شي جينپيڭ جۇڭگو، رەسەي، موڭعۇليا مەملەكەت باسشىلارىنىڭ 7 - رەتكى ديدارلاسۋىن باسقاردى

9 - ايدىڭ 2 - كۇنى تۇستەن بۇرىن مەملەكەت ءتوراعاسى شي جينپيڭ رەسەيدىڭ زۇڭتۇڭى پۋتين، موڭعۇليانىڭ زۇڭتۇڭى حورەلسۋحپەن بىرگە بەيجيڭدەگى حالىق سارايىندا جۇڭگو، رەسەي، موڭعۇليا مەملەكەت باسشىلارىنىڭ 7 - رەتكى ديدارلاسۋىن وتكىزدى.

سۋرەتتى شينحۋا اگەنتتىگىنىڭ ءتىلشىسى ديڭ حايتاۋ تۇسىرگەن

«حالىق گازەتى»، 9 - ايدىڭ 2 - كۇنى، بەيجيڭ (تىلشىلەر دۋ شاڭزى، حۋ زىشي). 9 - ايدىڭ 2 - كۇنى تۇستەن بۇرىن مەملەكەت ءتوراعاسى شي جينپيڭ رەسەيدىڭ زۇڭتۇڭى پۋتين، موڭعۇليانىڭ زۇڭتۇڭى حورەلسۋحپەن بىرگە بەيجيڭدەگى حالىق سارايىندا جۇڭگو، رەسەي، موڭعۇليا مەملەكەت باسشىلارىنىڭ 7 - رەتكى ديدارلاسۋىن وتكىزدى.

شي جينپيڭ بىلاي دەپ اتاپ كورسەتتى: تاياۋ جىلداردان بەرى جۇڭگو، رەسەي، موڭعۇليا 3 جاقتىڭ سەلبەستىگى ورنىقتى دامىپ، ناقتى تابىستارعا قول جەتكىزدى. ءۇش جاق سەلبەستىگىنىڭ ورتا مەرزىمدىك جول كارتاسى ءساتتى اتقارىلىپ، ءۇش ەلدىڭ ساۋدا سوماسى بارعان سايىن جوعارىلاپ، ەكونوميكا - ساۋدا، عىلىم - تەحنيكا، ەكولوگيانى قورعاۋ، گۋمانيتارلىق سەلبەستىگى ۇزدىكسىز تەرەڭدەدى. تاۋ - وزەندەرى تۇتاسقان، بەينەت پەن زەينەتتى بىرگە وتكەرەتىن دوس كورشى ەل رەتىندە جۇڭگو جاق رەسەي جاقپەن، موڭعۇليا جاقپەن بىرگە سەلبەستىكتىڭ اۋەلگى ماقساتىنان جازباي، سىرتقى كەدەرگىلەردى الاستاپ، ءۇش جاق سەلبەستىگىنىڭ جوعارى ساپالى دامۋىن قول ۇستاسا ىلگەرىلەتۋدى قالايدى.

شي جينپيڭ جۇڭگو، رەسەي، موڭعۇليا سەلبەستىگىن ىلگەرىلەتۋ جونىندە 3 ءتۇرلى ۇسىنىس قويدى.

ءبىرىنشى، ساياسي سەنىمدىلىكتى بەكەمدەۋ. حالىقارالىق جاعدايدا بىلىقپالىق تۋىلعان سايىن، جۇڭگو، رەسەي، موڭعۇليا ەلدەرى ىنتىماقتى، سەلبەستىكتى كۇشەيتىپ، ءوزارا قولداۋدى كۇشەيتىپ، ءبىر - ءبىرىنىڭ وزەكتى مۇددەسى مەن نازار اۋدارىپ وتىرعان كەلەلى ىستەرىنە قۇرمەت ەتىپ، وزدەرىنىڭ دامۋ، گۇلدەنۋ جولىنداعى بەرىك ستراتەگيالىق سۇيەنىشكە اينالۋى كەرەك.

ەكىنشى، ءوزارا ءتيىمدى سەلبەستىكتى تەرەڭدەتۋ. قاتتى قۇرىلعى بايلانىسىن ماڭىزدى باعىت ەتىپ، ءۇش ەلدى تۇتاستىراتىن شەكارا اتتاعان نەگىزدىك قۇرىلعىلار مەن ەنەرگيا نىساندارىن بەلسەنە ىلگەرىلەتىپ، سەلبەستىكتىڭ مازمۇنىن بايىتۋ؛ جۇمساق قۇرىلعى بايلانىسىن ماڭىزدى تىرەك ەتىپ، دامۋ ستراتەگياسىن ۇشتاستىرۋدى كۇشەيتىپ، ءوز اقشاسىمەن ەسەپ جابۋ كولەمىن كەڭەيتۋ؛ كوڭىل توعىستىرۋدى ماڭىزدى نەگىز ەتىپ، ءۇش ەلدىڭ كورشىلەس ولكە، وبلىستارىنىڭ بارىس - كەلىسىن جيىلەتىپ، ساياحات جانە مادەنيەت مۇرالارىن قورعاۋ سەلبەستىگىن كۇشەيتۋ كەرەك.

ءۇشىنشى، شاڭحاي سەلبەستىك ۇيىمى جۇلگەسىندەگى سەلبەستىكتى جيىلەتۋ. شاڭحاي سەلبەستىك ۇيىمى − وڭىردەگى ەلدەردىڭ حاۋىپسىزدىكتى بىرگە قورعاۋداعى، دامۋدى بىرگە جوسپارلاۋداعى نەگىزگى تۇعىرى. تيانجين باسشىلار ءماجىلىسى كەزىندە جۇڭگو جاق ىلگەرىلەتىپ قۇرعان ءتۇرلى سەلبەستىك تۇعىرلارى مەن ورتالىقتارىنان ويداعىداي پايدالانىپ، اناعۇرلىم كەڭ سەلبەستىك ءورىسىن كەڭەيتۋ كەرەك.

پۋتين مىنالاردى ءبىلدىردى: رەسەي، جۇڭگو، موڭعۇليا − دوس كورشىلەر، ۇزاق ۋاقىتتىق سەلبەستىك ءداستۇرى بار. ساياسي سەنىمدىلىكتى كۇشەيتۋ وتە ماڭىزدى، ءۇش جاق قارىم - قاتىناسىنىڭ نەگىزىن بەكەمدەۋگە ءتيىمدى. رەسەي جاق جۇڭگومەن، موڭعۇليامەن تەڭدىك، ءوزارا تيىمدىلىك، بولاشاققا بەت الۋ نەگىزىندەگى ستراتەگيالىق سەلبەستىكتى ورىستەتىپ، ءۇش جاق سەلبەستىگى مەن ەكى جاقتى سەلبەستىكتىڭ ءبىرىن - ءبىرى تولىقتاۋىنا، ءبىرىن - ءبىرى جەبەۋىنە مۇمكىندىك جاساۋدى قالايدى. ءۇش جاق دامۋ ستراتەگياسىن ۇشتاستىرۋدى جيىلەتىپ، ۇلاستىرۋ - تۇتاستىرۋدى كۇشەيتىپ، ساۋدا جانە قارجى قوسۋ كولەمىن كەڭەيتىپ، فينانس، ەنەرگيا، سيفرلى ەكونوميكا، وقۋ - اعارتۋ، قورشاعان ورتانى قورعاۋ، ساياحات سياقتى سالالارداعى سەلبەستىكتى، اۋىس - كۇيىستى تەرەڭدەتىپ، وزدەرىنىڭ ەكونوميكالىق دامۋىنا دەم بەرىپ، وڭىرلىك ەكونوميكانىڭ توعىسۋىن جەبەپ، حالىق تىلەگىنىڭ توعىسۋىن كۇشەيتۋى كەرەك.

حورەلسۋح مىنالاردى ءبىلدىردى: جۇڭگو مەن رەسەي − موڭعۇليانىڭ ماڭىزدى كورشىسى، موڭعۇليا جاق ەكى جاقتى قارىم - قاتىناستى جيىلەتىپ، ءۇش جاقتىڭ سەلبەستىگىن كەڭەيتىپ، جۇڭگو - موڭعۇليا - رەسەي ەكونوميكالىق ءدالىزى قۇرىلىسىن ىلگەرىلەتىپ، گۋمانيتارلىق اۋىس - كۇيىستى كۇشەيتىپ، ءۇش ەل حالقىنا باقىت جاراتىپ، ءوڭىردىڭ دامۋىن، گۇلدەنۋىن جەبەۋگە كۇش سالادى. بيىل − جۇڭگو حالقىنىڭ جاپون شاپقىنشىلارىنا قارسى سوعىسى مەن سوۆەت وداعىنىڭ ۇلى وتان سوعىسى جەڭىسكە جەتكەندىگىنىڭ 80 جىلدىعى، موڭعۇليا، جۇڭگو، رەسەي حالقى وسى تاريحي ساتتەردى بىرگە قۇتتىقتاپ جانە ەسكە الىپ، دۇنيە جۇزىلىك ەكىنشى سوعىس جونىندەگى دۇرىس تاريحي كوزقاراستى ساۋلەلەندىرۋى كەرەك.

ساي چي، ۋاڭ ي ديدارلاسۋدا بىرگە بولدى.