شي جينپيڭ 39 ـ كەزەكتى افريكا وداعى باسشىلار ماجىلىسىنە قۇتتىقتاۋ تەلەگرامماسىن جولدادى

شينحۋا اگەنتتىگىنىڭ 2 ـ ايدىڭ 14 ـ كۇنى بەيجيڭنەن بەرگەن حابارى. 2 ـ ايدىڭ 14 ـ كۇنى مەملەكەت ءتوراعاسى شي جينپيڭ افريكا وداعىنىڭ كەزەكتى ءتوراعاسى، انگولا زۇڭتۇڭى لورەنسو جانە افريكا وداعى كوميتەتىنىڭ ءتوراعاسى يۇسۇپكە قۇتتىقتاۋ تەلەگرامماسىن جولداپ، 39 ـ كەزەكتى افريكا وداعى باسشىلار ءماجىلىسىنىڭ اشىلۋى بايلانىسىمەن افريكا ەلدەرىن جانە حالقىن قىزۋ قۇتتىقتادى.

شي جينپيڭ بىلاي دەپ اتاپ كورسەتتى: قازىر دۇنيە جۇزىندە 100 جىلدىق وزگەرىس جەدەل قۇبىلۋدا، جەر شارىنىڭ وڭتۇستىگى كورنەكتى كۇشەيۋدە. وتكەن ءبىر جىلدا افريكا وداعى افريكا ەلدەرىن ىنتىماقتاستىرىپ جانە باستاپ، ءبىر تۇلعالانۋ ءۇردىسىن بەلسەنە ىلگەرىلەتىپ، افريكانىڭ ورىندى ۇقىق ـ مۇددەسىن تاباندىلىقپەن قورعادى، حالىقارالىق ورنى مەن ىقپالى ۇزدىكسىز جوعارىلادى.

شي جينپيڭ بىلاي دەپ باسا دارىپتەدى: وزگەرىس پەن بىلىقپالىق قاباتتاسقان حالىقارالىق جاعداي الدىندا جۇڭگو دۇنيە ءجۇزىنىڭ بەيبىتشىلىگىن قورعاۋعا، بىرگە دامۋدى جەبەۋگە تاباندىلىقپەن كۇش سالىپ، ادامزاتتىڭ تاعدىرلاس ورتاق تۇلعاسىن قۇرۋدى ىلگەرىلەتتى. جۇڭگو جاق 2026 ـ جىلى 5 ـ ايدىڭ 1 ـ كۇنىنەن باستاپ افريكاداعى ديپلوماتيالىق قارىم ـ قاتىناس ورناتقان 53 ەلگە كەدەن باجىسىن الماۋ شاراسىن جاپپاي اتقارادى، سونىمەن بىرگە ەكونوميكالىق سەرىكتەستىك قارىم ـ قاتىناستى بىرگە دامىتۋ كەلىسىمىنە اقىلداسىپ قول قويۋدى ۇزدىكسىز ىلگەرىلەتەدى ءارى ”جاسىل ارنانىڭ“ دارەجەسىن جوعارىلاتۋ سياقتىلار ارقىلى افريكانىڭ جۇڭگوعا شىعاراتىن ونىمدەرى رۇقساتىن ونان ارى كەڭەيتەدى. بۇل جۇڭگونىڭ جوعارى دەڭگەيدە سىرتقا ەسىك اشۋدى كەڭەيتۋدەگى جاڭا شاراسى، ءسوز جوق، افريكانىڭ دامۋىنا، جۇڭگو مەن افريكانىڭ وسىزامانداندىرۋ ارمانىنا بىرگە تالپىنۋىنا جاڭا وراي ازىرلەيدى.

شي جينپيڭ بىلاي دەپ باسا دارىپتەدى: جۇڭگو مەن افريكا ديپلوماتيالىق قارىم ـ قاتىناستى باستاعان 70 جىلدان بەرى، ەكى جاق باستان ـ اياق تار جول، تايعاق كەشۋلەردى بىرگە وتكەرىپ، تىزە قوسا العا ىلگەرىلەدى. جۇڭگو جاق افريكا جاقپەن بىرگە تاريحي دوستىق سۇيىسپەنشىلىكتى جالعاستىرىپ، ءوزارا پايدا جەتكىزۋ سەلبەستىگىن تەرەڭدەتىپ، ءوزارا ءتۇسىنىسۋدى، ەتەنە بولۋدى نىعايتىپ، جاڭا داۋىردەگى بارلىق جاعدايدا بىردەي جۇڭگو _ افريكا تاعدىرلاس ورتاق تۇلعاسىنىڭ جاڭا تاراۋىن بىرگە جازۋدى قالايدى.