ەرلى – زايىپتىلار ”بال اشىپ“ الدامكوستىك ىستەۋ ارقىلى ەكى ميلليون 740 مىڭ يۋاننان استام اقشانى الداپ العان

زاڭمەن باسقارۋ گازەتىنىڭ ءتىلشىسى جوۋ شياۋچيڭ، ەرىكتى ءتىلشىسى دۋ ياپيڭ، ليۋ ايلان حابارلايدى. جۋىردا جياڭشي ولكەسى شينگان اۋداندىق حالىق سوتى ءبىر رەتكى الدامكوستىك دەلوسى جونىندە تەرگەۋ جۇرگىزۋدى اياقتاتقان، ايىپكەر ۋىن X تى 12 جىلدىق مەرزىمدى قاماق جازاسىنا ۇكىم ەتكەن ءارى وعان 200 مىڭ يۋان اقشالاي ايىپ سالعان؛ ايىپكەر چيۋ X تى 6 جىل 7 ايلىق مەرزىمدى قاماق جازاسىنا ۇكىم ەتكەن ءارى وعان 50 مىڭ يۋان اقشالاي ايىپ سالعان.

ايىپكەر ۋىن X، چيۋ X ەكەۋى ەرلى – زايىپتى، ۇيدە جۇمىسسىز قالعان كەزىندە، ەكەۋى ينتەرنەتتەن پايدالانىپ ”قارتامەن بال اشۋ“ دەگەن اتپەن پايداعا كەنەلۋگە بولاتىنىن بايقاپ، قاتىستى ساۋاتتاردى وزدىكتەرىنەن ۇيرەنەدى ءارى ينتەرنەتتەگى ءمالىم تەكشەگە قوسىلادى. 2021 – جىلى 4 – ايدا، ۋىن X اتالعان ينتەرنەت تەكشەسى ارقىلى زياندالۋشى نيە X پەن تانىسادى. قارىم – قاتىناس جاساۋ بارىسىندا، ۋىن X نيە X تىڭ اۋرۋ ازابى مەن سەزىم سەرگەلدەڭىنە بىردەي ۇشىراپ جۇرگەنىن بىلەدى دە، چيۋ X پەن بىرگە جوسپارلاپ، بال اشۋ، ”سالت وتكىزۋ“ قاتارلى تاسىلدەرمەن نيە X كە الدامكوستىك ىستەيدى.

وسىدان سوڭ، ۋىن X پەن ايەلى بال اشۋ مەن ”سالت وتكىزۋدىڭ“ ەشقانداي عىلىمي نەگىزى جوق ەكەنىن، نيە X جولىققان بارلىق ماسەلەلەردى شەشىم ەتۋىنىڭ مۇمكىن ەمەس ەكەنىن بىلە تۇرا، نيە X كە قيسىنسىز تالاپتاردى قويىپ، وعان باعاسى قىمبات ”قىزمەت وتەۋ“ ءتۇرىن ارنايى دايىندايدى. دەلو بايقالعانعا دەيىن، ەرلى – زايىپتى ەكەۋى نيە X تەن جيىنى ەكى ميلليون 740 مىڭ يۋاننان استام اقشانى الداپ الادى.

شينگان اۋداندىق سوت مەكەمەسى تەرگەۋ بارىسىندا بىلاي دەپ قاراعان: ايىپكەر ۋىن X پەن چيۋ X زاڭسىز يەلەپ الۋ ماقساتىمەن، قاساقانا جالعان نارسەلەردى قيىستىرىپ، شىندىقتى بۇركەمەلەپ، باسقالاردىڭ قوماقتى سوماداعى مال – مۇلكىن الداپ العان، ەكى ايىپكەردىڭ ارەكەتى الدامكوستىك قىلمىسىن قالىپتاستىرعان، ونىڭ ۇستىنە بىرىگىپ قىلمىس وتكىزۋگە جاتادى. ەكى ايىپكەردىڭ قىلمىستىق فاكتتەرىن، قىلمىس سيپاتىن، قىلمىس بارىسىن جانە قوعامعا جاساعان زيانىنىڭ دارەجەسىن جان – جاقتى ويلاستىرا وتىرىپ، جوعارىداعىداي ۇكىم شىعارىلعان.

كەلۋ قاينارى: حالىق تورابى