گۋاڭدۇڭدا چيكۇنگۋنيا قىزباسىنا شالدىققانى جاڭادان تۇراقتاندىرىلعانداردىڭ سانى ازايا باستادى

جۇڭگو اقپارات اگەنتتىگىنىڭ 8 – ايدىڭ 3 – كۇنى گۋاڭجوۋدان بەرگەن حابارى. گۋاڭدۇڭ ولكەلىك اۋرۋدان ساقتانۋ جانە تىزگىندەۋ مەكەمەسى 8 – ايدىڭ 3 – كۇنى جاريالاعان مالىمەتكە قاراعاندا، 7 – ايدىڭ 27 – كۇنى ساعات نولدەن 8 – ايدىڭ 2 – كۇنى ساعات 24 كە دەيىن، بۇكىل ولكە بويىنشا جەرگىلىكتى ورىننان چيكۋنگۋنيا اۋرۋىنا شالدىققان جاڭادان ارتقان ناۋقاستاردىڭ سانى 2892 ادام بولعان، سالماقتى ناۋقاس دارەجەسىنە جەتكەن جانە قازا بولعان ناۋقاس جوق.

ءارقايسى قالالارداعى ناۋقاستاردىڭ سانى: فوشاندا 2770 ناۋقاس، گۋاڭجوۋدا 65 ناۋقاس، دۇڭگۋان مەن جۇڭشاننىڭ ءار بىرىندە 11 ناۋقاس، شىنجىن، جياڭمىن، جاۋچيڭ قالالارىنىڭ ءار بىرىندە 6 ناۋقاس، مەيجوۋدا 5 ناۋقاس، جۋحاي مەن حۇيجوۋدىڭ ءار بىرىندە 4 ناۋقاس، چاۋجوۋدا 2 ناۋقاس، ياڭجياڭ مەن يۇنفۋدىڭ ءار بىرىندە ءبىر ناۋقاس.

گۋاڭدۇڭ ولكەلىك اۋرۋدان ساقتانۋ جانە ونى تىزگىندەۋ ورتالىعىنىڭ جۇقپالى اۋرۋلاردان ساقتانۋ – تىزگىندەۋ باسقارماسىنىڭ باستىعى، جۇقپالى اۋرۋلاردان ساقتانۋ – تىزگىندەۋ باس مامانى كاڭ ميننىڭ اتاپ كورسەتۋىنشە، چيكۋنگۋنيا قىزباسى شىبار ماسانىڭ شاعۋى ارقىلى تارالادى، شىبار ماسا تۇنىق سۋدا تىرشىلىك ەتەدى، تەگەنەلەردى، قۇتىلاردى توڭكەرىپ قويۋ جانە ىركىلگەن سۋلاردى تازالاۋ ىندەتتى تىزگىندەۋگە پايدالى. سوندىقتان، بۇل ىندەتتەن ساقتانۋدىڭ تەتىگى ىركىلگەن سۋلاردى تازالاۋ، ماسانى جويۋ، ماسانىڭ شاعۋىنان ساقتانۋ.

كاڭ مين مىنانى اتاپ كورسەتتى: قازىر گۇڭدۇڭ ولكەسىندە ىندەتتىڭ جەدەل تارالۋى سىندى جاعداي العاشقى قادامدا تىزگىندەلگەن، وسى اپتادا تۇتاس ولكە بويىنشا اۋرۋعا جاڭادان شالدىققانداردىڭ سانىنىڭ ارتۋى باسەڭدەگەن، وتە – موتە، وزەكتى ءوڭىر سانالاتىن فوشان قالاسى شۇندى رايونىندا جاڭادان ناۋقاسقا شالدىققانداردىڭ سانى ۇزدىكسىز ازايعان. الايدا، حالىقارادا چيكۋنگۋنيا قىزباسى ىندەتى تارالۋدا، گۋاڭدۇڭنىڭ شەتەلمەن بارىس – كەلىسى ءجيى بولاتىندىقتان، اۋرۋدىڭ شەكارا سىرتىنان كىرۋ حاۋپى جالعاستى ساقتالادى. تاسقىن مەزگىلى مەن تايفىڭ داۋىلى، نوسەر قاتارلىلار قاباتتاسىپ، اۋرۋدى تاراتاتىن ماسانىڭ ارەكەتى جيىلەگەندىكتەن، ىندەتتەن ساقتانۋ – تىزگىندەۋ ءالى دە قيىن سىناقتارعا ءدوپ كەلۋدە.

گۋاڭدۇڭ ولكەلىك اۋرۋدان ساقتانۋ – تىزگىندەۋ مەكەمەسى قالا تۇرعىندارى، ورگاندار مەن كاسىپورىندار، ءىسورىندار، الەۋمەتتىك اۋماق قاتارلىلاردى ماسادان ساقتانۋ، ماسانى جويۋ ىستەرىنە قاتىناسۋعا ۇندەگەن، مۇندا بارلىق وتباسىلار ماسا ىستاعىش جاعۋ، ماسالىق تارتۋ، تورلى تەرەزە ورناتۋ، ىركىلگەن سۋلاردى تازالاۋ، قوقسىقتاردى تازالاۋ، سىرتقا شىققاندا ماسانى جولاتپايتىن ءيىستى سۋ جاعۋ قاتارلىلار قامتىلعان.

كەلۋ قاينارى: حالىق تورابى