مەملەكەت مەرەكەسىن قارسى الۋ بايلانىسىمەن بەيجيڭدەگى چاڭ – ان كوشەسىنىڭ بويىنا ستەرولى گۇلتەكشەلەر قويىلدى

2019.09.24 11:06   كەلۋ قاينارى : حالىق تورابى

　　حالىق تورابى، 9 – ايدىڭ 23 – كۇنى، بەيجيڭ (ءتىلشى: ۋىڭ چييۇي) مەملەكەت مەرەكەسىن قارسى الۋ بايلانىسىمەن، بەيجيڭدەگى چاڭ – ان كوشەسىنىڭ بويىنداعى 12 جەرگە ستەرولى گۇلتەكشەلەردى قويۋ جۇمىسى جاقىندا اياقتاپ، قالا تۇرعىندارىنا رەسمي اشىلدى، اسەم دە الۋان فورماداعى گۇلتەكشەلەر قالا تۇرعىندارى مەن ساياحاتشىلاردى تاماشالاۋعا، سۋرەتكە تۇسۋگە باۋرادى.

　　اتالعان 12 ورىنداعى ستەرولى گۇلتەكشەلەر جيانگومىننىڭ باتىس سولتۇستىك ءمۇيىسى، دۇڭدان جول ايرىعى، شىعىس الاڭى، شيدان جول ايرىعى، ۇلتتار مادەنيەت سارايى جانە فۋشيڭمىننىڭ شىعىس سولتۇستىك مۇيىسىنە ورنالاستىرىلعان. ءاربىر گۇلتەكشەنىڭ تاقىرىبى ۇقسامايدى، ولارعا «ايبىندى 70 جىل»، «كوكتەم حيكاياسى»، «كۇرەسكە تولى جاڭا ءداۋىر»، «كورىكتى جۇڭگو»، «وركەنيەت جولى»، «جۇڭگودا جاسالعان» قاتارلى تاقىرىپتار قويىلعان، نەگىزىنەن 70 جىلدان بەرگى وتانىمىزدىڭ كوركەيىپ – گۇلدەنگەن، قۇدىرەتتەنگەن ۇلى جەتىستىكتەرى مەن حالىق جۇرتشىلىعىنىڭ باقىتتى تۇرمىسىن بەينەلەگەن.

　　ءتىلشىنىڭ شيدان جول ايرىعىنان بايقاۋىنشا، 4 گۇلتەكشە جەكە – جەكە جول ايرىعىنىڭ ءتورت مۇيىسىنە ورنالاستىرىلعان، قۇلپىرعان گۇلدەر تاماشا كورىنىس قالىپتاستىرعان. مۇنىڭ ىشىندە «جۇڭگودا جاسالعان» اتتى گۇلتەكشە فۋشيڭ جۇردەك پويەزى، ۇزاق جورىق – 1 تاسىمال راكەتاسى، تەمىر قازىق جولجەتەك جۇيەسى، جياۋلۇڭ ادام الىپ سۋعا سۇڭگۋ اسپابى قاتارلى مازمۇندار قامتىلىپ، نەگىزىنەن مەملەكەتىمىزدىڭ عىلىم – تەحنيكادا جاڭالىق جاراتۋ جاعىنداعى جەتىستىكتەرىن بەينەلەگەن.

　　كەلۋ قاينارى: حالىق تورابى