شي جينپيڭ يندونەزيانىڭ زۇڭتۇڭى جوكومەن كەڭەس وتكىزدى
2023.10.18 16:27 كەلۋ قاينارى : حالىق تورابى
شينحۋا اگەنتتىگى، 10 - ايدىڭ 17 - كۇنى، بەيجيڭ. 10 - ايدىڭ 17 - كۇنى تۇستەن كەيىن مەملەكەت ءتوراعاسى شي جينپيڭ حالىق سارايىندا 3 - كەزەكتى ”ءبىر بەلدەۋ، ءبىر جول“ حالىقارالىق سەلبەستىك جوعارى دارەجەلىلەر تالقى مىنبەرىنە قاتىناسۋ ءارى مەملەكەتتىك ساپاردا بولۋ ءۇشىن جۇڭگوعا كەلگەن يندونەزيانىڭ زۇڭتۇڭى جوكومەن كەڭەس وتكىزدى.
شي جينپيڭ بىلاي دەپ اتاپ كورسەتتى: يندونەزيا − مەنىڭ ”21 - عاسىرداعى تەڭىز جىبەك جولىن“ بىرگە قۇرۋ باستامام العاش ورتاعا قويىلعان جەر 10 جىلدا مول تابىسقا قول جەتكىزدىك، جۇڭگو مەن يندونەزيا بىرگە اقىلداسۋدا، بىرگە قۇرۋدا، بىرگە يگىلىكتەنۋدە، ارتىقشىلىقتارى ارقىلى ءبىرىن - ءبىرى تولىقتاۋدا، دامۋدى بىرگە جەبەۋدە تاباندى بولىپ، ەكى ەل حالىقتارىنا زور ىرىس - قۇت اكەلىپ، ”ءبىر بەلدەۋ، ءبىر جولدى“ بىرگە قۇرۋ حالىقارالىق سەلبەستىگىنىڭ ماڭىزدى ۇلگىسىنە اينالدى. جۇڭگو جاق يندونەزيامەن وسىزاماندانۋ جانە ۇلتتى گۇلدەندىرۋ جولىندا ۇزدىكسىز ءوزارا قولداۋ كورسەتىپ، جۇڭگو - يندونەزيا تاعدىرلاس ورتاق تۇلعاسىن بىرگە قۇرۋ ارقىلى ەكى جاقتى قارىم - قاتىناستىڭ ۇزاق ۋاقىت ورنىقتى دامۋىنا جەتەكشىلىك ەتىپ، ءبىر - ءبىرىنىڭ دامۋىنا، گۇلدەنۋىنە اناعۇرلىم زور دەمەۋشى كۇش ازىرلەپ، حالىقارالىق جانە وڭىرلىك بەيبىتشىلىك پەن گۇلدەنۋگە سارقىلماس قوزعاۋشى كۇش ۇستەۋدى قالايدى.
شي جينپيڭ بىلاي دەپ دارىپتەدى: جۇڭگو جاق يندونەزيامەن بىرگە ەكى ەل قارىم - قاتىناسىنا ستراتەگيالىق دەڭگەيدەن جانە ۇزاق بولاشاقتىق تۇرعىدان مامىلە جاساپ جانە ونى دامىتىپ، بار مەحانيزمنەن ويداعىداي پايدالانىپ، جان - جاقتى ستراتەگيالىق سەلبەستىكتى تەرەڭدەتىپ، ءبىر - ءبىرىنىڭ وزەكتى مۇددەسىنە جانە ءجىتى قاداعالاپ وتىرعان كەلەلى ىستەرىنە ساياتىن ماسەلەلەردە ءوزارا قولداۋدى كۇشەيتىپ، ءوز مەملەكەت جاعدايىنا ۇيلەسەتىن وسىزامانداندىرۋ جولىمەن قول ۇستاسا ءجۇرۋدى قالايدى. جاكارتا - باندۇڭ جوعارى قارقىندىق تەمىر جولى − جۇڭگو مەن يندونەزيانىڭ ”ءبىر بەلدەۋ، ءبىر جولدى“ بىرگە قۇرۋ سەلبەستىگىنىڭ ”التىن ماڭدايشالىعى“، جۇڭگو جاق يندونەزيامەن تابىستى تاجىريبەلەردى قورىتىندىلاپ، كەيىنگى ساپالى اينالىمدى ويداعىداي ىستەپ، جاكارتا - باندۇڭ جوعارى قارقىندىق تەمىر جول ەكونوميكالىق بەلدەۋىن جەتىلدىرۋدى قالايدى. ەكى جاق كاسىپ سالاسى تىزبەگىنىڭ، قامداۋ تىزبەگىنىڭ توعىسۋىن تەرەڭدەتىپ، ”وڭىرلىك جالپىلىق ەكونوميكالىق ءدالىز“ جانە ”ەكى ەلدەگى قوس باقشا“ قۇرىلىسىن كۇش بىرىكتىرە ىلگەرىلەتۋى كەرەك. جۇڭگو جاق قاتىستى جەرگىلىكتى ورىندار مەن كاسىپورىنداردىڭ يندونەزيانىڭ جاڭا استاناسى، سولتۇستىك كاليمانتان ونەركاسىپ باقشاسى سياقتى كەلەلى نىساندار قۇرىلىسىنا قاتىناسۋىن قولدايدى، يندونەزيانىڭ ساپالى اۋىل شارۋاشىلىعى، بالىق شارۋاشىلىعى ونىمدەرىن يمپورت ەتۋدى ۇزدىكسىز ارتتىرىپ، سيفرلى ەكونوميكا، فوتوۆولت، جاڭا ەنەرگيالى اۆتوكولىك سياقتى جاڭادان گۇلدەنگەن كاسىپ سالاسى سەلبەستىگىن ۇلعايتۋدى، كۇشەيتۋدى، استىق، اۋىل شارۋاشىلىعى تەحنيكاسى، كەدەيلەردى سۇيەمەلدەۋ، كەدەيلىكتى ازايتۋ، ەمدەۋ، ءدارى - دارمەك، دەنساۋلىق ساقتاۋ جانە وقۋ - اعارتۋ، مادەنيەت، ساياحات، جاستار سياقتى سالالارداعى اۋىس - كۇيىستى، سەلبەستىكتى بەلسەنە ورىستەتۋدى قالايدى. ەكى جاق تىعىز سەلبەسىپ، شىعىس وڭتۇستىك ازيا ەلدەرى وداعىنىڭ وزەكتى ورنىن قورعاپ، اشىق وڭىرشىلدىكتى ساۋلەلەندىرىپ، وركەندەپ كەلە جاتقان ءىرى ەلدىڭ جاۋاپكەرلىگىن ايگىلەپ، دۇنيە جۇزىلىك جونگە سالۋ جۇيەسىنىڭ وزگەرىسىن سەلبەسىپ ىلگەرىلەتىپ، حالىقارالىق ادىلدىك پەن ادىلەتتىلىكتى قورعاۋى كەرەك.
جوكو مىنالاردى ءبىلدىردى: 2 ايدان استام ۋاقىتتىڭ الدىندا مەن چىڭدۋدا ءتوراعا شي جينپيڭمەن كەزدەسكەننەن كەيىن ەكى ەلدىڭ سەلبەستىگى تاعى دا بەلسەندى ىلگەرىلەۋشىلىككە قول جەتكىزدى. جاكارتا – باندۇڭ جوعارى قارقىندىق تەمىر جولىندا وسى ايدا قۇرىلىس اياقتالدى، الداعى جەردە رەسمي ىسكە قوسىلادى. مەن ءتوراعا شي جينپيڭنىڭ ەكى ەل قارىم - قاتىناسىن دامىتۋ جونىندەگى كوزقاراسى مەن پىكىرىن تولىق قۇپتايمىن. يندونەزيا جۇڭگونى مەملەكەتتىڭ ەكونوميكالىق دامۋ قۇرىلىسىنداعى ماڭىزدى ستراتەگيالىق سەرىگى دەپ بىلەدى، جۇڭگومەن قارىم - قاتىناستى، سەلبەستىكتى ونان ارى كۇشەيتىپ، ءوزارا سەنىمدىلىكتى نىعايتىپ، اناعۇرلىم تىعىز قاتىناستى دامىتىپ، ەكى ەل حالىقتارىنا باقىت جاراتۋمەن بىرگە، ءوڭىردىڭ بەيبىتشىلىگى مەن گۇلدەنۋىن جەبەۋگە دە ۇلەس قوسۋدى ءۇمىت ەتەدى. يندونەزيا جۇڭگومەن بىرگە ”ءبىر بەلدەۋ، ءبىر جولدى“ جوعارى ساپامەن قۇرۋدى قالايدى، اناعۇرلىم كوپ جۇڭگو كاسىپورىندارىنىڭ يندونەزيانىڭ جاڭا استاناسى مەن سولتۇستىك كاليمانتان ونەركاسىپ باقشاسى قۇرىلىسىنا ات سالىسۋىن قارسى الادى، ”وڭىرلىك امبەباپ ەكونوميكالىق ءدالىز“ جانە ”ەكى ەلدەگى قوس باقشا“ سياقتى كەلەلى نىسانداردى جەدەل ىلگەرىلەتەدى. جۇڭگوعا اۋىل شارۋاشىلىق ونىمدەرىن ەكسپورت ەتۋدى ونان ارى كەڭەيتىپ، ەلەكترلى اۆتوموبيل، فينانس، ەنەرگيا حاۋىپسىزدىگى سياقتى سالالارداعى سەلبەستىكتى كۇشەيتۋدى ءۇمىت ەتەمىز. يندونەزيا ءتوراعا شي جينپيڭ العا قويعان ءبىرقىدىرۋ ماڭىزدى باستامانى القايدى، شىعىس وڭتۇستىك ازيا ەلدەرى وداعى مەن ءۇندى مۇحيتى ءوڭىرىنىڭ دامۋ بولاشاق جوسپارىن ”ءبىر بەلدەۋ، ءبىر جول“ باستاماسىمەن اناعۇرلىم ويداعىداي ۇشتاستىرىپ، ءوڭىردىڭ بىرگە دامۋىن جانە بىرلەسكەن مەملەكەتتەر ۇيىمىنىڭ 2030 - جىلعا دەيىنگى باياندى دامۋ كەڭەستىك ءتارتىبىن جۇزەگە اسىرۋعا دەم بەرۋدى قالايدى.
كەڭەستەن كەيىن ەكى ەلدىڭ مەملەكەت باسشىلارى جاكارتا - باندۇڭ جوعارى قارقىندىق تەمىر جولىنىڭ رەسمي ىسكە قوسىلۋىنا ارنالعان ماڭدايشالىقتىڭ جامىلعىسىن اشتى ءارى ”ءبىر بەلدەۋ، ءبىر جولدى“ بىرگە قۇرۋ سەلبەستىك قىزمەتىن سايكەستىرۋ مەحانيزمىن ورناتۋ، دۇنيە جۇزىلىك دامۋ باستاماسىن تياناقتاندىرۋ، اۋىل - قىستاقتى دامىتۋ جانە كەدەيلىكتى ازايتۋ، باياندى دامۋ، تەكسەرۋ - كارانتيندەۋ سياقتى سالالارداعى كوپتەگەن ەكى جاقتى سەلبەستىك قۇجاتتارىنا قول قويۋعا كۋا بولدى.
ەكى جاق «جۇڭحۋا حالىق رەسپۋبليكاسى مەن يندونەزيا رەسپۋبليكاسىنىڭ جان - جاقتى ستراتەگيالىق سەلبەستىكتى تەرەڭدەتۋ جونىندەگى بىرلەسكەن مالىمدەمەسىن» جاريالايتىن بولدى.
كەڭەستەن ىلگەرى شي جينپيڭ حالىق سارايىنىڭ سولتۇستىك زالىندا جوكوعا ارناپ قارسى الۋ سالتىن وتكىزدى، جوكومەن بىرگە جۇڭگو حالىق ازاتتىق ارمياسىنىڭ قۇرمەت قاراۋىلىن كوزدەن كەشىردى ءارى سالتانات قاتارىن كوردى.
ساي چي، ۋاڭ ي جوعارىداعى قيمىلدارعا قاتىناستى.
كەلۋ قاينارى: حالىق تورابى
جاۋاپتى رەداكتورى : مانەپ ەربول ۇلى
تەلەفون: 65367915-010 حات ساندىعى: kazakh@peopledaily.com.cn
بۇل بەتتىڭ باسپا ۇقىعى حالىق تورابىنا ءتان، كەلىسىمنەن وتپەي كوشىرىپ پايدالانۋعا بولمايدى
Copyright © 1997-2023 by www.people.com.cn. all rights reserved
جۇڭگو كوممۋنيستىك پارتياسى اقپارات تورابى
