شي جينپيڭ تۇركىمەنستان ۇلت كوسەمى، حالىقتىق كوميتەتىنىڭ ءتوراعاسى بەردىمۇحامەتوۆپەن كەزدەستى
2023.10.20 16:19 كەلۋ قاينارى : حالىق تورابى
10 - ايدىڭ 19 - كۇنى تۇستەن بۇرىن مەملەكەت ءتوراعاسى شي جينپيڭ بەيجيڭدەگى حالىق سارايىندا 3 - كەزەكتى ”ءبىر بەلدەۋ، ءبىر جول“ حالىقارالىق سەلبەستىك جوعارى دارەجەلىلەر تالقى مىنبەرىنە قاتىناسۋ ءۇشىن جۇڭگوعا كەلگەن تۇركىمەنستاننىڭ ۇلت كوسەمى، حالىقتىق كوميتەتىنىڭ ءتوراعاسى بەردىمۇحامەتوۆپەن كەزدەستى. سۋرەتتى شينحۋا اگەنتتىگىنىڭ ءتىلشىسى حۋاڭ جيڭۋىن تۇسىرگەن
شينحۋا اگەنتتىگى، 10 - ايدىڭ 19 - كۇنى، بەيجيڭ. 10 - ايدىڭ 19 - كۇنى تۇستەن بۇرىن مەملەكەت ءتوراعاسى شي جينپيڭ حالىق سارايىندا 3 - كەزەكتى ”ءبىر بەلدەۋ، ءبىر جول“ حالىقارالىق سەلبەستىك جوعارى دارەجەلىلەر تالقى مىنبەرىنە قاتىناسۋ ءۇشىن جۇڭگوعا كەلگەن تۇركىمەنستاننىڭ ۇلت كوسەمى، حالىقتىق كوميتەتىنىڭ ءتوراعاسى بەردىمۇحامەتوۆپەن كەزدەستى.
شي جينپيڭ مىنالاردى اتاپ كورسەتتى: جۇڭگو − تۇركىمەنستاننىڭ سەنىمدى دوسى جانە سەرىگى. بيىل 1 - ايدا سەردار بەردىمۇحامەتوۆ زۇڭتۇڭ ەكەۋىمىز ەكى ەل قارىم - قاتىناسىن جالپى بەتتىك ستراتەگيالىق سەرىكتەستىك قارىم - قاتىناس دەڭگەيىنە كوتەرىپ، ەكى جاقتى دەڭگەيدە تاعدىرلاس ورتاق تۇلعانى امالياتتا ايگىلەيتىنىمىزدى جاريالاپ، ەكى ەل قارىم - قاتىناسى دامۋىنىڭ تىڭ پاراعىن اشتىق. جۇڭگو مەن تۇركىمەنستاننىڭ جالپى بەتتىك ستراتەگيالىق سەرىكتەستىك قارىم - قاتىناسىن دامىتۋ ەكى ەلدىڭ ءتۇبىرلى مۇددەسىنە ۇيلەسەدى ءارى ەكى ەل حالىقتارىنىڭ ورتاق تىلەگى. جۇڭگو جاق تۇركىمەنستانمەن بىرگە ءوزارا قۇرمەت ەتۋ، ءوزارا پايدا جەتكىزىپ، تەڭ يگىلىككە كەنەلۋ پرينسيبىن ۇزدىكسىز ۇستانىپ، ەكى ەل قارىم - قاتىناسىنىڭ ورنىقتى، باياندى دامۋىن ىلگەرىلەتۋدى قالايدى.
شي جينپيڭ مىنالاردى دارىپتەدى: ءوزارا قولداۋ − جۇڭگو - تۇركىمەنستان تاعدىرلاس ورتاق تۇلعاسىنىڭ وزەكتى ءمانى. جۇڭگو جاق تۇركىمەنستاننىڭ جۇڭگونىڭ وزەكتى مۇددەسىنە جانە ءجىتى قاداعالاپ وتىرعان كەلەلى ىستەرىنە ساياتىن ماسەلەلەردە باستان - اياق جۇڭگو جاققا پارمەندى قولداۋ كورسەتكەنىن القايدى، ءبىز تۇركىمەنستاننىڭ مەملەكەتتىڭ يەلىك ۇقىعىن، حاۋىپسىزدىگىن، دامۋ مۇددەسىن قورعاۋىن، ءوز ەلىنىڭ مەملەكەت جاعدايىنا ۇيلەسەتىن دامۋ جولىمەن ءجۇرۋىن ۇزدىكسىز قولدايمىز. جۇڭگو جاق تۇركىمەنستان جاقپەن ”ءبىر بەلدەۋ، ءبىر جول“ باستاماسىن ”جىبەك جولىن گۇلدەندىرۋ“ ستراتەگياسىمەن ۇشتاستىرۋدى كۇشەيتىپ، بايىرعى جىبەك جولىن جاڭا داۋىردەگى ”باقىت جولىنا“ اينالدىرۋدى قالايدى. ەكى جاق ەكى ەلدىڭ ساۋدا كولەمىن كەڭەيتىپ، ەمدەۋ، دەنساۋلىق ساقتاۋ، دەنە تاربيە، ساياحات سياقتى سالالارداعى سەلبەستىكتى كەڭەيتىپ، ءوزارا مادەنيەت جىلى قيمىلىن ويداعىداي وتكىزىپ، تۇركىمەنستان لۋبان شەبەرحاناسىن ەرتەرەك قۇرۋى كەرەك. جۇڭگو جاق تۇركىمەنستان جاقپەن جۇڭگو - ورتا ازيا باسشىلار باس قوسۋىنىڭ جەتىستىكتەرىن ويداعىداي تياناقتاندىرىپ، ءار سالاداعى سەلبەستىكتى اناعۇرلىم ويداعىداي ىلگەرىلەتۋدى قالايدى.
بەردىمۇحامەتوۆ مىنانى ءبىلدىردى: تۇركىمەنستان مەن جۇڭگونىڭ تەرەڭ تاتۋ كورشىلىك ءداستۇرى بار، دوستىعى ۇزاق ۋاقىتتان بەرى بەكەمدەلىپ كەلەدى. بايىرعى جىبەك جولى تۇركىمەنستان، جۇڭگو ەكى ەل حالقىن بايلانىستىرىپ، دۇنيە ءجۇزى وركەنيەتىنىڭ العا باسۋىن ىلگەرىلەتتى. بۇگىنگى تاڭا تۇركىمەنستاننىڭ ”جىبەك جولىن گۇلدەندىرۋ“ باستاماسى جۇڭگونىڭ ”ءبىر بەلدەۋ، ءبىر جول“ باستاماسىمەن تىعىز ۇشتاسىپ، ەكى ەلدىڭ جانە وڭىردەگى ەلدەردىڭ ۇلاستىرۋ - تۇتاستىرۋىن جانە دامىپ، گۇلدەنۋىن بارىنشا ىلگەرىلەتتى. ءتوراعا شي جينپيڭنىڭ 3 - كەزەكتى ”ءبىر بەلدەۋ، ءبىر جول“ حالىقارالىق سەلبەستىك جوعارى دارەجەلىلەر تالقى مىنبەرىنىڭ اشىلۋ سالتىندا سويلەگەن ماڭىزدى ءسوزى بولاشاقتاعى سەلبەستىككە ايقىن بەتالىس كورسەتتى. ەكى جاق دوستىقتى جالعاستىرىپ، تۋىسقانداي دوستىق قاتىناستى ۇرپاقتان - ۇرپاققا جالعاپ، باستان - اياق ءوزارا سەنىم ارتىپ، ءوزارا ءتۇسىنىپ، ءوزارا قولداپ، ەكى جاقتى ەكونوميكا، ەنەرگيا سەلبەستىگى مەن گۋمانيتارلىق اۋىس - كۇيىستى ۇزدىكسىز تەرەڭدەتىپ، جۇڭگو - ورتا ازيا مەحانيزمى سياقتى كوپ جاقتى مەحانيزمدە پىكىرلەسۋدى، سايكەسۋدى جيىلەتىپ، تۇركىمەنستان مەن جۇڭگونىڭ جان - جاقتى ستراتەگيالىق سەرىكتەستىك قارىم - قاتىناسىنىڭ اناعۇرلىم كوپ تابىستارعا قول جەتكىزۋىن ىلگەرىلەتىپ، ەكى ەل حالىقتارىنا باقىت جاراتۋى ءارى ءوڭىردىڭ گۇلدەنىپ - كوركەيۋىنە، دامۋىنا بەلسەندى ۇلەس قوسۋى كەرەك.
ەكى ەل باسشىلارى ەكونوميكالىق، تەحنيكالىق سەلبەستىك كەلىسىمى سياقتى ەكى جاقتى سەلبەستىك قۇجاتتارىنا قول قويۋعا بىرگە كۋا بولدى.
ساي چي، ۋاڭ ي جوعارىداعى قيمىلدارعا قاتىناستى.
كەلۋ قاينارى: حالىق تورابى
جاۋاپتى رەداكتورى : نۇرعيسا قۇرمانجان ۇلى
تەلەفون: 65367915-010 حات ساندىعى: kazakh@peopledaily.com.cn
بۇل بەتتىڭ باسپا ۇقىعى حالىق تورابىنا ءتان، كەلىسىمنەن وتپەي كوشىرىپ پايدالانۋعا بولمايدى
Copyright © 1997-2023 by www.people.com.cn. all rights reserved
جۇڭگو كوممۋنيستىك پارتياسى اقپارات تورابى
