فيليپپين ”قاتاڭ قارسىلىق ءبىلدىردى“، جۇڭگو جاق: قابىلدامايمىز 

9 – ايدىڭ 11 – كۇنى، سىرتقى ىستەر مينيسترلىگىنىڭ مالىمدەمەشىسى لين جيان كەزەكتى تىلشىلەردى قابىلداۋ ءماجىلىسىن باسقارىپ اشتى.

ءبىر ءتىلشى فيليپپيننىڭ سىرتقى ىستەر مينيسترلىگى بەيسەنبى كۇنى (9 – ايدىڭ 11 – كۇنى) جۇڭگونىڭ حۋاڭيان ارالىندا مەملەكەت دارەجەلى قورىق رايونىن قۇرۋ جوسپارىنا ”قاتاڭ قارسىلىق بىلدىرەتىنىن“ ايتقانى جونىندە سۇراۋ سۇرادى.

لين جيان مىنانى ءبىلدىردى: حۋاڭيان ارالى — ەجەلدەن بەرى جۇڭگونىڭ تەرريتورياسى، حۋاڭيان ارالى مەملەكەت دارەجەلى جاراتىلىستىق قورىق رايونىن قۇرۋ — جۇڭگو جاقتىڭ يەلىك ۇقىعى كولەمىندەگى ءىسى، مۇنداعى ماقسات — حۋاڭيان ارالىنىڭ ەكولوگيالىق ورتاسىن قورعاۋ، حۋاڭيان ارالىنىڭ جاراتىلىستىق ەكولوگيالىق جۇيەسىنىڭ الۋان تۇرلىلىگىن، ورنىقتىلىعىن، باياندىلىعىن ساقتاۋ، بۇل جۇڭگونىڭ ەل ىشىندەگى زاڭدارى مەن حالىقارالىق زاڭدارعا ساي كەلەدى، سونىمەن بىرگە، جۇڭگو جاقتىڭ جاۋاپكەرشىلىكتى ءىرى ەل رەتىندە ەكولوگيالىق ورتانى بەلسەندى قورعاپ، باياندى دامۋدى ىسكە اسىرۋدى ىلگەرىلەتۋ جاعىنداعى بورىشىن اتقارعانىن تولىق ايگىلەيدى.

لين جيان: ”فيليپپين تەرريتورياسىنىڭ كولەمى الدە قاشان ءبىر قىدىرۋ حالىقارالىق شارتتارمەن تۇراقتاندىرىلعان، حۋاڭيان ارالى ەشقاشان بۇل شارتتاردىڭ ىشىندە قامتىلماعان، جۇڭگو جاق فيليپپين جاقتىڭ قيسىنسىز جازعىرۋى مەن اتالمىش ”قارسىلىق ءبىلدىرۋىن“ قابىلدامايدى، فيليپپين جاقتى قاتىستى ۇقىققا قول سۇعاتىن ارانداتۋدى جانە قاساقانا دابىرالاۋدى شىنايى توقتاتۋعا، تەڭىزدەگى جاعدايعا ساياتىن كۇردەلى فاكتورلاردى ارتتىرۋدان ساقتانۋعا قۋزايدى“ دەدى.

كەلۋ قاينارى: حالىق تورابى