لي چياڭ كايروعا جەتىپ، ەگيپەتتەگى رەسمي ساپارىن باستادى

7 - ايدىڭ 9 - كۇنى تۇستەن بۇرىن ەگيپەتتىڭ زۇڭليى مادبوليدىڭ ۇسىنىسى بويىنشا، مەملەكەتتىك كەڭەستىڭ زۇڭليى لي چياڭ كوتەرمەگە العان ۇشاقپەن كايرو حالىقارالىق اۋەجايىنا جەتىپ، ەگيپەتتەگى رەسمي ساپارىن باستادى. ەگيپەتتىڭ زۇڭليى مادبولي ۇكىمەتتىڭ جوعارى دارەجەلى ءمانساپتىلارىن باستاپ اۋەجايعا بارىپ قارسى الىپ، اۋەجايدا لي چياڭ زۇڭليگە ارناپ قارسى الۋ سالتىن وتكىزدى.

سۋرەتتى شينحۋا اگەنتتىگىنىڭ ءتىلشىسى لي شياڭ تۇسىرگەن

«حالىق گازەتى»، 7 - ايدىڭ 9 - كۇنى، كايرو (ءتىلشى چىن شاڭۋىن). ەگيپەتتىڭ زۇڭليى مادبوليدىڭ ۇسىنىسى بويىنشا، مەملەكەتتىك كەڭەستىڭ زۇڭليى لي چياڭ 7 - ايدىڭ 9 - كۇنى تۇستەن بۇرىن كوتەرمەگە العان ۇشاقپەن كايرو حالىقارالىق اۋەجايىنا جەتىپ، ەگيپەتتەگى رەسمي ساپارىن باستادى.

ەگيپەتتىڭ زۇڭليى مادبولي ۇكىمەتتىڭ جوعارى دارەجەلى ءمانساپتىلارىن باستاپ اۋەجايعا بارىپ قارسى الىپ، اۋەجايدا لي چياڭ زۇڭليگە ارناپ قارسى الۋ سالتىن وتكىزدى. لي چياڭ مادبوليدىڭ سەرىك بولۋىندا قۇرمەت قاراۋىلىن كوزدەن كەشىردى. جۇڭگونىڭ ەگيپەتتە تۇراتىن باس ەلشىسى لياۋ ليچياڭ دا اۋەجايعا بارىپ قارسى الدى.

لي چياڭ مىنالاردى ءبىلدىردى: جۇڭگو مەن ەگيپەت _ وركەنيەتتى بايىرعى ەلدەر. ديپلوماتيالىق قارىم ـ قاتىناس ورناتقان 70 جىلعا تاياۋ ۋاقىتتان بەرى ەكى ەل باستان ـ اياق ءبىر ـ ءبىرىن قولدايتىن جاقىن دوس، تاعدىرلاس ستراتەگيالىق سەرىك بولىپ كەلدى. تاياۋ جىلداردان بەرى ءتوراعا شي جينپيڭ مەن سيسي زۇڭتۇڭنىڭ ستراتەگيالىق جەتەكشىلىگىندە، جۇڭگو ـ ەگيپەت قارىم - قاتىناسى قارىشتاپ دامىپ، ءداستۇرلى دوستىق ۋاقىت وتكەن سايىن بەكەمدەلىپ، ساياسي ءوزارا سەنىمدىلىك ۇزدىكسىز تەرەڭدەپ، ناقتى سەلبەستىكتە سۇبەلى تابىستارعا قول جەتىپ، كوپ جاقتى سەلبەستىك جيىلەپ، پارمەندى بولىپ، وركەندەپ كەلە جاتقان ءىرى ەلدەردىڭ شىنايى ىنتىماقتاسىپ، بىرلەسىپ ءوزىن الۋەتتەندىرىپ، ءوزارا پايدا جەتكىزىپ، تەڭ يگىلىككە كەنەلۋىنىڭ، ءبىر ـ بىرىنە قارايلاسۋىنىڭ ۇلگىسىن ورناتتى. بىلتىر ەكى ەل مەملەكەت باسشىلارى ەكى رەت ديدارلاسىپ، جاڭا داۋىرگە بەت العان جۇڭگو ـ ەگيپەت تاعدىرلاس ورتاق تۇلعاسىن قۇرۋدى ىلگەرىلەتۋ جونىندە ماڭىزدى ورتاق تانىمعا كەلدى، جۇڭگو ـ ەگيپەت قارىم - قاتىناسىنىڭ دامۋى جاڭا ورايدى قارسى الدى. قازىر دۇنيە ءجۇزىنىڭ 100 جىلدىق وزگەرىس جاعدايى جەدەل قۇبىلىپ، ءتۇرلى سىن ـ سايىس تولاسسىز جارىققا شىققان جاعدايدا، جۇڭگو مەن ەگيپەت دۇنيە ءجۇزىنىڭ وڭتۇستىگىندەگى ماڭىزدى مۇشە رەتىندە، ستراتەگيالىق سەلبەستىكتى ونان ارى كۇشەيتىپ، ورتاق مۇددەنى قورعاپ، بەيبىتشىلىك پەن گۇلدەنۋدى بىرگە جەبەۋى كەرەك.

لي چياڭ بىلاي دەپ اتاپ كورسەتتى: جۇڭگو جاق ەگيپەت جاقپەن بىرگە قۇلشىنىپ، ەكى ەل مەملەكەت باسشىلارىنىڭ ستراتەگيالىق جەتەكشىلىگىندە، ەكى جاقتىڭ ءار سالاداعى سەلبەستىگىنىڭ ۇزدىكسىز تەرەڭدەۋىن، ناقتىلانۋىن ىلگەرىلەتىپ، جۇڭگو مەن ەگيپەتتىڭ جالپى بەتتىك ستراتەگيالىق سەرىكتەستىك قارىم - قاتىناسىنىڭ مازمۇنىن ۇزدىكسىز بايىتىپ، وزدەرىنىڭ دامۋى مەن ۇلتتىڭ گۇلدەنۋىن جەبەۋگە قۇدىرەتتى قوزعاۋشى كۇش قوسىپ، ءوڭىردىڭ جانە دۇنيە ءجۇزىنىڭ بەيبىتشىلىگى مەن ورنىقتىلىعىنا بەلسەندى كۇش قوسۋدى قالايدى.

لي چياڭ بريكس ەلدەرى باسشىلارىنىڭ 17 ـ ديدارلاسۋىنا قاتىناسقاننان كەيىن كايروعا كەلدى. ريو ـ دە ـ جانەيرودان اتتاناردا برازيليا ۇكىمەتىنىڭ ۋاكىلدەرى مەن جۇڭگونىڭ برازيليادا تۇراتىن باس ەلشىسى جۋ چيڭچياۋ اۋەجايعا بارىپ اتتاندىرىپ سالدى.

كەلۋ قاينارى: حالىق تورابى