شي جينپيڭ ەگيپەتتىڭ زۇڭليى مادبۋليمەن كەزدەستى
2023.10.20 16:21 كەلۋ قاينارى : حالىق تورابى
10 - ايدىڭ 19 - كۇنى تۇستەن بۇرىن مەملەكەت ءتوراعاسى شي جينپيڭ بەيجيڭدەگى حالىق سارايىندا 3 - كەزەكتى ”ءبىر بەلدەۋ، ءبىر جول“ حالىقارالىق سەلبەستىك جوعارى دارەجەلىلەر تالقى مىنبەرىنە قاتىناسۋ ءۇشىن جۇڭگوعا كەلگەن ەگيپەتتىڭ زۇڭليى مادبۋليمەن كەزدەستى.سۋرەتتى شينحۋا اگەنتتىگىنىڭ ءتىلشىسى شىن حۇڭ تۇسىرگەن
شينحۋا اگەنتتىگى، 10 - ايدىڭ 19 - كۇنى، بەيجيڭ (تىلشىلەر ۋىن شين، جاڭ شياۋ). 10 - ايدىڭ 19 - كۇنى تۇستەن بۇرىن مەملەكەت ءتوراعاسى شي جينپيڭ حالىق سارايىندا 3 - كەزەكتى ”ءبىر بەلدەۋ، ءبىر جول“ حالىقارالىق سەلبەستىك جوعارى دارەجەلىلەر تالقى مىنبەرىنە قاتىناسۋ ءۇشىن جۇڭگوعا كەلگەن ەگيپەتتىڭ زۇڭليى مادبۋليمەن كەزدەستى.
شي جينپيڭ مىنالاردى اتاپ كورسەتتى: ەگيپەت − جاڭا جۇڭگومەن تۇڭعىش رەت ديپلوماتيالىق قارىم - قاتىناس ورناتقان اراب جانە افريكا مەملەكەتى، جۇڭگو مەن ەگيپەت مۇراتتاس، ءبىر - بىرىنە سەنەتىن جاقسى دوستار، سونداي - اق قول ۇستاسا دامىپ، بىرگە گۇلدەنگەن جاقسى سەرىكتەر. 10 جىلدان بەرى جۇڭگو مەن ەگيپەت ”ءبىر بەلدەۋ، ءبىر جولدى“ بىرگە قۇرۋ جۇلگەسىندە ءونىمدى سەلبەستىك ورىستەتتى. جۇڭگو ەگيپەتتىڭ ءوز ەلىنىڭ مەملەكەت جاعدايىنا ۇيلەسەتىن دامۋ جولىمەن ءجۇرۋىن قولدايدى، ەگيپەتپەن دامۋ ستراتەگياسىن ۇشتاستىرۋدى تەرەڭدەتىپ، قۋاتتى جۇڭگو كاسىپورىندارىن ەگيپەتكە بارىپ قارجى قوسىپ، شارۋاشىلىقتى گۇلدەندىرۋگە شابىتتاندىرادى، ەگيپەتتىڭ ءتىپتى دە كوپ ساپالى ونىمدەرىنىڭ جۇڭگو بازارىنا كىرۋىن قارسى الادى. جۇڭگو جاق ەگيپەت جاقپەن 3 - كەزەكتى ”ءبىر بەلدەۋ، ءبىر جول“ حالىقارالىق سەلبەستىك جوعارى دارەجەلىلەر تالقى مىنبەرىنىڭ جەتىستىكتەرىن ويداعىداي تياناقتاندىرىپ، نەگىزدىك قۇرىلعى، اۋىل شارۋاشىلىق تەحنيكاسى، تۋىندامالى ەنەرگيا سياقتى سالالارداعى سەلبەستىكتى كۇشەيتىپ، گۋمانيتارلىق اۋىس - كۇيىس پەن سەلبەستىكتى كەڭەيتىپ، جۇڭگو مەن ەگيپەتتىڭ جان - جاقتى ستراتەگيالىق سەرىكتەستىك قارىم - قاتىناسىنىڭ دامۋىن ۇزدىكسىز ىلگەرىلەتۋدى قالايدى.
شي جينپيڭ ەگيپەتتىڭ بريكس ەلدەرىنىڭ سەلبەستىك مەحانيزمىنە ۇسىنىسپەن قاتىناسقانىن قۇتتىقتاپ، بىلاي دەپ اتاپ كورسەتتى: جۇڭگو جاق ەگيپەت جاقپەن جۇڭگو - اراب ەلدەرى، جۇڭگو - افريكا جۇلگەسىندەگى سەلبەستىكتى، سونداي - اق بىرلەسكەن مەملەكەتتەر ۇيىمى، بريكس سياقتى كوپ جاقتى تۇعىرلاردا سايكەسۋدى، سەلبەسۋدى كۇشەيتىپ، ناعىز كوپ جاقتىلىقتى قورعاپ، حالىقارالىق ادىلدىك پەن ادىلەتتىلىكتى جانە وركەندەپ كەلە جاتقان ەلدەردىڭ ورتاق مۇددەسىن قورعاپ، وڭىرگە جانە دۇنيە جۇزىنە اناعۇرلىم كوپ تۇراقتىلىق پەن ورنىقتىلىق ۇستەۋدى قالايدى.
مادبۋلي مىنالاردى ءبىلدىردى: جۇڭگو جاقتىڭ 3 - كەزەكتى ”ءبىر بەلدەۋ، ءبىر جول“ حالىقارالىق سەلبەستىك جوعارى دارەجەلىلەر تالقى مىنبەرىن ءساتتى وتكىزگەنىن قۇتتىقتايمىن. ەگيپەت جاق جۇڭگونى جاڭادان گۇلدەنگەن ەكونوميكالىق تۇلعالار مەن وركەندەپ كەلە جاتقان ەلدەردىڭ ۇلگىسى دەپ قارايدى. جۇڭگو جاقتىڭ ۇزاق ۋاقىتتان بەرى ەگيپەتكە قاستەرلى قولداۋ كورسەتكەنىنە العىس ايتامىن. ”ءبىر بەلدەۋ، ءبىر جولدى“ بىرگە قۇرۋ ەگيپەتتىڭ تاسىمال جانە زات اينالىمى دەڭگەيىن بارىنشا جوعارىلاتىپ، ەگيپەت ەكونوميكاسىنىڭ دامۋىن پارمەندى جەبەدى. ەگيپەت جاق ەگيپەت - جۇڭگو قارىم - قاتىناسىنىڭ ءار سالادا اناعۇرلىم زور دامۋعا قول جەتكىزۋىن كۇتەدى، ”ءبىر بەلدەۋ، ءبىر جولدى“ بىرگە قۇرۋ سەلبەستىگىنە ۇزدىكسىز بەلسەنە ات سالىسۋدى قالايدى، اناعۇرلىم كوپ جۇڭگو كاسىپورىندارىنىڭ ەگيپەتكە بارىپ قارجى قوسىپ، شارۋاشىلىقتى گۇلدەندىرۋىن كۇتەدى، ەگيپەت جاق وسى ءۇشىن ساياساتتىق قولداۋ كورسەتۋدى جانە حاۋىپسىزدىك كەپىلدىگىن ازىرلەۋدى قالايدى. جۇڭگونىڭ ەگيپەتتىڭ بريكس ەلدەرىنىڭ سەلبەستىك مەحانيزمىنە قاتىناسۋىن قولداعانىنا العىس ايتامىن، جۇڭگو جاقپەن كوپ جاقتى سەلبەستىكتى جيىلەتىپ، حالىقارالىق جاعدايدىڭ اناعۇرلىم تەپە - تەڭ، ءادىل بولۋىن ىلگەرىلەتۋدى قالايمىن.
شي جينپيڭ پالەستين مەن يزرايلدىڭ قازىرگى جاعدايى جونىندە جۇڭگونىڭ پرينسيپتىك تۇرعىسىن پايىمداپ، مىنانى دارىپتەدى: قازىرگى شۇعىل مىندەت سوعىستى تەز ارادا توقتاتىپ، قاقتىعىستىڭ ۇلعايۋىنان، ءتىپتى مەڭگەرۋسىز قالۋىنان، اۋىر ادامگەرشىلىك داعدارىسىنىڭ تۋىلۋىنان ساقتانۋ بولىپ تابىلادى. پالەستين - يزرايل قاقتىعىسىن شەشۋدىڭ ءتۇبىرلى شىعار جولى − ”ەكى ەل جوباسىن“ تياناقتاندىرىپ، دەربەس پالەستينا مەملەكەتىن قۇرىپ، پالەستينا مەن يزرايلدىڭ بەيبىت قاتار تۇرۋىن جۇزەگە اسىرۋ. جۇڭگو جاق ەگيپەتتىڭ جاعدايدىڭ باسەڭدەۋىن ىلگەرىلەتۋدە اتقارعان ماڭىزدى رولىن القايدى، ەگيپەتتىڭ ادامگەرشىلىك ءدالىزىن اشۋ قۇلشىنىسىن قولدايدى، ەگيپەتپەن جانە اراب ەلدەرىمەن سايكەسۋدى كۇشەيتىپ، پالەستينا ماسەلەسىن ەرتەرەك جاپپاي، ءادىل، باياندى شەشۋدى ىلگەرىلەتۋدى قالايدى.
مادبۋلي مىنانى ءبىلدىردى: ەگيپەت پەن اراب ەلدەرى جۇڭگونىڭ پالەستينا ماسەلەسىندە باستان - اياق ءادىل مايداندا تۇرعانىن ايرىقشا القايدى، جۇڭگونىڭ قازىرگى داعدارىستى شەشۋدە اناعۇرلىم زور رول اتقارۋىن ءۇمىت ەتەدى.
ساي چي، ۋاڭ ي كەزدەسۋدە بىرگە بولدى.
كەلۋ قاينارى: حالىق تورابى
جاۋاپتى رەداكتورى : نۇرعيسا قۇرمانجان ۇلى
تەلەفون: 65367915-010 حات ساندىعى: kazakh@peopledaily.com.cn
بۇل بەتتىڭ باسپا ۇقىعى حالىق تورابىنا ءتان، كەلىسىمنەن وتپەي كوشىرىپ پايدالانۋعا بولمايدى
Copyright © 1997-2023 by www.people.com.cn. all rights reserved
جۇڭگو كوممۋنيستىك پارتياسى اقپارات تورابى
