شي جينپيڭ نەپالدىڭ زۇڭتۇڭى پۋدەلمەن جۇڭگو مەن نەپالدىڭ ديپلوماتيالىق قارىم - قاتىناس ورناتقاندىعىنىڭ 70 جىلدىعى بايلانىسىمەن ءوزارا قۇتتىقتاۋ تەلەگرامماسىن جولدادى

شينحۋا اگەنتتىگى، 8 - ايدىڭ 1 - كۇنى، بەيجيڭ. 8 - ايدىڭ 1 - كۇنى مەملەكەت ءتوراعاسى شي جينپيڭ نەپالدىڭ زۇڭتۇڭى پۋدەلمەن ءوزارا قۇتتىقتاۋ تەلەگرامماسىن جولداپ، جۇڭگو مەن نەپالدىڭ ديپلوماتيالىق قارىم - قاتىناس ورناتقاندىعىنىڭ 70 جىلدىعىن قۇتتىقتادى.

شي جينپيڭ بىلاي دەپ اتاپ كورسەتتى: جۇڭگو مەن نەپالدىڭ تاۋ - سۋى جالعاسقان، دوستىق بارىس - كەلىسى ۇزاقتان جالعاسىپ كەلەدى. جۇڭگو مەن نەپال ديپلوماتيالىق قارىم - قاتىناس ورناتقان 70 جىلدان بەرى، حالىقارالىق جانە وڭىرلىك جاعداي قالاي وزگەرسە دە، ەكى ەل باستان - اياق ءوزارا قۇرمەت ەتىپ، تەڭ تۇرعىدا مامىلە جاساپ، ءوزارا ءتيىمدى سەلبەستىك جاساپ، تۇرلىشە قوعامدىق ءتۇزىم مەن ءىرى، كىشى ەلدەر اراسىنداعى دوستىق قارىم - قاتىناستىڭ ۇلگىسىن ورناتتى. تاياۋ جىلداردان بەرى جۇڭگو - نەپال قارىم - قاتىناسى اقاۋسىز، ورنىقتى دامىپ، ساياسي ءوزارا سەنىمدىلىگى ۇزدىكسىز كۇشەيىپ، ”ءبىر بەلدەۋ، ءبىر جولدى“ بىرگە قۇرۋداعى، سونداي - اق ءار سالاداعى سەلبەستىگى كۇن سايىن كەڭەيىپ، جۇڭگو مەن نەپالدىڭ دامۋ مەن گۇلدەنۋگە بەت العان، ۇرپاقتان - ۇرپاققا جالعاسقان دوستىق ستراتەگيالىق سەلبەستىك سەرىكتەستىك قارىم - قاتىناسى ۇزدىكسىز تەرەڭدەدى.

شي جينپيڭ بىلاي دەپ باسا دارىپتەدى: مەن جۇڭگو - نەپال قارىم - قاتىناسىنىڭ دامۋىنا ايرىقشا ءمان بەرەمىن، سىزبەن بىرگە قۇلشىنىپ، ەكى ەلدىڭ ديپلوماتيالىق قارىم - قاتىناس ورناتقاندىعىنىڭ 70 جىلدىعىن وراي ەتىپ، ءداستۇرلى دوستىقتى اسقاقتاتىپ، ءتۇرلى سالاداعى اۋىس - كۇيىستى، سەلبەستىكتى كۇشەيتىپ، جۇڭگو - نەپال قارىم - قاتىناسىنىڭ ەكى ەل حالقىن اناعۇرلىم ويداعىداي يگىلىككە كەنەلتۋىن ىلگەرىلەتىپ، ءوڭىردىڭ بەيبىتشىلىگى مەن دامۋىنا كۇش قوسۋدى قالايمىن.

پۋدەل مىنالاردى ءبىلدىردى: نەپال مەن جۇڭگو ديپلوماتيالىق قارىم - قاتىناس ورناتقان 70 جىلدان بەرى باستان - اياق ءوزارا سەنۋگە، يەلىك ۇقىق تەڭدىگىنە، بەيبىت قاتار تۇرۋعا تاباندى بولدى، ەكى ەلدىڭ دوستىعى ۇزاق سىننان ءوتتى. جۇڭگو _ نەپالدىڭ سەنىمدى كورشىسى جانە دامۋ سەرىگى.

نەپال جاق جۇڭگونىڭ نەپالدىڭ دامۋىن ۇزاق ۋاقىت قولداعانىنا، نەپالدىڭ يەلىك ۇقىعى مەن تاۋەلسىزدىگىنە قۇرمەت ەتكەنىنە العىس ايتادى. نەپال جاق ءبىر جۇڭگو پرينسيبىن باتىل اتقارادى، جۇڭگومەن قول ۇستاسا العا باسىپ، ءار سالاداعى سەلبەستىكتى ونان ارى تەرەڭدەتىپ، بەيبىتشىلىك، العا باسۋ جانە گۇلدەنۋ سىندى ورتاق ارماندى جۇزەگە اسىرۋدى ءۇمىت ەتەدى.

سول كۇنى مەملەكەتتىك كەڭەستىڭ زۇڭليى لي چياڭ نەپالدىڭ زۇڭليى وليمەن ءوزارا قۇتتىقتاۋ تەلەگرامماسىن جولدادى. لي چياڭ مىنالاردى ءبىلدىردى: جۇڭگو جاق جۇڭگو - نەپال قارىم - قاتىناسىنىڭ دامۋىنا ايرىقشا ءمان بەرەدى، نەپال جاقپەن بىرگە قۇلشىنىپ، جۇڭگو مەن نەپالدىڭ ديپلوماتيالىق قارىم - قاتىناس ورناتقاندىعىنىڭ 70 جىلدىعىن وراي ەتىپ، ”ءبىر بەلدەۋ، ءبىر جولدى“ جوعارى ساپامەن بىرگە قۇرۋدى، سونداي - اق ءار سالاداعى اۋىس - كۇيىستى، سەلبەستىكتى جەدەل ىلگەرىلەتىپ، جۇڭگو مەن نەپالدىڭ دامۋعا جانە گۇلدەنۋگە بەت العان، ۇرپاقتان - ۇرپاققا جالعاسقان دوستىق ستراتەگيالىق سەلبەستىك سەرىكتەستىك قارىم - قاتىناسىنىڭ ۇزدىكسىز دامۋىن ىلگەرىلەتۋدى قالايدى.

ولي مىنالاردى ءبىلدىردى: نەپال مەن جۇڭگو بەيبىت قاتار تۇرۋدىڭ بەس پرينسيبى نەگىزىندە دوستىق قارىم - قاتىناستى دامىتۋعا تاباندى بولادى. نەپال جاق جۇڭگو جاقتىڭ نەپالدىڭ يەلىك ۇقىعىنا، تاۋەلسىزدىگىنە جانە دەربەس تاڭداعان دامۋ جولىنا قۇرمەت ەتكەندىگىن ايرىقشا القايدى، جۇڭگونىڭ قول جەتكىزگەن ۇلى تاريحي تابىستارىنا سۇيىنەدى. بولاشاققا كوز جىبەرسەك، نەپال جاق ەكى ەل اراسىنداعى كەلىسىمدى تياناقتاندىرۋعا ۇزدىكسىز كۇش سالىپ، ەكى ەل حالقىنا شىنايى باقىت جاراتادى.

كەلۋ قاينارى: حالىق تورابى