لي چياڭ جۇڭگونىڭ دامۋى جونىندەگى جوعارى جىكتەگىلەر تالقى مىنبەرىنىڭ 2015 - جىلعى جىلدىق ءماجىلىسىنىڭ اشىلۋ سالتىنا قاتىناستى ءارى ارقاۋ ءسوز سويلەدى

شينحۋا اگەنتتىگى، 3 - ايدىڭ 23 - كۇنى، بەيجيڭ (تىلشىلەر حان جيە، دۇڭ شۋە). مەملەكەتتىك كەڭەستىڭ زۇڭليى لي چياڭ 3 - ايدىڭ 23 - كۇنى تۇستەن بۇرىن بەيجيڭدە جۇڭگونىڭ دامۋى جونىندەگى جوعارى جىكتەگىلەر تالقى مىنبەرىنىڭ 2015 - جىلعى جىلدىق ءماجىلىسىنىڭ اشىلۋ سالتىنا قاتىناستى ءارى ارقاۋ ءسوز سويلەدى.

لي چياڭ مىنالاردى ءبىلدىردى: ءتوراعا شي جينپيڭ اتاپ كورسەتكەندەي، دامۋ − ادامزات قوعامىنىڭ ماڭگىلىك تاقىرىبى. كوپشىلىك جۇڭگونىڭ ەكونوميكالىق دامۋ جاعدايىنا، سونداي - اق دۇنيە ءجۇزىنىڭ دامۋ بەتالىسىنا ەرەكشە كوڭىل بولۋدە. ءبىر مەزگىلدەن بەرى جۇڭگونىڭ ەكونوميكاسى مەن دۇنيە ءجۇزىنىڭ جاعدايىنا تۇرلىشە جىككە، تۇرلىشە كوز اياعا نەگىزدەلىپ باقىلاۋ جۇرگىزۋ، تالداۋ جاساۋ قاۋىرت كوبەيدى، مۇنىڭ ىشىندە دۇرىس كوزقاراس از ەمەس. بۇل ارادا مەن دە ءۇش ءتۇرلى تۇرعىدان كوپشىلىكپەن كەيبىر باقىلاۋ جانە ويىمدى ورتاقتاسقىم كەلەدى.

ءبىرىنشى تۇرعىدا: ”كوكتەم مەرەكەسى ەكونوميكاسىنان“ جۇڭگونىڭ دامۋ ومىرشەڭدىك كۇشىنە كوز جىبەرۋ. بيىلعى كوكتەم مەرەكەسىنىڭ الدى - ارتىندا جۇڭگو ەكونوميكاسىندا ءبىر توپ قۇبىلىس دارەجەسىندەگى كورىنەۋ ءتۇيىن جارىققا شىقتى. كينو، قار - مۇز، مادەنيەت، ساياحات سياقتى تۇتىنۋ بازارىنىڭ قولامتالى تۇيىندەرى ارت - ارتىنان جارىققا شىعىپ، ەل ىشىندەگى ەكونوميكالىق اينالىمنىڭ وراسان زور كومەسكى كۇشىن ايگىلەدى. ”حاڭجوۋداعى التى ايداعار“ سياقتى العاش قۇرىلعان كاسىپورىندار ۋاكىلدىك ەتكەن عىلىم - تەحنيكادا قامال الۋ ۇزدىكسىز جارىققا شىعىپ، جاڭالىق اشۋدىڭ، جاسامپازدىقتىڭ وراسان زور قۋاتىن ايگىلەدى. جاسىل ءۇي ەلەكتر جابدىقتارى، جاڭا ەنەرگيا كاسىبى سياقتى جاسىل ەكونوميكا سالتقا اينالىپ، تيپىن وزگەرتىپ دامۋدىڭ وراسان زور كەڭىستىگىن ايگىلەدى. تۇرلىشە سالاداعى جاڭاشا قوزعاۋشى كۇشتەر ۇزدىكسىز زورايدى، بۇلار جۇڭگو ەكونوميكاسىنا، ءسوز جوق، باياندى دامۋ قوزعاۋشى كۇشىن الا كەلەدى.

ەكىنشى تۇرعىدا: جۇڭگونىڭ ەكونوميكالىق ساياساتىن مەملەكەتتىك ەكى ماجىلىستەن ۇعىنۋ. بيىل جۇڭگونىڭ ەكونوميكانى ارتتىرۋ نىساناسىن %5 اينالاسىندا بەلگىلەۋى جۇڭگونىڭ ەكونوميكالىق بازيس شارت - جاعدايىن تەرەڭ يگەرۋىنەن ءارى ءوزىن جونگە سالۋ قابىلەتى مەن بولاشاقتاعى دامۋ كومەسكى كۇشىنە بايلانىستى بەرىك سەنىمىنەن باستاۋ الادى. ءبىز ساياساتتىق سەرپىندى ارتتىرۋ مەن بازار كۇشىن جۇمىلدىرۋدى ۇشتاستىرۋعا باسا ءمان بەرىپ، وسى مەجەلى نىسانانى قۇلشىنا جۇزەگە اسىرامىز. ءبىر جاعىنان، اناعۇرلىم بەلسەندى، ۇتىمدى ماكرولىق ساياسات اتقارىپ، كەرى پەريودتى رەتتەۋ تەبىنىن ونان ارى ارتتىرىپ، قاجەتتى كەزدە جاڭا ساياسات شىعارىپ، ەكونوميكانىڭ ۇزدىكسىز جاقسارۋىنا، ورنىقتى اينالىمىنا پارمەندى تىرەك ازىرلەيمىز. ەندى ءبىر جاعىنان، ەكونوميكالىق ءتۇزىلىس رەفورماسىن تەرەڭدەتىپ، بۇكىل ەل بويىنشا بىرلىككە كەلگەن ءىرى بازار قۇرىلىسىن ۇزدىكسىز ىلگەرىلەتىپ، ەكونوميكالىق اينالىمنىڭ توسىلۋ ءتۇيىنىن كۇش سالا اشىپ، ءتۇرلى شارۋاشىلىق تۇلعالارىنا تاماشا دامۋ ورتاسىن جاراتىپ، كاسىپورىنداردىڭ جاڭالىق اشۋ، جاسامپازدىق جاراتۋ جونىندەگى ساياساتتىق قولداۋىن كۇشەيتىپ، دامۋدىڭ ىشكى قوزعاۋشى كۇشىن ارتتىرامىز.

ءۇشىنشى تۇرعىدا: حالىقارالىق وزگەرىس تۇرعىسىنان دۇنيە ءجۇزىنىڭ دامۋىنىڭ، العا باسۋىنىڭ دۇرىس جولىنا وي جۇگىرتۋ. بۇگىنگى دۇنيە ءجۇزى ەكونوميكاسىنىڭ ۇساقتالۋى كۇشەيىپ، ورنىقسىز، تۇراقسىز بولۋى مەملەكەتتىڭ بازاردى اشىق ۇستاپ، كاسىپورىنداردىڭ بايلىقتان ورتاق يگىلىكتەنىپ، حاۋىپ - قاتەر مەن سىن - سايىسقا قول ۇستاسا توتەپ بەرىپ، بىرگە گۇلدەنۋدى جۇزەگە اسىرۋىن ءتىپتى دە قاجەت ەتەدى. جۇڭگو باستان - اياق وزىندىك دامۋدى دۇنيە جۇزىلىك دامۋمەن تىعىز ۇشتاستىرىپ، ەكونوميكانىڭ جاھاندانۋىنىڭ دۇرىس بەتالىسىنا تاباندى بولىپ، ناعىز كوپ جاقتىلىقتى امالياتتا ايگىلەپ، دۇنيە جۇزىلىك بەيبىت دامۋ ىستەرىنىڭ ورنىقتى، تۇراقتى كۇشى بولۋعا قۇلشىنادى. ءبىز ەسىك اشۋ سەلبەستىگىن تاباندىلىقپەن ىلگەرىلەتىپ، حالىقارادا جاپپاي قولدانىلاتىن ەرەجەدەگى ءادىل باسەكەنى دارىپتەپ، ەركىن ساۋدانى جانە دۇنيە جۇزىلىك كاسىپ تىزبەگى مەن قامداۋ تىزبەگىنىڭ ىركىلىسسىزدىگىن، ورنىقتىلىعىن قورعاپ، ءار ەل كاسىپورىندارىنىڭ بازارعا كىرۋ رۇقساتىن ونان ارى كەڭەيتىپ، كاسىپورىنداردىڭ كوڭىل ءبولىپ وتىرعان ماسەلەلەرىن بەلسەنە شەشىپ، شەتەل قارجىلاندىرعان كاسىپورىنداردىڭ جۇڭگو بازارىمەن ىشكەرىلەي توعىسۋىنا كومەكتەسەمىز. كاسىپورىنشىلاردىڭ جاھاندانۋدىڭ باتىل قورعاۋشىسى، ىلگەرىلەتۋشىسى بولىپ، ءبىر نيەتپەن سەلبەسىپ، شىن ىقىلاسپەن سەلبەسىپ، سىڭار جاقتىلىق پەن قورعانىمپازدىقتى تەجەپ، ءوزارا پايدا جەتكىزۋ، ءوزارا تيىمدىلىك جاساۋ بارىسىندا اناعۇرلىم زور دامۋدى جۇزەگە اسىرۋىن ءۇمىت ەتەمىن.

ۋ جىڭلۇڭ اشىلۋ سالتىنا قاتىناستى.

وسى رەتكى جىلدىق ءماجىلىستى مەملەكەتتىك كەڭەستىڭ دامۋدى زەرتتەۋ ورتالىعى وتكىزدى. جاڭا دامۋ بانكەسىنىڭ باستىعى روسسەۆ، ازيا دامۋ بانكەسىنىڭ باستىعى ماساتسۋگۋ اساكاۆا، سونداي - اق ەل ءىشى - سىرتىنداعى كاسىپورىنشىلاردان، ۇكىمەت ءمانساپتىلارىنان، مامان - وقىمىستىلاردان جانە حالىقارالىق ۇيىمداردىڭ ۋاكىلدەرىنەن 720 ادام اشىلۋ سالتىنا قاتىناستى.

كەلۋ قاينارى: حالىق تورابى