قاتىناس حاۋىپسىزدىگى جونىندەگى ەسكەرتۋ: 12 جاسقا تولماعان بالالاردى اۆتوموبيلدىڭ الدىڭعى قاتارداعى ورىندىعىنا وتىرعىزۋعا بولمايدى
2023.12.29 13:10 كەلۋ قاينارى : حالىق تورابى
12 - ايدىڭ 28 - كۇنى، مەملەكەتتىك دەنساۋلىق ساقتاۋ - سالاماتتىق كوميتەتى اقپار جاريالاۋ ءماجىلىسىن اشتى. ماجىلىستە، بەيجيڭ بالالار ەمحاناسىنىڭ مەڭگەرۋشى شيپاگەرى ۋاڭ چۋان بىلاي دەپ تانىستىردى: جاڭا جىل مەرەكەسىنىڭ دەمالىسىندا، اتا - انالار بالالارىن ساپارعا ەرتىپ شىعۋى مۇمكىن. اۆتوموبيلمەن جۇرگەن كەزدە قاتىناس قاعيداسىنا قاتاڭ بويسۇنۋى قاجەت، وتە - موتە، قار - مۇزدى جولداردا اۆتوموبيلدىڭ دوڭگەلەگى وڭاي تايعانايتىندىقتان، حاۋىپسىزدىككە تىپتەن كوڭىل ءبولۋ، اۆتوموبيل قارقىنىن تەجەۋ قاجەت. 12 جاسقا تولماعان بالانى اۆتوموبيلدىڭ الدىڭعى قاتارداعى ورىندىعىنا وتىرعىزباعان ءجون؛ بالا اۆتوموبيلگە وتىرعان كەزدە، ونىڭ جاسىنا جانە بويىنىڭ بيىكتىگىنە قاراي وتىرىپ، بالالارعا ارنالعان حاۋىپسىز ورىندىقتار جانە حاۋىپسىزدىك بەلبەۋى قاتارلىلاردى دۇرىس تاڭداعان جانە پايدالانعان ءجون.
اۆتوموبيلگە وتىرعاندا بالانى قۇشاققا الماعان دۇرىس؛ اۆتوموبيلدە وتىرعاندا باس، قول قاتارلىلاردى اۆتوموبيلدىڭ توبەسىندەگى تەرەزەدەن، اۆتوموبيلدىڭ تەرەزەسىنەن سىرتقا شىعارماعان ءجون؛ اۆتوموبيلمەن جۇرگەن كەزدە، ەڭ جاقسىسى، تاماق جەگىزبەگەنى وڭ، وتە - موتە، كەپتىرىلگەن جەمىس، جەمىس ۋىزشاسى جانە تاياقشالى ءتاتتى قاتارلىلاردى جەگىزبەگەن ءجون؛ اۆتوموبيلگە شىققان سوڭ، بالالاردىڭ ەسىكتى اشۋىنان ساقتاناتىن قۇلىپتى قۇلىپتاعان ءجون؛ ۋاقىت، مەيلى، ۇزاق بولسىن، الدە، قىسقا بولسىن، بالانى اۆتوموبيلدە جالعىز قالدىرماعان وڭ. 12 جاسقا تولماعان بالالاردىڭ ۆەلوسيپەدپەن جولعا شىعۋىنا بولمايدى، 16 جاسقا تولماعان بالانىڭ ەلەكترلى ۆەلوسيپەتپەن جولعا شىعۋىنا بولمايدى؛ بالا ۆەلوسيپەتپەن جۇرگەندە، سىرعىما تاقتايمەن ويناعاندا، ساقتىق قۇرالىن دۇرىس تاققانى ءجون. بالالارعا حاۋىپسىزدىك جونىندە ءتالىم - تاربيە بەرۋدى كۇشەيتۋ، بالالاردىڭ حاۋىپتى جاعدايدى تانۋ جانە حاۋىپتەن ساقتانۋ قابىلەتىن ارتتىرۋ، بالالاردى قورشاعان ورتادا وڭاي كوزگە تۇسەتىندەي، توڭىرەگىندەگى ادامدار وعان وڭاي نازار اۋداراتىنداي كيندىرۋ قاجەت، بالالارعا اق ءتۇستى نەمەسە اشىق رەڭدى كيىمدەردى نەمەسە جارىق شاعىلىستىراتىن كيىمدەردى كيگىزگەن ءجون.
بالالاردى اۆتوموبيلدىڭ الدى - ارتىنداعى كوزدەن تاسا جەردە ويناتپاۋ، اۆتوموبيلدىڭ الدىنان تۇتقيىل جۇگىرتپەۋ قاجەت؛ جولدان وتكەن كەزدە جۇرگىنشىلەرگە ارنالعان جولمەن نەمەسە جولدان وتەتىن اسپا كوپىرمەن جۇرگەن وڭ، اۆتوموبيلدەردىڭ اراسىمەن جولدى كەسىپ وتپەۋ قاجەت؛ الەۋمەتتىك قاتىناس قۇرالدارىنا وتىرعاندا، تارتىپكە بويسۇنۋ، ورنىقتى وتىرىپ، سۇيەنىشتەن مىقتى ۇستاۋ، الىسىپ - جۇلىسپاۋ قاجەت. قىس مەزگىلىندە جول ۇستى تايعاناق بولادى، سىرتتا جۇرگەن كەزدە، كىتاپ وقىماۋ نەمەسە قولفونعا قاراماۋ قاجەت، قولدى كيىمنىڭ قالتاسىنا سالماعان ءجون، ويتپەگەندە، تايىپ جىعىلاتىن جاعدايعا جولىققاندا، دەنەنىڭ تەپە - تەڭدىگىن ساقتاۋ قيىن بولادى؛ جول ورتاسىندا ءبىرىن - ءبىرى قۋالاپ، الىسىپ - جۇلىسپاعان ءجون، اۆتوموبيلدەن الىسىراق جۇرۋگە كوڭىل بولگەن ءجون. (باس ستانسيا ءتىلشىسى موۋ تيتي)
كەلۋ قاينارى: حالىق تورابى
جاۋاپتى رەداكتورى : نۇرعيسا قۇرمانجان ۇلى
تەلەفون: 65367915-010 حات ساندىعى: kazakh@peopledaily.com.cn
بۇل بەتتىڭ باسپا ۇقىعى حالىق تورابىنا ءتان، كەلىسىمنەن وتپەي كوشىرىپ پايدالانۋعا بولمايدى
Copyright © 1997-2023 by www.people.com.cn. all rights reserved
جۇڭگو كوممۋنيستىك پارتياسى اقپارات تورابى
