شي جينپيڭ امەريكا زۇڭتۇڭى ترامپپەن تەلەفوندا سويلەستى

شينحۋا اگەنتتىگىنىڭ 9 ـ ايدىڭ 19 ـ كۇنى بەيجيڭنەن بەرگەن حابارى. 9 ـ ايدىڭ 19 ـ كۇنى كەشتە مەملەكەت ءتوراعاسى شي جينپيڭ امەريكا زۇڭتۇڭى ترامپپەن تەلەفوندا سويلەسىپ، كەزەكتەگى جۇڭگو - امەريكا قارىم ـ قاتىناسى جانە ورتاق كوڭىل ءبولىپ وتىرعان ماسەلەلەر جونىندە بۇكپەسىز، ىشكەرىلەي پىكىر اۋىستىرىپ، كەلەسى كەزەڭدەگى جۇڭگو - امەريكا قارىم ـ قاتىناسىنىڭ ورنىقتى دامۋىنا ستراتەگيالىق جەتەكشىلىك ەتتى. سويلەسۋ ناقتى، بەلسەندى، سىندارلى بولدى.

شي جينپيڭ بىلاي دەپ اتاپ كورسەتتى: جۇڭگو - امەريكا ەكى ەل دۇنيە جۇزىلىك ەكىنشى سوعىستا تىزە قوسا شايقاس جاساعان وداقتاس. تاياۋدا جۇڭگو جاق جۇڭگو حالقىنىڭ جاپون شاپقىنشىلارىنا قارسى سوعىسى مەن دۇنيە جۇزىلىك فاشيزمگە قارسى سوعىس جەڭىسىنىڭ 80 جىلدىعىن ەسكە ءتۇسىرۋ قيمىلىن سالتاناتپەن وتكىزىپ، سول جىلعى امەريكا ۇشپا جولبارىس اترەتىنىڭ مۇشەلەرىنىڭ ءۇي ىشىندەگىلەرىن تيان ـ انمىن مىنبەسىنە شىعىپ اسكەري پاراتتى كورۋگە ۇسىنىس ەتتى. جۇڭگو حالقى امەريكا سياقتى فاشيزمگە قارسى وداقتاس ەلدەردىڭ جۇڭگونىڭ جاپون شاپقىنشىلارىنا قارسى سوعىسىنا كورسەتكەن قىمباتتى قولداۋىن ۇمىتپايدى. ءبىز ارداگەر قۇربانداردى ساعىنا ەسكە الۋ، تاريحتى ەستە بەرىك ساقتاۋ نەگىزىندە بەيبىتشىلىكتى قاستەرلەپ، بولاشاققا جول اشۋىمىز كەرەك.

شي جينپيڭ بىلاي دەپ باسا دارىپتەدى: جۇڭگو - امەريكا قارىم ـ قاتىناسى توتەنشە ماڭىزدى. جۇڭگو مەن امەريكانىڭ ءبىرىن ـ ءبىرى تابىسقا جەتكىزىپ، بىرگە گۇلدەنىپ، ەكى ەلگە باقىت جاراتىپ، دۇنيە جۇزىنە تيىمدىلىك جاساۋىنا ابدەن بولادى. وسى ارماندى جۇزەگە اسىرۋ ءۇشىن، ەكى جاق ءبىر باعىتتا ءجۇرىپ، قۇلشىنىس جاساپ، ءوزارا قۇرمەت ەتۋدى، بەيبىت قاتار تۇرۋدى، سەلبەسىپ تەڭ يگىلىككە كەنەلۋدى جۇزەگە اسىرۋى كەرەك. ەكى جاق ۇيىرمەلەرىنىڭ تاياۋداعى كەڭەسى تەڭدىك، قۇرمەت ەتۋ جانە ءوزارا تيىمدىلىك جاساۋ رۋحىن ايگىلەدى، ەكى ەل قارىم ـ قاتىناسىنداعى كورنەكتى ماسەلەلەردى ۇزدىكسىز ۇيلەسىمدى شەشىپ، ەكى جاق بىردەي يگىلىككە كەنەلۋ ناتيجەسىنە قول جەتكىزۋگە بولادى. امەريكا جاق ءوز الدىنا ساۋدانى شەكتەۋ شارالارىن قولدانۋدان ساقتانىپ، ەكى جاقتىڭ كوپ كەزەكتى كەڭەس ارقىلى قول جەتكىزگەن تابىستارىنا سوققى بەرۋدەن ساقتانۋى كەرەك. جۇڭگو جاقتىڭ TikTok ماسەلەسىندەگى ۇستانىمى ايقىن، جۇڭگو ۇكىمەتى كاسىپورىنداردىڭ تىلەگىنە قۇرمەت ەتەدى، كاسىپورىنداردىڭ بازار ەرەجەسىنە ۇيلەسۋ نەگىزىندە ساۋدا كەلىسسوزىن ويداعىداي جۇرگىزىپ، جۇڭگونىڭ زاڭ ـ ەرەجەلەرىنە ۇيلەسەتىن، مۇددەسى تەپە ـ تەڭ بولعان شەشىم جوباسىنا قول جەتكىزۋىن كورۋدى قالايدى. امەريكا جاقتىڭ جۇڭگو كاسىپورىندارىنىڭ امەريكاعا بارىپ قارجى قوسۋىنا اشىق، ءادىل، كەمسىتپەيتىن شارۋاشىلىق ـ ساۋدا ورتاسىن ازىرلەۋىن ءۇمىت ەتەمىن.

ترامپ مىنالاردى ءبىلدىردى: جۇڭگونىڭ جاپون شاپقىنشىلارىنا قارسى سوعىسى جەڭىسىنىڭ 80 جىلدىعىن ەسكە ءتۇسىرۋ اسكەري پارات سالتى ەرەكشە تارتىمدى بولدى. امەريكا - جۇڭگو قارىم ـ قاتىناسى دۇنيە جۇزىندەگى ەڭ ماڭىزدى ەكى جاقتى قارىم ـ قاتىناس، ەكى ەل سەلبەسسە، دۇنيە ءجۇزىنىڭ بەيبىتشىلىگى مەن ورنىقتىلىعىنا ءتيىمدى كوپتەگەن ءىرى ىستەردى ىستەي الادى، امەريكا جاق جۇڭگو جاقپەن ۇزاق ۋاقىتتىق، تاماشا ۇلى قارىم ـ قاتىناستى ساقتاۋدى ءۇمىت ەتەدى. امەريكا جاق ەكى ەلدىڭ ەكونوميكا ـ ساۋدا سەلبەستىگىن جەبەۋدى ءۇمىت ەتەدى، ەكى جاق ۇيىرمەلەرىنىڭ كەڭەسىپ، TikTok ماسەلەسىن ۇيلەسىمدى شەشۋىن قولدايدى. امەريكا جاق جۇڭگو جاقپەن بىرلىكتە قۇلشىنىپ دۇنيە ءجۇزىنىڭ بەيبىتشىلىگىن قورعاۋدى قالايدى.