جۇڭگو مەن ۆيەتنام 96.01 كيلوگرام ەسىرتكىنى اشىق تۇردە بىرگە جويدى 

6 – ايدىڭ 24 – كۇنى، حالىقارالىق 37 – كەزەكتى ەسىرتكىگە تيىم سالۋ كۇنى كەلۋ قارساڭىندا، گۋاڭشي ولكەسى چۇڭزو قالاسى 2024 – جىلعى ”26 – ماۋسىم“ حالىقارالىق ەسىرتكىگە تيىم سالۋ كۇنىندە جۇڭگو مەن ۆيەتنامنىڭ ەسىرتكىنى اشىق تۇردە بىرگە جويۋى قيمىلىن وتكىزىپ، جۋىرداعى جىلداردان بەرى قولعا تۇسىرىلگەن ەسىرتكى ونىمدەرىن شوعىرلى تۇردە جويدى. وسى رەتكى قيمىلعا 600 نەشە ادام قاتىناستى.

قيمىل بارىسىندا، جاستار مەن ورەندەردىڭ ۋاكىلدەرى ەسىرتكىگە تيىم سالۋ دارىپتەمەسىن وقىدى، گۋاڭشي جۋاڭزۋ اۆتونوميالى رايوندىق ەسىرتكىگە تيىم سالۋ كوميتەتىنىڭ ۋاكىلى ەسىرتكىنى جويۋ جونىندە بۇيرىق ءتۇسىردى. بۇيرىق تۇسىرىلىسىمەن قىزمەتكەرلەر جويىلاتىن ەسىرتكىلەردى تيەگەن اۆتوموبيلدەردى بەلگىلەنگەن ورىنعا جەتكىزىپ، زالالسىزداندىرىپ جويۋدى ورىندادى. ۇعىسۋعا قاراعاندا، وسى رەتكى شوعىرلى ورتەپ جويىلعان ەسىرتكى، باستىسى، حەروين بولىپ، جيىنى 96.01 كيلوگرام ەكەن.

ۇعىسۋعا قاراعاندا، گۋاڭشيدىڭ چۇڭزو قالاسى جۇڭگو مەن ۆيەتنامنىڭ ەسىرتكى بۇيىمدارىن اشىق تۇردە بىرگە جويۋى قيمىلىن ورىستەتۋ ارقىلى جۇڭگو مەن ۆيەتنام ەكى ەلدىڭ شەكاراسىنداعى وڭىرلەردىڭ ەسىرتكىگە تيىم سالۋ قىزمەتىندەگى سەلبەستىگىن اناعۇرلىم كۇشەيتىپ، ەسىرتكىگە ساياتىن زاڭعا قايشى قىلمىستىق ارەكەت وتكىزۋشىلەردى پارمەندى سەسكەندىرگەن، سونىمەن بىرگە، جۋىرداعى جىلداردان بەرگى ەسىرتكىگە تيىم سالۋ قىزمەتىندەگى جەتىستىكتەردى ايگىلەۋ، جاڭا تيپتى ەسىرتكى ونىمدەرىنەن ساقتانۋ جاعىنداعى بىلىمدەردى جالپىلاستىرۋ ارقىلى حالىق جۇرتشىلىعىنىڭ، وتە – موتە، جاستار مەن ورەندەردىڭ ەسىرتكىنى پارىقتاي ءبىلۋ، ەسىرتكىدەن ساقتانۋ، ەسىرتكىدەن اۋلاق بولۋ تانىمىن جوعارىلاتقان.

كەلۋ قاينارى: حالىق تورابى