سوتسياليستىك وسىزاماندانعان جاڭا شيزاڭ قۇرۋ جاعىندا اناعۇرلىم زور ىسكەرلىك كورسەتتى

بيىل _ شيزاڭنىڭ دەموكراتيالىق رەفورماسى مەن ميلليونداعان باسىبايلى شارۋا ازات بولعاندىعىنىڭ 66 جىلدىعى ءارى ”شيزاڭداعى ميلليونداعان باسىبايلى شارۋا ازاتتىعىن ەسكە ءتۇسىرۋ كۇنى“ بەلگىلەندىگىنىڭ 16 جىلدىعى. شيزاڭنىڭ قوعامدىق تۇزىمىندە ءبىر قاداممەن مىڭ جىلدىق بۇرىلىس تۋدىرعان وسى ۇلى وزگەرىستى ەسكە الىپ، كەدەيلىك، مەشەۋلىكتەن وركەنيەتتىڭ العا باسۋىنا دەيىنگى ۇلى سەكىرىستى ەسكە الىپ، شيزاڭداعى ءار ۇلت حالقىنىڭ سەنىمىن اناعۇرلىم بەكەمدەپ، رۋحىن اناعۇرلىم اسقاقتاتىپ، پارتيانىڭ باسشىلىعىندا اناعۇرلىم كوركەم بولاشاق جاراتۋعا كۇش سالدى.

بۇرىنعى باسىبايلى شارۋالار قوجايىن بولىپ، قارلى ءۇستىرتتىڭ كونە بەت - بەينەسى جاڭالانىپ، 66 جىلدىڭ الدىنداعى دەموكراتيالىق رەفورما ۇكىمەت پەن ءدىن توعىسقان فەودالدىق باسىبايلى شارۋالار ءتۇزىمىن تۇبەگەيلى كۇشىنەن قالدىرىپ، شيزاڭنىڭ وسىزاماندانۋ قۇرىلىسىنا جول اشتى. 66 جىلدان بەرى قارلى ءۇستىرت ادامزاتتىڭ دامۋىنىڭ، العا باسۋىنىڭ ايبىندى جەڭىس جىرىن اسقاقتاتا شىرقاپ، جەر - الەمدى جاڭارتاتىن كەرەمەتتەر جاراتتى. اسىرەسە، پارتيا 18 ـ قۇرىلتايىنان بەرى شي جينپيڭ جولداستى ۇيىتقى ەتكەن پارتيا ورتالىق كوميتەتىنىڭ پارمەندى باسشىلىعىندا، شيزاڭ دامۋى ەڭ جاقسى، وزگەرىسى ەڭ زور، بۇقارا ەڭ كوپ يگىلىككە كەنەلگەن جاڭا داۋىرگە قادام تاستادى. مىڭداعان جىلدىق مۇلدەمدىك كەدەيلىك ماسەلەسىنەن تۇبەگەيلى ارىلىپ، ارحيۆ تۇرعىزىلىپ، كارتوچكا بەرىلگەن 628 مىڭ كەدەي كەدەيلىكتەن ارىلىپ، شەكارانى بەكەمدەپ، شەكارانى گۇلدەندىرىپ، حالىقتى اۋقاتتاندىرۋ ارەكەتىن ىشكەرىلەي اتقارۋعا دەيىن، جالپى تۇرعىنداردىڭ جان باسىندىق يگەرىلمەلى تابىسى 2012 ـ جىلعى 8 مىڭ 568 يۋاننان 2024 ـ جىلى 31 مىڭ 358 يۋانعا جوعارىلاپ، ونان كوپ ساتىلى قوعامدىق قامتاماسىزداندىرۋ جۇيەسىن نەگىزىنەن قۇرىپ شىعۋعا دەيىن، وقۋ ـ اعارتۋ، ەمدەۋ، تۇرعىن ءۇي سياقتىلاردىڭ قامتاماسىز ەتۋ دەڭگەيى جاپپاي جوعارىلادى... بۇگىنگى تاڭدا گۇلدەنىپ - كوركەيگەن سوتسياليستىك جاڭا شيزاڭ دۇنيەنىڭ بيىك شىڭىندا ەڭسە كوتەرىپ تۇر، قارلى القاپ ۇستىرتىندە بۇرىن - سوڭدى بولماعان نۇرلى بولاشاق جارىققا شىقتى.

شيزاڭنىڭ جان - جاقتى العا باسۋى مەن تاريحي تابىستارى دەموكراتيالىق رەفورمانىڭ شيزاڭ تاريحىنداعى ەڭ ۇلى، ەڭ تەرەڭ قوعامدىق وزگەرىس، شيزاڭداعى ءار ۇلت حالقىنا شىنايى باقىت جاراتاتىن ۇلى باستاما ەكەندىگىن تالاسسىز دالەلدەدى. كوممۋنيستىك پارتيا بولماسا، جاڭا جۇڭگو بولماق ەمەس، سوتسياليستىك جاڭا شيزاڭ بولماق ەمەس، ميلليونداعان باسىبايلى شارۋالاردىڭ ەڭسە كوتەرىپ، ازاتتىققا جەتۋى بولماق ەمەس. پارتيا ورتالىق كوميتەتىنىڭ شيزاڭ قىزمەتى جونىندەگى باعىت ـ ساياساتتارى بۇكىلدەي دۇرىس، جاڭا داۋىردەگى پارتيانىڭ شيزاڭدى جونگە سالۋ جالپى جوباسى _ شيزاڭ قىزمەتىن ويداعىداي ىستەۋدىڭ ءتۇبىرلى تياناعى. ”14 ـ بەسجىلدىقتىڭ“ شەشۋشى جەڭىسىنە قول جەتكىزىپ، جاڭا ساپاردى ارشىندى قاداممەن باسۋدا، ءبىز پارتيا ورتالىق كوميتەتىنىڭ شەشىمدەرىنىڭ، ورنالاستىرۋلارىنىڭ شيزاڭدا تياناقتانىپ تامىر تارتۋىنا، گۇل اشىپ جەمىس بەرۋىنە شىنايى كەپىلدىك ەتىپ، شيزاڭنىڭ باياندى تىنىشتىعى مەن جوعارى ساپالى دامۋىن ىلگەرىلەتۋدە جاڭا ونىمدىلىككە قول جەتكىزىپ، سوتسياليستىك وسىزاماندانعان جاڭا شيزاڭ قۇرۋدا اناعۇرلىم زور ىسكەرلىك كورسەتۋىمىز كەرەك.

باس شۋجي شي جينپيڭ بىلاي دەپ باسا دارىپتەدى: ”ۇلتتار ىنتىماعى − ەلىمىزدەگى ءار ۇلت حالقىنىڭ جان تامىرى، جۇڭحۋا ۇلتى ورتاق تۇلعا تانىمى − ۇلتتار ىنتىماعىنىڭ نەگىزى“. شيزاڭعا باعىتتامالى كومەكتەسۋ قىزمەتى ورىستەتىلگەننەن بەرى شيزاڭعا كومەككە كەلگەن 12 مىڭعا جۋىق كادر ـ دارىندىلار وتتەگى تاپشى بولسا دا، رۋحىن جاسىتپاي، جاپا ـ ماشاقاتتان قورىقپاي، شيزاڭنىڭ دامۋىنا پارمەندى قوزعاۋشى كۇش قوستى. شيزاڭ ديڭرىدا جەر سىلكىنىسى تۋىلعاننان كەيىن، ورتالىقتاعى ورىندار تۋىسقان ولكەلەرمەن ءبىر نيەت، ءبىر تىلەكتە بولىپ، قوعامدىق قۇتقارۋ كۇشتەرى شۇعىل توپتالىپ، جەر سىلكىنىسىنە قارسى اتتانىپ، اپاتتان قۇتقارۋ شايقاسىندا قول ۇستاسا جەڭىسكە جەتىپ، جۇڭحۋا ۇلتى ءبىر ءۇيلى جانداي تەرەڭ سۇيىسپەنشىلىكتى بەينەلەپ، تاۋقىمەتتى بىرگە تارتىپ، ەتەنە سۇيىسپەنشىلىكتى ايگىلەدى. جۇڭگو ۇلگىسىندەگى وسىزامانداندىرۋدى ىلگەرىلەتۋ بۇكىل ەلدەگى ءار ۇلت حالقىنىڭ ىنتىماقتاسا كۇرەس جۇرگىزۋىن قاجەت ەتەدى. جۇڭحۋا ۇلتى ورتاق تۇلعا تانىمى سىندى وسى نەگىزگى ارقاۋدى مىقتاپ يگەرىپ، ۇلت ماسەلەسىن شەشۋدىڭ جۇڭگوشا دۇرىس جولىمەن بۇلجىماي ءجۇرىپ، وتاننىڭ تۇتاستىعىن قورعاۋدى، ۇلتتار ىنتىماعىن كۇشەيتۋدى شيزاڭ قىزمەتىنىڭ كوزدەۋ ءتۇيىنى جانە كۇش سالۋ ءتۇيىنى ەتىپ، ءار ۇلت پەرزەنتتەرىنىڭ قول ۇستاسىپ، تىزە قوسا وتىرىپ، ارماندى ءبىر نيەتپەن جۇزەگە اسىرىپ، بولاشاقتى بىرگە جاراتۋىن ىلگەرىلەتۋىمىز كەرەك.

جوعارى ساپالى دامۋ _ جاڭا داۋىردەگى بۇلجىماس قاعيدا ءارى شيزاڭنىڭ دامۋىنىڭ، العا باسۋىنىڭ تابيعي تالابى. وتكەن جىلى شيزاڭنىڭ وڭىرلىك ءوندىرىس جالپى ءونىم قۇنى سايكەس مەزگىلدەگىدەن %6.3 ارتتى، 9 ءتۇرلى كورسەتكىشتىڭ ارتۋ قارقىنى بۇكىل ەلدىڭ الدىڭعى لەگىندە بولدى، تازا ەنەرگيانى قامتىعان 9 ءىرى كاسىپ سالاسىنىڭ ساپاسىن ۇزدىكسىز جوعارىلاتىپ، ونىمدىلىگىن ارتتىرۋ شيزاڭنىڭ رەفورما مەن دامۋدىڭ جالىندى ومىرشەڭدىك كۇشىن جانە قۇدىرەتتى قوزعاۋشى كۇشىن تولىق ايگىلەدى. قازىر شيزاڭنىڭ دامۋى مەن العا باسۋى ەڭ تاماشا تاريحي وراي مەزگىلىندە تۇر، شيزاڭنىڭ حاۋىپسىزدىك قالتقىلىق رولى، ەنەرگيا بايلىعى ابزالدىعى، ستراتەگيالىق ارنالىق ورنى ۇزدىكسىز كورنەكتىلەندى. بۇكىل ەلدىڭ جالپى جاعدايىنداعى ستراتەگيالىق ورىندى مىقتى يگەرىپ، ارتىقشىلىعىن اسىرىپ، كەمشىلىگىن تولىقتاپ، جەرگىلىكتى جاعدايعا قاراي ىستەپ، شيزاڭنىڭ ءىس جۇزىندىگىنە ۇيلەسەتىن جوعارى ساپالى دامۋ جولىمەن ءجۇرۋ كەرەك. حالىق تۇرمىسىن جاقسارتۋدى، جۇرت تىلەگىن ۇيىستىرۋدى ەكونوميكالىق، قوعامدىق دامۋدىڭ شىعار ءتۇيىنى جانە تابان تىرەر تياناعى ەتىپ، ورنىقتىلىق، دامۋ، ەكولوگيا، شەكارانى كۇشەيتۋ سىندى 4 ءىرى ءىستى ويداعىداي يگەرىپ، كەدەيلىكتەن ارىلتۋدان قامال الۋدىڭ جەتىستىكتەرىن بەكەمدەپ، كەڭەيتىپ، اۋىل ـ قىستاقتاردى جاپپاي گۇلدەندىرۋدى ىلگەرىلەتىپ، ءار ۇلت بۇقاراسىنىڭ باقىت كورسەتكىشىن ۇزدىكسىز جوعارىلاتۋ كەرەك.

66 جىل ءوتتى، جاڭا جورىق ادامدى العا باسۋعا جەبەيدى. شي جينپيڭ جولداستى ۇيىتقى ەتكەن پارتيا ورتالىق كوميتەتىنىڭ توڭىرەگىنە اناعۇرلىم تىعىز ىنتىماقتاسىپ، شي جينپيڭ جاڭا ءداۋىر جۇڭگوشا سوتسياليزم يدەياسىن جاپپاي دايەكتىلەندىرىپ، سەنىمدى بەكەمدەپ، شىنايى يگەرىپ، ناقتى ىستەپ، قايراتتانا العا ۇمتىلىپ، شيزاڭنىڭ باياندى تىنىشتىعى مەن جوعارى ساپالى دامۋىنىڭ شۇعىلالى داستانىن ۇزدىكسىز جازىپ، جۇڭگو ۇلگىسىندەگى وسىزامانداندىرۋدى ىلگەرىلەتۋدىڭ ۇزدىك جاۋابىن بىرگە جازايىق.

شيزاڭنىڭ بولاشاعى، ءسوز جوق، اناعۇرلىم كوركەم بولادى!

شيزاڭداعى ءار ۇلت حالقىنىڭ تۇرمىسى، ءسوز جوق، ءتىپتى دە باقىتتى بولادى!

كەلۋ قاينارى: حالىق تورابى