ەكى تاراۋ الدىن الا قوراپتالعان ازىق – تۇلىكتەرگە ”قوسپاسىز“ دەگەن سياقتى سوزدەردى قولدانۋعا تيىم سالادى 

3 – ايدىڭ 27 – كۇنى، مەملەكەتتىك دامۋ – رەفورما كوميتەتى مەملەكەتتىك بازاردى باقىلاۋ – باسقارۋ باس مەڭگەرمەسىمەن بىرگە ازىق – تۇلىك حاۋىپسىزدىگىنە قاتىستى مەملەكەتتىك ولشەمدەردەن 50 ءتۇرلى ولشەمدى جاريالادى ءارى 9 ءتۇرلى ولشەمگە وزگەرىس ەنگىزدى. مۇنىڭ ىشىندە مىنانى ايقىن اتاپ كورسەتتى: ازىق – تۇلىكتەردىڭ ماتەريالدارىن ”قوسپا قوسىلمايدى“، ”قوسپاسىز“ دەگەن سياقتى سوزدەردى قولدانۋ ارقىلى ايرىقشا دارىپتەۋگە بولمايدى. ”قوسپا قوسىلمايدى“ دەگەن ءسوز ءوندىرۋ بارىسىنا قاراتا ايتىلعان بولىپ، بۇل وندىرىلگەن ازىق – تۇلىكتەرگە قوسىلعان قوسىمشا ماتەريالداردىڭ نەمەسە ازىق - تۇلىكتەردىڭ قۇرامىن كورسەتپەيدى.

مىسالى، ءمالىم جەمىس شىرىنىنان جاسالعان سۋسىننىڭ بەلگىسىنە ”قانت قوسىلماعان“ دەپ جازىلعان، الايدا، جەمىس شىرىنىنىڭ وزىندە كوپ مولشەردە قانت قۇرامى بار، سوندىقتان، مۇنداي ونىمدەردە ايتىلعان ”قانت قوسىلماعان“ دەگەن ءسوز ءونىمنىڭ قۇرامىندا قانت جوق دەگەندى بىلدىرمەيدى، بۇل كوپشىلىكتى وڭاي الجاستىرادى؛ كەيبىر ”تاتتىلەندىرگىش قوسىلماعان“ دەپ جازىلعان قانت قۇرامى بار سۋسىنداردىڭ قۇرامىندا باسقا ازىق – تۇلىك قوسپاسى قامتىلعان بولۋى مۇمكىن، بۇل تۇتىنۋشىلاردىڭ دۇرىس تانۋىنا ىقپال جاسايدى. الدىن الا قوراپتالعان ازىق – تۇلىكتەرگە ”قوسپاسىز”، ”قوسپا قوسىلمايدى“ دەگەن سياقتى سوزدەردى قولدانۋعا تيىم سالۋداعى ماقسات تۇتىنۋشىلاردى ازىق – تۇلىكتىڭ بەلگىسىندەگى ينفورماتسيالاردى دۇرىس تۇسىنۋگە، اناعۇرلىم عىلىمي، اناعۇرلىم دەربەس تۇردە ازىق – تۇلىكتەردى تاڭداۋعا جەتەلەۋ، تۇتىنۋشىلاردىڭ ۇگىت ءۇشىن جازىلعان سوزدەرگە كوزسىزدىكپەن نازار اۋدارىپ، ءونىمنىڭ ناقتى قاسيەتىنە نەمقۇرايدى قاراۋىنان، مۇنداي جاعدايدىڭ ازىق – تۇلىك حاۋىپسىزدىگى مەن دەنساۋلىققا كومەسكى حاۋىپ توندىرۋىنەن ساقتانۋ بولىپ تابىلادى.

كەلۋ قاينارى: حالىق تورابى