جۇڭگو كوممۋنيستىك پارتياسى ورتالىق كوميتەتى، مەملەكەتتىك كەڭەس كوكتەم مەرەكەسىن توپتىق قۇتتىقتاۋ ءماجىلىسىن وتكىزدى

2 ـ ايدىڭ 14 ـ كۇنى جۇڭگو كوممۋنيستىك پارتياسى ورتالىق كوميتەتى، مەملەكەتتىك كەڭەس بەيجيڭ حالىق سارايىندا 2026 ـ جىلعى كوكتەم مەرەكەسىن توپتىق قۇتتىقتاۋ ءماجىلىسىن وتكىزدى. جۇڭگو كوممۋنيستىك پارتياسى ورتالىق كوميتەتىنىڭ باس شۋجيى، مەملەكەت ءتوراعاسى، ورتالىق اسكەري ىستەر كوميتەتىنىڭ ءتوراعاسى شي جينپيڭ ءسوز سويلەدى.

□ سۋرەتتى شينحۋا اگەنتتىگىنىڭ ءتىلشىسى لي شياڭ تۇسىرگەن

2 ـ ايدىڭ 14 ـ كۇنى جۇڭگو كوممۋنيستىك پارتياسى ورتالىق كوميتەتى، مەملەكەتتىك كەڭەس بەيجيڭ حالىق سارايىندا 2026 ـ جىلعى كوكتەم مەرەكەسىن توپتىق قۇتتىقتاۋ ءماجىلىسىن وتكىزدى. پارتيا مەن مەملەكەت باسشىلارىنان شي جينپيڭ، لي چياڭ، جاۋ لىجي، ۋاڭ حۋنيڭ، ساي چي، ديڭ شۋەشياڭ، لي شي، حان جىڭ قاتارلىلار استاناداعى ءار سالا قايراتكەرلەرىمەن شاتتىقپەن ءبىر ارادا باس قوسىپ، مەرەيلى مەرەكەنى بىرگە قارسى الدى.

□ سۋرەتتى شينحۋا اگەنتتىگىنىڭ ءتىلشىسى شيە حۋانچى تۇسىرگەن

شينحۋا اگەنتتىگىنىڭ 2 ـ ايدىڭ 14 ـ كۇنى بەيجيڭنەن بەرگەن حابارى. جۇڭگو كوممۋنيستىك پارتياسى ورتالىق كوميتەتى، مەملەكەتتىك كەڭەس 2 ـ ايدىڭ 14 ـ كۇنى تۇستەن بۇرىن حالىق سارايىندا 2026 ـ جىلعى كوكتەم مەرەكەسىن توپتىق قۇتتىقتاۋ ءماجىلىسىن وتكىزدى. جۇڭگو كوممۋنيستىك پارتياسى ورتالىق كوميتەتىنىڭ باس شۋجيى، مەملەكەت ءتوراعاسى، ورتالىق اسكەري ىستەر كوميتەتىنىڭ ءتوراعاسى شي جينپيڭ ءسوز سويلەپ، پارتيا ورتالىق كوميتەتى مەن مەملەكەتتىك كەڭەس اتىنان بۇكىل ەلدەگى ءار ۇلت حالقىنىڭ، شياڭگاڭ ەرەكشە اكىمشىلىك رايونىنداعى باۋىرلاستاردىڭ، اۋمىن ەرەكشە اكىمشىلىك رايونىنداعى باۋىرلاستاردىڭ، تايۋاندىق باۋىرلاستاردىڭ جانە شەتەلدەگى چياۋمين باۋىرلاستاردىڭ كوكتەم مەرەكەسىن قۇتتىقتادى.

شي جينپيڭ بىلاي دەپ باسا دارىپتەدى: اياقتاۋ الدىندا تۇرعان ي ـ سى جىلان جىلى اسا وزگەشە ءبىر جىل بولدى. كۇردەلى دە قۇبىلمالى حالىقارا جانە ەل ءىشى جاعدايى الدىندا ءبىز قيىندىقتان تايسالماي العا ۇمتىلىپ، قايراتتانا العا تارتىپ، پارتيا مەن مەملەكەت ىستەرىندە جاڭا ىلگەرىلەۋشىلىككە، جاڭا تابىسقا قول جەتكىزۋدى ىلگەرىلەتتىك، تۇتاس جىلداعى ەكونوميكالىق، قوعامدىق دامۋدىڭ باستى نىسانا ـ مىندەتتەرىن ءساتتى ورىنداپ، ”14 ـ بەسجىلدىقتى“ تابىسپەن اياقتاتتىق، ەلىمىزدىڭ ەكونوميكالىق ناقتى قۋاتىن، عىلىم ـ تەحنولوگيالىق ناقتى قۋاتىن، مەملەكەت قورعانىسى ناقتى قۋاتىن، جالپىلىق مەملەكەت قۋاتىن تەز قارقىنمەن تىڭ ساتىعا كوتەرىپ، جۇڭگو ۇلگىسىندەگى وسىزامانداندىرۋدا تىڭ دا نىق قادام تاستادىق.

لي چياڭ توپتىق قۇتتىقتاۋ ءماجىلىسىن باسقاردى، جاۋ لىجي، ۋاڭ حۋنيڭ، ساي چي، ديڭ شۋەشياڭ، لي شي، حان جىڭ قاتارلىلار قاتىناستى.

حالىق سارايىنىڭ قوناعاسى زالىندا شامدار جايناپ، قۋانىش لەبى ەستى، ءار سالا قايراتكەرلەرىنەن 2000نان استام ادام شاتتىقپەن ءبىر ارادا باس قوسىپ، مەرەيلى مەرەكەنى بىرگە قارسى الدى، زال ءىشى شاتتىققا، بەرەكەگە تولى مەرەكەلىك بەينەگە ەندى.

تۇستەن بۇرىن ساعات 10 مولشەرىندە شات مەرەيلى مۋزيكا ءۇنى ىشىندە شي جينپيڭ قاتارلى پارتيا مەن مەملەكەت باسشىلارى زالعا كىرىپ، كوپشىلىككە ىقىلاسپەن قۇرمەت ءبىلدىردى، كوپشىلىكپەن ءوزارا امانداستى، كوكتەم مەرەكەسى بايلانىسىمەن ىزگى تىلەك تىلەدى، بۇكىل زالدان قىزۋ شاپالاق ءۇنى كوتەرىلدى.

شي جينپيڭ سوزىندە بىلاي دەپ اتاپ كورسەتتى: ءبىر جىلدان بەرى، ءبىز اناعۇرلىم بەلسەندى دە ۇتىمدى ماكرولىق ساياسات اتقارىپ، رەفورمانى ونان ارى جاپپاي تەرەڭدەتىپ، وسىزاماندانعان كاسىپ سالاسى جۇيەسى قۇرىلىسىن تىڭعىلىقتى ىلگەرىلەتتىك، ەلىمىز ەكونوميكاسى قىسىمعا توتەپ بەرە العا باسىپ، جاڭا بولۋعا، ساپالى بولۋعا قاراي دامىپ، قۋاتتى سەرپىمدىلىك پەن ومىرشەڭ كۇشىن ايگىلەدى. سوتسياليستىك دەموكراتيا، زاڭمەن باسقارۋ قۇرىلىسىن، مادەنيەت قۇرىلىسىن، ەكولوگيالىق وركەنيەت قۇرىلىسىن، مەملەكەت قورعانىسى مەن ارميا قۇرىلىسىن تىڭعىلىقتى ىلگەرىلەتتىك، ءتۇرلى ىستەردى ءوزارا ىلگەرىلەتىپ، بىرگە ىلگەرىلەدىك. حالىق تۇرمىسىن كۇش سالا قامتاماسىز ەتتىك جانە جاقسارتتىق، قوعامدىق كەلەلى جاعدايدىڭ ورنىقتىلىعىن ساقتادىق. ءبىز پارتيا 20 ـ كەزەكتى ورتالىق كوميتەتىنىڭ ءتورتىنشى جالپى ءماجىلىسىن جەڭىسپەن اشىپ، ”15 ـ بەسجىلدىق“ دامۋ جوباسىن جاسادىق. جۇڭگو حالقىنىڭ جاپون شاپقىنشىلارىنا قارسى سوعىسى مەن دۇنيە جۇزىلىك فاشيزمگە قارسى سوعىس جەڭىسىنىڭ 80 جىلدىعىن سالتاناتپەن ەسكە تۇسىردىك، تايۋاننىڭ قايتارىپ الىنعاندىعىن ەسكە ءتۇسىرۋ كۇنىن بەلگىلەدىك، شيزاڭ اۆتونوميالى رايونى قۇرىلعاندىعىنىڭ 60 جىلدىعىن، شينجياڭ ۇيعۇر اۆتونوميالى رايونى قۇرىلعاندىعىنىڭ 70 جىلدىعىن قۇتتىقتادىق، گۋاڭدۇڭ، شياڭگاڭ، اۋمىن سىندى 3 جەردە 15 ـ كەزەكتى مەملەكەتتىك سپورت جارىسىن بىرلەسىپ وتكىزىپ، جۇڭگو ۇلگىسىندەگى وسىزامانداندىرۋدى ىلگەرىلەتۋدىڭ تەلەگەي كۇشىن ونان ارى ۇيىستىردىق. ءبىز الەمدىك باسقارۋ باستاماسىن العا قويىپ، شاڭحاي سەلبەستىك ۇيىمىنىڭ تيانجين باسشىلار ءماجىلىسىن، دۇنيە جۇزىلىك ايەلدەر ىستەرى باسشىلار ءماجىلىسىن ءساتتى وتكىزىپ، ادامزاتتىڭ تاعدىرلاس ورتاق تۇلعاسىن قۇرۋدى بەلسەنە ىلگەرىلەتىپ، وزگەرىس پەن بىلىقپالىق قاباتتاسقان دۇنيە جۇزىنە اناعۇرلىم كوپ ايقىندىلىق جانە وڭ ەنەرگيا ۇستەدىك. ءبىز پارتيانى جاپپاي قاتاڭ باسقارۋدى بۇلجىماي ىلگەرىلەتىپ، ورتالىقتىڭ سەگىز ءتۇرلى بەلگىلەمەسىنىڭ رۋحىن ىشكەرىلەي دايەكتىلەندىرۋ ۇيرەنۋ تاربيەسىن تىڭعىلىقتى ورىستەتىپ، پارتيا ستيلى، پاكتىك قۇرىلىسى مەن شىرىكتەسۋگە قارسى كۇرەستە كورنەكتى ونىمدىلىككە قول جەتكىزدىك، ساياسي ەكولوگيا مەن قوعامدىق سالتتى ۇزدىكسىز جاقسارتتىق.

شي جينپيڭ بىلاي دەپ باسا دارىپتەدى: ءبىر جىلدان بەرى، تابىسىمىز مول بولدى، بۇل بۇكىل پارتيانىڭ، بۇكىل ەلدەگى ءار ۇلت حالقىنىڭ بىرگە قۇلشىنۋىنىڭ ناتيجەسى. تابىس ادامدى جەلپىندىرەدى، كۇرەس سەنىمدى ارتتىرادى. تەك ستراتەگيالىق تاباندىلىقتى ساقتاپ، نىق قاداممەن ءىز قالدىرىپ تاباندى تۇردە العا باسىپ، كەزەڭ سايىن تىڭعىلىقتى ىلگەرىلەتسەك بولعانى، پارتيا مەن مەملەكەت ىستەرىندە، ءسوز جوق، ۇزدىكسىز بولماشى جەڭىستەردى توپتاپ ۇلكەن جەڭىسكە جەتەمىز، نىسانامىز، ءسوز جوق، ورىندالادى.

شي جينپيڭ بىلاي دەپ اتاپ كورسەتتى: 2026 ـ جىل _ جۇڭگو كوممۋنيستىك پارتياسى قۇرىلعاندىعىنىڭ 105 جىلدىعى، ”15 ـ بەسجىلدىقتىڭ“ باستاما جىلى. ءبىز جاڭا ءداۋىر جۇڭگوشا سوتسياليزم يدەياسىن جەتەكشى ەتۋگە تاباندى بولىپ، پارتيا 20 ـ قۇرىلتايى مەن 20 ـ كەزەكتى ورتالىق كوميتەتتىڭ ءار رەتكى جالپى ءماجىلىسىنىڭ رۋحىن ىشكەرىلەي دايەكتىلەندىرىپ، ءتورتىنشى جالپى ءماجىلىستىڭ ورنالاستىرۋلارىن مۇقيات تياناقتاندىرىپ، ورنىقتىلىق بارىسىندا ىلگەرىلەۋ قىزمەت جالپى ارناسىنان جازباي، جاڭا دامۋ ۇستانىمىن تولىق، دالمە ـ ءدال، جاپپاي دايەكتىلەندىرىپ، جاڭا دامۋ ارناسىن جەدەل قالىپتاستىرىپ، جوعارى ساپالى دامۋدى كۇش سالا ىلگەرىلەتىپ، قوعامنىڭ جاراسىمدىلىعىن، ورنىقتىلىعىن ساقتاپ، پارتيانى جاپپاي قاتاڭ باسقارۋدى تاباندىلىقپەن ىلگەرىلەتىپ، ”15 ـ بەسجىلدىقتىڭ“ تاماشا باستاماسىن قۇلشىنا جۇزەگە اسىرۋىمىز كەرەك.

شي جينپيڭ بىلاي دەپ باسا دارىپتەدى: پارتيامىز حالىق ءۇشىن دۇنيەگە كەلگەن، حالىق ءۇشىن گۇلدەنگەن، بارلىق قىزمەتتە حالىقتىڭ باقىتىن كوزدەيدى. ءبىز حالىقتى بارىنەن جوعارى قويۋعا باستان ـ اياق تاباندى بولىپ، دۇرىس ناتيجە كوزقاراسىن ورناتىپ جانە امالياتتا ايگىلەپ، امالياتتىڭ، حالىقتىڭ، تاريحتىڭ سىنىنان وتە الاتىن ناقتى ناتيجە جاراتۋىمىز كەرەك.

شي جينپيڭ بىلاي دەپ اتاپ كورسەتتى: جۇڭحۋا مادەنيەتىندە جىلقى قايسارلىقتىڭ، ايبىندىلىقتىڭ، ءوزىن تالماي الۋەتتەندىرۋدىڭ سيمۆولى، ول نىق قاداممەن الىسقا جەتەتىن، گۇلدەنىپ ـ كوركەيەتىن بولاشاقتى ايگىلەيدى. بيڭ ـ ۋ جىلقى جىلىندا بۇكىل ەلدەگى ءار ۇلت حالقىنىڭ پارتيا ورتالىق كوميتەتىنىڭ توڭىرەگىنە اناعۇرلىم تىعىز ىنتىماقتاسىپ، ءسوزسىز، جەڭىسكە جەتۋ سەنىمىن بەكەمدەپ، اسقاق كۇرەس جىگەرىن ساقتاپ، جۇڭگو ۇلگىسىندەگى وسىزامانداندىرۋدىڭ جاڭا جورىعىندا تاسقىنداعان قايراتپەن العا ىلگەرىلەپ، ەرلىكپەن العا تارتىپ، بىرگە اناعۇرلىم كوركەم بولاشاق جاراتۋىن ءۇمىت ەتەمىن.

ادەبيەت ـ كوركەمونەر قىزمەتكەرلەرى سول ارادا تارتىمدى كونسەرت نومىرلەرىن ورىندادى.

جۇڭگو كوممۋنيستىك پارتياسى ورتالىق كوميتەتىندەگى، مەملەكەتتىك حالىق قۇرىلتايى تۇراقتى كوميتەتىندەگى، مەملەكەتتىك كەڭەستەگى، ەڭ جوعارى حالىق سوتى مەكەمەسىندەگى، ەڭ جوعارى حالىق پروكۋراتۋراسىنداعى، مەملەكەتتىك ساياسي كەڭەستەگى، ورتالىق اسكەري ىستەر كوميتەتىندەگى باسشى جولداستار جانە ساقا جولداستار توپتىق قۇتتىقتاۋ ماجىلىسىنە قاتىناستى.

توپتىق قۇتتىقتاۋ ماجىلىسىنە ورتالىقتاعى پارتيا، ۇكىمەت، ارميا تاراۋلارىنداعى، بۇقارالىق تاراۋلارداعى جانە بەيجيڭ قالاسىنداعى جاۋاپتى جولداستار، ءارقايسى دەموكراتيالىق پارتيا ـ توپتاردىڭ ورتالىق كوميتەتتەرىنىڭ، مەملەكەتتىك ساۋدا ـ ونەركاسىپشىلەر بىرلەستىگىنىڭ جاۋاپتىلارى جانە پارتيادا، توپتا جوق قايراتكەرلەردىڭ ۋاكىلدەرى، دەمالىسقا، زەينەتكە شىققان ساقا جولداستاردىڭ ۋاكىلدەرى، ايگىلى مامانداردىڭ، وقىمىستىلاردىڭ جانە استانانىڭ ءار سالاسىنداعى قايراتكەرلەردىڭ ۋاكىلدەرى دە قاتىناستى.