ساۋدا مينيسترلىگى: جۇڭگو جاق ا ق ش جاقتى جۇڭگونىڭ كاسىپورىندارىنا قيسىنسىز قىسىم كورسەتۋدى توقتاتۋعا قۋزايدى 

شينحۋا اگەنتتىگىنىڭ 9 – ايدىڭ 13 – كۇنى بەيجيڭنەن بەرگەن حابارى. ساۋدا مينيسترلىگىنىڭ مالىمدەمەشىسىنىڭ 9 – ايدىڭ 13 – كۇنى ايتۋىنشا، 9 – ايدىڭ 14 – كۇنىنەن باستاپ، جۇڭگو مەن ا ق ش ەكى جاق يسپانيادا ەكونوميكا – ساۋدا كەلىسسوزىن وتكىزەدى. ا ق ش – نىڭ وسى كەزدە جۇڭگونىڭ كاسىپورىندارىنا جازالاۋ شارالارىن اتقارۋىنداعى ماقساتى نە؟ جۇڭگو جاق ا ق ش جاقتى قاتە ارەكەتىن دەرەۋ توقتاتۋعا، جۇڭگونىڭ كاسىپورىندارىنا قيسىنسىز قىسىم كورسەتۋدى توقتاتۋعا قۋزايدى. جۇڭگو جاق قاجەتتى شارالاردى قولدانىپ، جۇڭگو كاسىپورىندارىنىڭ زاڭدى ۇقىق – مۇددەسىن قورعايدى.

ءبىر ءتىلشى بىلاي دەپ سۇرادى: ءبىز ا ق ش – نىڭ شىعىس بولىك ۋاقىتى بويىنشا 2025 – جىلى 9 – ايدىڭ 12 – كۇنى ا ق ش ساۋدا مينيسترلىگىنىڭ جۇڭگونىڭ كوپتەگەن ناقتى تۇلعالارىن ەكسپورتتى باسقارۋ – تەجەۋ ”ناقتى تۇلعالار“ تىزىمدىگىنە قوساتىنىن جاريالاعانىنا نازار اۋداردىق. جۇڭگو جاق بۇعان قانداي پىكىر بىلدىرەدى؟ ساۋدا مينيسترلىگىنىڭ مالىمدەمەشىسى جوعارىداعىداي جاۋاپ قايتاردى.

مالىمدەمەشى بىلاي دەدى: جۇڭگو جاق ا ق ش ساۋدا مينيسترلىگىنىڭ مەملەكەت حاۋىپسىزدىگى ۇعىمىن شەكتەن تىس كەڭەيتىپ، ەكسپورتتى باسقارۋ شارالارىن الباتى پايدالانىپ، جارتىلاي وتكىزگىش، بيولوگيالىق تەحنيكا، اۆياتسيا جانە عارىش، ساۋدالىق زات اينالىمى قاتارلى سالالاردا جۇڭگونىڭ كوپتەگەن ناقتى تۇلعالارىن جازالاۋ تىزىمدىگىنە ەنگىزگەنىنە نازار اۋدارىپ وتىر. ا ق ش جاق حالىقارالىق ءتارتىپ پەن مەملەكەت حاۋىپسىزدىگىن قورعاۋ دەگەن اتتان پايدالانىپ، ءىس جۇزىندە سىڭار جاقتى شارا قولدانىپ، زورەكەرلىك كورسەتىپ، ءوز مۇددەسىن باسقا ەلدەردىڭ دامۋ ۇقىعىنان جوعارى قويىپ، جۇڭگونى قامتىعان ءار ەل كاسىپورىندارىنا قىسىم كورسەتتى جانە ولاردى تەجەدى، باسقا مەملەكەتتەر اراسىنداعى قالىپتى ساۋدالىق بارىس – كەلىستى ءبۇلدىرىپ، دۇنيە جۇزىلىك بازاردى اۋىر دارەجەدە بۇرمالاپ، كاسىپورىنداردىڭ زاڭدى ۇقىق – مۇددەسىنە زيان جەتكىزىپ، دۇنيە جۇزىلىك قامداۋ تىزبەگىنىڭ، كاسىپ سالاسى تىزبەگىنىڭ حاۋىپسىزدىگى مەن ورنىقتىلىعىن ءبۇلدىردى، جۇڭگو جاق بۇعان باتىل قارسى تۇرادى.

كەلۋ قاينارى: حالىق تورابى