقتار ۇلى، شينجياڭ داشۋەسى فيزيكا ينستيتۋتىنىڭ پروفەسسورى الىمبەك تۇرىسبەك ۇلى، ورتالىق ۇلتتار باسپاسىنىڭ ۇرىمجىدەگى بولىمشەسىنىڭ جاۋاپتىسى باھار مۇحامادي قىزى، ورتالىق ۇلتتار باسپاسى قازاق رەداكسياسىنىڭ رەداكتورى ءومىرجان سەيسەنقۇل ۇلى، «ىلە كەشى» گازەتى مەكەمەسى قازاق رەداكسياسىنىڭ ادەبي رەداكتورى نۇربولات ءابدىقادىر، شينجياڭ حالىق باسپاسىنىڭ تارالىم قىزمەتىنە جاۋاپتى قىزمەتكەرى تۇرسىن دالەلقان ۇلى قاتىناسىپ، ىستىق لەبىزدەرىن ءبىلدىردى. سونداي-اق بۇل مۇراسىمعا توعىزتاراۋدىڭ ءبىر ءبولىم قالامگەرلەرى مەن زيالىلارى، اۋداندىق تەلەۆيزيا مەكەمەسىنىڭ تىلشىلەرى، جەرگىلىكتى جۇرتشىلىق قاتىناستى.

　　ورتالىق ۇلتتار باسپاسى مەن شينجياڭ حالىق باسپاسىنىڭ كىتاپ وقۋ بازاسىنىڭ ءبىر ورنى سانالاتىن وسىناۋ «كاۋسار» كىتاپ دۇكەنىن اشقاندار نۇرشىراق بايتىلەك ۇلى مەن ءسابيرا ابدەش قىزى دەگەن جاس جۇبايلار. بۇل - ورتالىق ورتاعا قويعان «جاپپاي كىتاپ وقۋدى جالپىلاستىرۋ» قيمىلىمەن ۇندەسكەن ءوزارا ۇلىعاۋسار ءىس. سونىمەن بىرگە، «كاۋسار» كىتاپ دۇكەنىنىڭ اشىلۋى بيىلعى الەمدىك اباي قۇنانباي ۇلىنىڭ دۇنيەگە كەلگەندىگىنىڭ 170 جىلدىق مەرەيتويىنا تۇسپا-تۇس كەلدى ءارى بەيجيڭدە وتكىزىلگەن «اباي وقۋلارىنان» كەيىنگى شينجياڭ كولەمىندە دە ابايدى ەسكە الۋمەن توعىستىرىلعان العاشقى باستاما دەسەك بولادى.

　　ۇلتتار باسپاسىنىڭ ۇرىمجىدەگى بولىمشەسىنىڭ جاۋاپتىسى باھار مۇحامادي قىزى «كاۋسار» كىتاپ دۇكەنىنە ۇلتتار باسپاسىنىڭ قىزمەت وتەۋ ورتالىعىنىڭ ماڭدايشالىعىن ۇسىندى. پروفەسسور بابي توقتار ۇلى ءوزى قۇراستىرعان قازاق اۋىز ادەبيەتىنىڭ التىن قازىناسى «قازاق بيلەرىنىڭ ءادىل شەشىمدەرىنىڭ» 6 تومدىعىن، نۇراحىمەت اۋەتوۆ پەن قاسەن ساتىلقانوۆ وزدەرىنىڭ جەكە -جەكە «كوكتەممەن كەزدەستىم»، «قالاقاي جىرعا قارىق بول» اتتى جىر جيناقتارىن «كاۋسار» كىتاپ دۇكەنىنىڭ يەلەرىنە تارتۋ ەتتى. ال، «كاۋسار» كىتاپ دۇكەنى بولسا كوپشىلىككە «قازاق ادەبيەتىنىڭ ءتول تۋىندىلارىنان تاڭدامالىلار» سياقتى ادەبي، باسقا دا عىلىم-تەحنيكالىق، تۇرمىستىق قولدانىلمالى كىتاپتاردى تەگىن سيلاپ، ءوزارا رۋحاني اۋىسۋلار ءورىس الدى.

　　اۋداندىق 2-ورتا مەكتەپتىڭ ورىنباسار مەڭگەرۋشىسى جەڭىس قاتارلى اعارتۋشىلار مەكتەپتىڭ قابىرعالارىندا قابات سايىن حانزۋشا-قازاقشا ەكى جازۋدا ءتۇسىندىرىلىپ قويىلعان قازاقتىڭ ءىرى تۇلعالارى، ۇلتتىق سالت-سانا، عاسىرلار قويناۋىنان بەرمەن قارايعى جالعاسىن تاپقان قازاقتىڭ مادەنيەتى پەن ءداستۇرى، سونداي-اق تابيعاتى مەن ەكولوگياسى جايلى مازمۇنداردى ءبىر-بىرلەپ باياندادى. سونداي-اق، مەكتەپتىڭ جيىن زالىندا «قازاق ۇلتىن كىتاپتى شىنايى وقيتىن ۇلت ورەسىنە قالاي تەڭەستىرەمىز؟» تاقىرىبىندا كىتاپ وقۋ مادەنيەتى جونىندە ادەمى تالقى بولدى. اۋداندىق سىرتقى ىستەر مۇھاجىرلار كەڭسەسىنىڭ مەڭگەرۋشىسى نۇراحىمەت اۋەتوۆ تالقىنى باسقاردى. قارت اعارتۋشىلارمەن قوسا، ورالتاي ۇلىقپاش ۇلى، ءانزال اكپار ۇلى قاتارلى جەرگىلىكتى قالامگەرلەر دە قازاق ادەيبەتىنىڭ دامۋى، قازاقشا كىتاپتاردىڭ تارالىمى جانە ءتىل تاعدىرى ماسەلەلەرى جايلى وڭ پىكىرلەرلەرىن وقىرمان رەتىندە ورتاعا سالدى.

　　كىتاپ دۇكەنىنىڭ اشىلۋىنىڭ قۋانىشى كەشكە قاراي «ەلامان» رەستۋرانىندا كەڭ داستارقان جايۋعا ۇلاسىپ، وندا اقىن ابايدىڭ ولەڭدەرى مەن اسەم اندەرى بالدىرعاندار مەن جاستاردىڭ اۋزىنان اۋەلەدى. اقىندار ابايعا ارنالعان ولەڭدەرىن وقىدى. سۋرەتىن تارتقاندار: ايشات قابىلجان قىزى، گۇلبوستان، قۇرمانعالي قاتارلىلار

　　كەلۋ قاينارى: «ىلە كەشى» گازەتىنىڭ 2015-جىلى 18-شىلدە كۇنگى سانىنان الىندى