لي چياڭ ازيا دامۋ بانكەسىنىڭ باستىعى ماساتسۋگۋ اساكاۆامەن كەزدەستى

شينحۋا اگەنتتىگى، 3 - ايدىڭ 24 – كۇنى، بەيجيڭ. مەملەكەتتىك كەڭەستىڭ زۇڭليى لي چياڭ 3 - ايدىڭ 24 - كۇنى تۇستەن كەيىن بەيجيڭدەگى حالىق سارايىندا ازيا دامۋ بانكەسىنىڭ باستىعى ماساتسۋگۋ اساكاۆامەن كەزدەستى.

لي چياڭ مىنالاردى ءبىلدىردى: تاياۋ جىلداردان بەرى وڭىرلىك ساياسي الاساپىراندىق، قورعانىمپازدىق باس كوتەرۋ سياقتى فاكتورلاردىڭ ىقپالىنا ۇشىراپ، دۇنيە ءجۇزى ەكونوميكاسىنىڭ قالپىنا كەلۋى باياۋلاپ، ورنىقسىزدىق، تۇراقسىزدىق كوبەيدى. وسىنداي جاعدايدا ازيا ەلدەرى ىنتىماقتى، سەلبەستىكتى كۇشەيتىپ، كوپ جاقتىلىققا تاباندى بولىپ، وڭىرلىك ەكونوميكانىڭ ءبىر تۇلعالانۋىن كۇش سالا ىلگەرىلەتىپ، ساۋدا، قارجى قوسۋ، تەحنيكا سياقتى اينالىمعا كەدەرگى بولاتىن ءتۇرلى كەدەرگىلەردى تالقانداپ، كاسىپ تىزبەگى مەن قامداۋ تىزبەگىنىڭ ورنىقتىلىعىن، ىركىلىسسىزدىگىن قورعاۋى، سونىمەن بىرگە، ماكرولىق ساياساتتاردى سايكەستىرۋدى كۇشەيتىپ، عىلىم - تەحنيكادا جاڭالىق اشۋ اۋىس - كۇيىسىن، سەلبەستىگىن تەرەڭدەتىپ، ازيا ەكونوميكاسىنىڭ ونىمدىلىگى مەن سەرپىمدىلىگىن ۇزدىكسىز جوعارىلاتىپ، ءتۇرلى حاۋىپ - قاتەرگە اناعۇرلىم ويداعىداي توتەپ بەرىپ، بىرگە دامۋدى قول ۇستاسا جۇزەگە اسىرۋى كەرەك. جۇڭگو جاق ءىرى ەلدىڭ ءتيىستى جاۋاپكەرشىلىگىن ارقالاپ، ورنىقتى ەكونوميكالىق ارتۋ، بەلسەندى ەسىك اشۋ سەلبەستىگى ارقىلى ازيا مەن دۇنيە ءجۇزىنىڭ دامۋىنا اناعۇرلىم كوپ ورنىقتىلىق ۇستەيدى.

لي چياڭ بىلاي دەپ اتاپ كورسەتتى: ازيا دامۋ بانكەسى − ازيا - تىنىق مۇحيت ءوڭىرىنىڭ ماڭىزدى كوپ جاقتى اشۋ قۇرىلىمى. جۇڭگو جاق ازيا دامۋ بانكەسىمەن جان - جاقتى سەلبەستىكتى ونان ارى كەڭەيتىپ، ەكى جاقتىڭ سەرىكتەستىك قاتىناسىنىڭ تىڭ ساتىعا كوتەرىلۋىن ىلگەرىلەتىپ، ءوزارا پايدا جەتكىزىپ، تەڭ يگىلىككە كەنەلۋدى اناعۇرلىم ويداعىداي جۇزەگە اسىرىپ، وسى ءوڭىردى اناعۇرلىم كوپ الەۋمەتتىك ونىممەن قامداۋدى قالايدى. ەكى جاق قورشاعان ورتانى قورعاۋ، جاسىل، تومەن كومىرتەكتى دامۋ، زەينەتكەرلىك جانە ەمدەۋ سياقتى سالالارداعى قارجى سەلبەستىگىن كۇشەيتىپ، جاڭادان گۇلدەنگەن كاسىپ سالالارىن دامىتۋ، قازىنا – سالىق ءتۇزىلىسى رەفورماسى، قارتتانۋعا توتەپ بەرۋ سياقتى سالالارداعى ءبىلىم سەلبەستىگىن تەرەڭدەتۋى كەرەك. جۇڭگو جاق ازيا - تىنىق مۇحيت وڭىرىندەگى وركەندەپ كەلە جاتقان مۇشەلەرمەن كەدەيلىكتى ازايتۋ، سيفرلى ەكونوميكا سياقتى جاقتارداعى پايدالى تاجىريبەلەردى ءبولىسىپ، ولاردىڭ سىن - سايىسقا اناعۇرلىم ويداعىداي توتەپ بەرىپ، باياندى دامۋدى جۇزەگە اسىرۋىن قولدايدى.

ماساتسۋگۋ اساكاۆا مىنالاردى ءبىلدىردى: قازىر حالىقارالىق ساۋدانىڭ ۇساقتالۋى كۇشەيىپ كەلەدى، جۇڭگو رەفورمانى ونان ارى تەرەڭدەتۋگە جانە جوعارى دەڭگەيدە سىرتقا ەسىك اشۋعا كۇش سالىپ، ءوز ەكونوميكاسىنىڭ ورنىقتى ارتۋىن جۇزەگە اسىرۋمەن بىرگە، ازيا مەن دۇنيە ءجۇزى ەكونوميكاسىنىڭ ارتۋىن جەبەۋگە دە ماڭىزدى ۇلەس قوستى. ازيا دامۋ بانكەسى جۇڭگومەن سەلبەستىككە ايرىقشا ءمان بەرەدى، كەلەر جىلى ەكى جاقتىڭ سەلبەستىك قارىم - قاتىناس ورناتقاندىعىنىڭ 40 جىلدىعىن قۇتتىقتاۋدى وراي ەتىپ، جۇڭگو جاقپەن بىلىمدە جاڭالىق اشۋ، جاسىل دامۋ سياقتى كوپ سالاداعى سەلبەستىكتى كۇشەيتىپ، ازيا - تىنىق مۇحيت ءوڭىرىنىڭ دامۋىن جەبەپ، ازيا دامۋ بانكەسىنىڭ جۇڭگومەن سەلبەستىك سەرىكتەستىك قارىم - قاتىناسىنىڭ اناعۇرلىم جوعارى دەڭگەيگە كوتەرىلۋىن ىلگەرىلەتۋدى قالايدى.

كەلۋ قاينارى: حالىق تورابى