بىلتىر 8 – ايدان بەرى تۇتىنۋشىلار كونەسىن جاڭاسىنا اۋىستىرۋ جولىمەن 90 ميلليونعا جۋىق جاڭا ەلەكتر جابدىعىن ساتىپ الدى

«حالىق گازەتى»، 3 - ايدىڭ 23 – كۇنى، بەيجيڭ (ءتىلشى ۋاڭ كى). 2025 – جىلعى مەملەكەتتىك ءۇي ەلەكتر جابدىقتارىن تۇتىنۋ ماۋسىمىنىڭ باستالۋ سالتى 3 - ايدىڭ 22 – كۇنى شاڭحايدا وتكىزىلدى. باستالۋ سالتىندا ساۋدا مينيسترلىگى جاريالاعان ساندى مالىمەتتە كورسەتىلۋىنشە، تۇتىنۋ بۇيىمدارىنىڭ كونەسىن جاڭاعا اۋىستىرۋ ساياساتىنىڭ جەبەۋىندە 2024 – جىلى 8 – ايدان قازىرگە دەيىن تۇتىنۋشىلار كونەنى جاڭاعا اۋىستىرۋ جولىمەن 90 ميلليونعا جۋىق ءۇي ەلەكتر جابدىعىن ساتىپ العان. بيىل جىل باسىنان بەرى كونەنى جاڭاعا اۋىستىرۋ ساياساتى جىل اتتاپ سول كۇيىندە اتقارىلدى، قازىرگە دەيىن 20 ميلليون 208 مىڭ تۇتىنۋشى 12 ۇلكەن ءتۇر بويىنشا 27 ميلليون 572 مىڭ ءۇي ەلەكتر جابدىعىن ساتىپ الىپ، ساتۋ كىرىسىنىڭ 93 ميلليارد 80 ميلليون يۋان ارتۋىن جەبەدى.

باستالۋ سالتىندا ”2024 – جىلى جۇڭگونىڭ جاراقسىز ەلەكتر جابدىقتارىن جيناپ الىپ ءبىر جاقتى ەتۋ كاسىبىنىڭ دامۋ بايانداماسى“ مەن ”2025 – جىلعى ءۇي ەلەكتر جابدىقتارىن تۇتىنۋ اۋقىمى“ جاريالاندى. ءۇي ەلەكتر جابدىقتارىنىڭ كونەنى جاڭاعا اۋىستىرۋ ساياساتىنىڭ كۇشەيۋىنە ىلەسە، ءۇي ەلەكتر جابدىقتارىنىڭ ”زەردەلىگە“ اۋىستىرىلۋى نەگىزگى تۇتىنۋ بەتالىسىنا اينالىپ، جاسىل تۇتىنۋ ۇستانىمى قالىپتاسىپ كەلەدى، تۇتىنۋشىلاردىڭ اقاۋسىز ەلەكتر جابدىقتارىنا بولعان قاجەتى دە ۇزدىكسىز جوعارىلاۋدا. ساندى مالىمەتتە كورسەتىلۋىنشە، 2024 – جىلى ەلىمىزدىڭ ءتۇستى تەلەۆيزور، اۋا رەتتەگىش،توڭازىتقىش، كىر جۋعىش جانە اسحانا ەلەكتر جابدىقتارى بازارىنداعى زەردەلى ونىمدەردىڭ بولشەك ساتىلۋ مولشەرى %50 تەن اسقان.

تانىستىرۋعا قاراعاندا، ساۋدا مينيسترلىگى جەلىدەگى، جەلىدەن تىسقارى ارنالاردى اناعۇرلىم ءبىر تۇتاس جوسپارلاپ، جەلىلەس قيمىلداردى ۇيىمداستىرىپ ورىستەتىپ، ”ساياسات + قيمىل“ ارقىلى دەم بەرۋ مەحانيزمىن ساپالىلاندىرىپ، زاۆودتاردى، ساۋداگەرلەردى جاڭاسىن شىعارۋعا، تۇعىرلاردى پايدا بەرۋگە، كاسىپورىنداردى تيىمدىلىك جاساۋعا شابىتتاندىرىپ، ءۇي ەلەكتر جابدىقتارىنىڭ كونەنى جاڭاعا اۋىستىرۋ ساياساتىنىڭ اسەرىن زورايتىپ، ءۇي ەلەكتر جابدىقتارىنىڭ جاڭالانۋ تۇتىنۋ كومەسكى كۇشىن ىسكە قوسىپ، حالىقتىڭ تاماشا تۇرمىس قاجەتىن اناعۇرلىم ويداعىداي قاناعاتتاندىرۋعا، ەكونوميكانىڭ جوعارى ساپالى دامۋىنا دەم بەرۋگە بەلسەندى ۇلەس قوسادى ەكەن.

كەلەسى قادامدا جۇمىس ءتارتىبىن ساپالىلاندىرۋ، حاۋىپ - قاتەردەن ساقتانۋدى كۇشەيتۋ، ادىلدىككە، ادىلەتتىلىككە كەپىلدىك ەتۋ، جيناپ الۋ جۇيەسىن كەمەلدەندىرۋ سياقتى 4 جاق ارقاۋ ەتىلىپ، ءۇي ەلەكتر جابدىقتارىنىڭ كونەسىن جاڭاسىنا اۋىستىرۋ قىزمەتى ىشكەرىلەي ىلگەرىلەتىلمەك.

كەلۋ قاينارى: حالىق تورابى