وسى اپتادا شينجياڭنىڭ كوپ جەرىندە ىستىق ازداپ قايتادى

ءتىلشىنىڭ شينجياڭ اۋا رايى ستانسياسىنان ۇعىسۋىنشا، وسى اپتادا (7 – ايدىڭ 28 –كۇنىنەن 8 – ايدىڭ 3 – كۇنىنە دەيىن) شينجياڭنىڭ كوپ جەرىندەگى جوعارى تەمپەراتۋرا ازداپ قايتادى. جوعارى تەمپەراتۋرالى اۋا رايىنىڭ السىرەۋىنە بايلانىستى، ەكى رەت جاۋىن – شاشىن بولادى، سونىمەن جۇرت اسىعا كۇتكەن سالقىن اۋا رايى دا كەلەدى.

وسى اپتادا شينجياڭداعى ىستىق اۋا رايى سوڭعى مارەسىنە جەتەدى. مەجەمەن 7 - ايدىڭ 28 - كۇنى كۇندىزدەن 30 - كۇنى كۇندىزگە دەيىن، بۇكىل شينجياڭنىڭ جازىق وڭىرلەرىنىڭ باسىم كوپ بولەگىندە 35 سەلتسي گرادۋستان اساتىن جوعارى تەمپەراتۋرا بولادى، مۇنىڭ ىشىندە بايىنعولىن موڭعۇل اۆتونوميالى وبلىسىنىڭ، شىعىس شينجياڭنىڭ باسىم كوپ بولەگىنىڭ جانە تيانشاننىڭ سولتۇستىك بوكتەرىندەگى ءىشىنارا وڭىرلەردىڭ ەڭ جوعارى تەمپەراتۋراسى 37 سەلتسي گرادۋستان اسادى، ءىشىنارا وڭىرلەرىنىڭ تەمپەراتۋراسى 40 سەلتسي گرادۋسقا جەتەدى، تۇرپان قالاسىنىڭ، قۇمىل قالاسىنىڭ ءىشىنارا جەرلەرىنىڭ تەمپەراتۋراسى 45 گرادۋستان اسادى.

قىسقا ۋاقىتتىق شىلىڭگىر ىستىقتان كەيىن، كۇن سالقىندايتىن بولادى. الدىمەن 7 – ايدىڭ 28 – كۇنى كۇندىزدەن 29 – كۇنىنە دەيىن ءبىرىنشى رەتكى جاۋىن – شاشىن بولادى، مۇندا سولتۇستىك شينجياڭنىڭ باتىس بولەگىندەگى تاۋلى رايوندار، التاي ايماعىنىڭ شىعىس بولەگىندەگى تاۋلى رايوندار، تيانشان تاۋلى رايوندارى جانە سولتۇستىك بەتكەيى، وڭتۇستىك شينجياڭنىڭ باتىس بولەگىندەگى تاۋلى رايوندار قاتارلى جەرلەردىڭ ءىشىنارا وڭىرلەرىندە تولاسسىز جاڭبىر جاۋادى، ءىشىنارا وڭىرلەردە ورتاشا جاڭبىر جاۋادى، كەي جەرلەردە نوسەر جاۋادى. ونان دا ماڭىزدىسى، 7 – ايدىڭ 30 – كۇنىنەن 8 – ايدىڭ 2 – كۇنىنە دەيىن جاۋىن – شاشىن بولادى جانە تەمپەراتۋرا تومەندەپ كۇن سالقىندايدى، سولتۇستىك شينجياڭنىڭ باسىم كوپ بولەگى مەن وڭتۇستىك شينجياڭنىڭ باتىس بولەگى، كۇنلۇن تاۋىنىڭ سولتۇستىك بەتكەيى، قۇمىل قالاسىنىڭ سولتۇستىك بولەگى قاتارلى جەرلەردىڭ ءىشىنارا وڭىرلەرىندە تولاسسىز جاڭبىر جاۋادى، ءىشىنارا وڭىرلەردە ورتاشا جاڭبىر جاۋادى، كەي جەرلەردە نوسەر جاۋادى.

ەكى رەتكى جاۋىن - شاشىنعا ىلەسە، جوعارىدا ايتىلعان ءىشىنارا وڭىرلەردە باتىس سولتۇستىكتەن 5 بال جەل سوعادى، جەل وتتەرىندەگى جەل كۇشى 10 دا 11 بالعا جەتەدى. وڭتۇستىك شينجياڭ ويپاتىنىڭ ورتا، شىعىس بولەگىندە قيىس شىعىستان 5 بال اينالاسىندا جەل سوعادى، ءىشىنارا جەرلەردە تۇرلىشە دارەجەدە قۇمدى بوران سوعادى.

ءۇرىمجى قالاسىنىڭ باسىم كوپ وڭىرلەرىندە مەجەمەن 7 – ايدىڭ 28 – كۇنى كۇن بۇلتتى بولادى، كەي جەرلەرىندە وتكىنشى جاڭبىر جاۋادى، 7 – ايدىڭ 30 – كۇنى تۇننەن 31 – كۇنىنە دەيىن باسىم كوپ وڭىرلەردە سەبەزگى جاڭبىر جاۋادى، وڭتۇستىك قالا ماڭى مەن تاۋلى وڭىرلەردە سەبەزگى جاڭبىر جاۋادى، ءىشىنارا جەرلەردە نوسەر جاۋادى، دابانچىڭ رايونىندا كۇن بۇلتتى بولىپ، قيىس باتىستان 6 دا 7 بال بوران سوعادى. اپتا ىشىندەگى باسقا ۋاقىتتاردا ءارقايسى رايونداردا نەگىزىنەن كۇن اشىق نەمەسە بۇلتتى بولادى، وڭتۇستىك قالا ماڭى مەن تاۋلى رايونداردا كوپ رەت وتكىنشى جاۋىن - شاشىن بولادى. ءارقايسى رايونداردىڭ تەمپەراتۋراسى الدىمەن جوعارىلاپ، ونان سوڭ تومەندەيتىن بولادى. قالا رايونىندا ەڭ تومەنگى تەمپەراتۋرا 19 دا 24 سەلتسي گرادۋس بولادى، ەڭ جوعارى تەمپەراتۋرا 29 دا 38 سەلتسي گرادۋس بولادى.

شينجياڭ اۋا رايى ستانسياسى مىنانى ەسكەرتتى: وسى اپتادا ءىشىنارا جەرلەردە كۇشتى كونۆەكسيالىق اۋا رايى جانە ارالاسپا تاسقىن جانە جەر كوشكىنى، لاي تاسقىنى قاتارلى گەولوگيالىق اپاتتاردىڭ ءتيىمسىز ىقپالىنان ءتۇيىندى تۇردە ساقتانۋ كەرەك.

كەلۋ قاينارى: حالىق تورابى