شي جينپيڭ رەسەيدىڭ زۇڭتۇڭى پۋتينمەن كەڭەس وتكىزدى

9 - ايدىڭ 2 - كۇنى تۇستەن بۇرىن مەملەكەت ءتوراعاسى شي جينپيڭ بەيجيڭدەگى حالىق سارايىندا 2025 - جىلعى شاڭحاي سەلبەستىك ۇيىمى باسشىلار ماجىلىسىنە جانە جۇڭگو حالقىنىڭ جاپون شاپقىنشىلارىنا قارسى سوعىسى مەن دۇنيە جۇزىلىك فاشيزمگە قارسى سوعىس جەڭىسىنىڭ 80 جىلدىعىن ەسكە ءتۇسىرۋ قيمىلىنا قاتىناسۋ ءۇشىن جۇڭگوعا كەلگەن رەسەيدىڭ زۇڭتۇڭى پۋتينمەن كەڭەس وتكىزدى.

سۋرەتتى شينحۋا اگەنتتىگىنىڭ ءتىلشىسى حۋاڭ جيڭۋىن تۇسىرگەن

«حالىق گازەتى»، 9 - ايدىڭ 2 - كۇنى، بەيجيڭ (ءتىلشى دۋ شاڭزى). 9 - ايدىڭ 2 - كۇنى تۇستەن بۇرىن مەملەكەت ءتوراعاسى شي جينپيڭ بەيجيڭدەگى حالىق سارايىندا 2025 - جىلعى شاڭحاي سەلبەستىك ۇيىمى باسشىلار ماجىلىسىنە جانە جۇڭگو حالقىنىڭ جاپون شاپقىنشىلارىنا قارسى سوعىسى مەن دۇنيە جۇزىلىك فاشيزمگە قارسى سوعىس جەڭىسىنىڭ 80 جىلدىعىن ەسكە ءتۇسىرۋ قيمىلىنا قاتىناسۋ ءۇشىن جۇڭگوعا كەلگەن رەسەيدىڭ زۇڭتۇڭى پۋتينمەن كەڭەس وتكىزدى.

شي جينپيڭ بىلاي دەپ اتاپ كورسەتتى: جۇڭگو - رەسەي قارىم - قاتىناسى حالىقارالىق اۋمالى - توكپەلى جاعدايدىڭ سىنىنان ءوتىپ، ماڭگىلىك تاتۋ كورشىلىك، دوستىق، جان - جاقتى ستراتەگيالىق سەلبەستىك، ءوزارا پايدا جەتكىزىپ، تەڭ يگىلىككە كەنەلۋ سىندى ءىرى ەلدەر قارىم - قاتىناسىنىڭ ۇلگىسىن ورناتتى. ەكى جاق اۋەلگى ماقساتتان جازباي، تاباندىلىقتى ساقتاپ، ءار سالاداعى سەلبەستىكتە بەلسەندى تابىستارعا قول جەتكىزدى. جۇڭگو جاق رەسەي جاقپەن جوعارى جىكتەگىلەردىڭ بارىس - كەلىسىن جيىلەتىپ، ءبىر - ءبىرىنىڭ دامۋىن، گۇلدەنۋىن قولداپ، ەكى ەلدىڭ وزەكتى مۇددەسىنە جانە ءجىتى قاداعالاپ وتىرعان كەلەلى ىستەرىنە ساياتىن ماسەلەلەردە تۇرعىسىن دەر كەزىندە سايكەستىرىپ، جۇڭگو - رەسەي قارىم - قاتىناسىنىڭ اناعۇرلىم زور دامۋعا قول جەتكىزۋىن ىلگەرىلەتۋدى قالايدى.

شي جينپيڭ بىلاي دەپ باسا دارىپتەدى: جۇڭگو مەن رەسەيدىڭ ءوز - ءوزىنىڭ دامۋى مەن گۇلدەنۋىندە قۇدىرەتتى قوزعاۋشى كۇش بار، ەكى جاق ءىرى نىساندار ارقىلى سەلبەستىككە جەتەكشىلىك ەتىپ، ۇلگى سەلبەستىك نىساندارىن قالىپتاستىرىپ، تەرەڭ قاتپارلى مۇددەلەردىڭ توعىسۋىن جەبەۋى كەرەك. سەلبەستىكتىڭ سەرپىمدىلىگىن كۇشەيتىپ، سەلبەستىكتىڭ ىشتەي سايكەسۋىن جوعارىلاتىپ، سەلبەستىكتىڭ جالپى جاعدايىن بار كۇشپەن بەكەمدەۋ جانە قورعاۋ كەرەك.

شي جينپيڭ بىلاي دەپ اتاپ كورسەتتى: جۇڭگو مەن رەسەيدىڭ مەملەكەت باسشىلارى قارسى جاق وتكىزگەن دۇنيە جۇزىلىك فاشيزمگە قارسى سوعىستىڭ جەڭىسىن ەسكە ءتۇسىرۋ سالتىنا ءوزارا قاتىناسىپ، دۇنيە جۇزىلىك ەكىنشى سوعىستا جەڭىسكە جەتكەن نەگىزگى ەل جانە بىرلەسكەن مەملەكەتتەر ۇيىمى حاۋىپسىزدىك القالار كەڭەسىنىڭ تۇراقتى القا ەلى بولۋ سىندى ءىرى ەلدىڭ جاۋاپكەرشىلىگىن تولىق ايگىلەپ، دۇنيە جۇزىلىك ەكىنشى سوعىستىڭ جەڭىس جەتىستىكتەرىن قورعاۋ، دۇنيە جۇزىلىك ەكىنشى سوعىس جونىندەگى دۇرىس تاريحي كوزقاراستى قورعاۋ بەرىك بەكىمىن ايگىلەدى. مەنىڭ دۇنيە جۇزىلىك جونگە سالۋ باستاماسىن العا قويۋىم بارلىق مۇراتتاس ەلمەن بىرگە بىرلەسكەن مەملەكەتتەر ۇيىمى ەرەجەسىنىڭ ماقساتى مەن پرينسيبىن باتىل قورعاپ، اناعۇرلىم ءادىل، ۇيلەسىمدى دۇنيە جۇزىلىك جونگە سالۋ جۇيەسىن قۇرۋدى ىلگەرىلەتۋ ءۇشىن ەدى. جۇڭگو مەن رەسەي يەلىك ۇقىق تەڭدىگىن، حالىقارالىق زاڭمەن جونگە سالۋدى، كوپ جاقتىلىقتى باسا دارىپتەيدى، بىرلەسكەن مەملەكەتتەر ۇيىمى، شاڭحاي سەلبەستىك ۇيىمى، بريكس ەلدەرى، 20 ەل توبى سياقتى كوپ جاقتى تۇعىرلاردا سەلبەستىكتى ۇزدىكسىز كۇشەيتىپ، ادامزاتتىڭ تاعدىرلاس ورتاق تۇلعاسىن قۇرۋدى قول ۇستاسا ىلگەرىلەتۋى كەرەك.

پۋتين مىنالاردى ءبىلدىردى: ءتوراعا شي جينپيڭ ەكەۋىمىزدىڭ جەتەكشىلىگىمىزدە رەسەي - جۇڭگو قارىم - قاتىناسى وسكەلەڭ ستراتەگيالىق سيپاتتى ايگىلەپ، تاريحتاعى ەڭ جوعارى دەڭگەيگە جەتتى. ءتوراعا شي جينپيڭ 5 - ايدا رەسەيدە مەملەكەتتىك ساپاردا بولدى ءارى سوۆەت وداعىنىڭ ۇلى وتان سوعىسى جەڭىسكە جەتكەندىگىنىڭ 80 جىلدىعىن ەسكە ءتۇسىرۋ قيمىلىنا قاتىناستى، مەن ەرتەڭ جۇڭگو حالقىنىڭ جاپون شاپقىنشىلارىنا قارسى سوعىسى جەڭىسكە جەتكەندىگىنىڭ 80 جىلدىعىن ەسكە ءتۇسىرۋ قيمىلىنا قاتىناسامىن، بۇل ەكى ەلدىڭ دۇنيە جۇزىنە رەسەي مەن جۇڭگونىڭ دۇنيە جۇزىلىك فاشيزمگە قارسى سوعىستا ءبىر - بىرىنە قارايلاسىپ، تىزە قوسا شايقاس جاساپ، ەۆروپانىڭ نەگىزگى شايقاس مايدانى مەن شىعىستىڭ نەگىزگى شايقاس مايدانىندا جەڭىسكە جەتۋدە اتقارعان شەشۋشى رولىن كورسەتۋى، بۇل تاريحتىڭ شىن سىرىن بىرگە قورعاۋ، دۇنيە جۇزىلىك ەكىنشى سوعىستىڭ جەڭىس جەتىستىكتەرىن قورعاۋ بەرىك مايدانىن ايگىلەدى. رەسەي مەن جۇڭگونىڭ دۇنيە جۇزىلىك فاشيزمگە قارسى سوعىستاعى ىنتىماعى مەن سەلبەستىگى جاڭا داۋىردەگى رەسەي - جۇڭگو قارىم - قاتىناسى دامۋىنىڭ بەرىك نەگىزىنە اينالدى. جۇڭگونىڭ شاڭحاي سەلبەستىك ۇيىمىنىڭ تيانجين باسشىلار ءماجىلىسىن ءساتتى وتكىزىپ، ماجىلىستە كوپتەگەن ورتاق تانىمعا كەلۋگە جەتەكشىلىك ەتىپ، شاڭحاي سەلبەستىك ۇيىمىنىڭ دامۋىن پارمەندى ىلگەرىلەتكەندىگىن قۇتتىقتايمىن. ءتوراعا شي جينپيڭنىڭ دۇنيە جۇزىلىك جونگە سالۋ باستاماسىن العا قويۋى توتەنشە دەر كەزىندە بولدى جانە قاجەتتى، دۇنيە جۇزىلىك جونگە سالۋدىڭ قىزىل سيفرىن شەشۋدە ماڭىزدى رول اتقارادى. رەسەي جاق جۇڭگو جاقپەن ستراتەگيالىق سەلبەستىكتى ساقتاپ، جوعارى جىكتەگىلەردىڭ بارىس - كەلىسىن جيىلەتىپ، ءار سالاداعى ناقتى سەلبەستىكتى كۇشەيتىپ، ەكى ەل قارىم - قاتىناسىنىڭ ۇزدىكسىز جوعارى دەڭگەيدە دامۋىن ىلگەرىلەتۋدى قالايدى.

ەكى ەل مەملەكەت باسشىلارى ورتاق كوڭىل ءبولىپ وتىرعان حالىقارالىق جانە وڭىرلىك ماسەلەلەر جونىندە ىشكەرىلەي پىكىر اۋىستىردى.

سول كۇنى تۇستە شي جينپيڭ پۋتينمەن بىرگە شاعىن كولەمدە شاي ىشە وتىرىپ سىرلاستى ءارى ونى تاماققا ۇسىنىس ەتتى.

ەكى جاق ەنەرگيا، عارىش، جاساندى زەردە، اۋىل شارۋاشىلىعى، تەكسەرۋ - كارەنتيندەۋ، دەنساۋلىق ساقتاۋ، عىلمي زەرتتەۋ، وقۋ - اعارتۋ، اقپارات قۇرالدارى سياقتى سالالارداعى 20 نەشە ەكى جاقتى سەلبەستىك قۇجاتىنا قول قويدى.

ساي چي، ۋاڭ ي جوعارىداعى قيمىلدارعا قاتىناستى.