كەزەكتەگى ەكونوميكالىق قىزمەتتىڭ ءتۇيىندى مىندەتتەرى

شينحۋا اگەنتتىگىنىڭ 2 - ايدىڭ 15 - كۇنى بەيجيڭنەن بەرگەن حابارى. 2 - ايدىڭ 16 - كۇنى باسپادان شىعاتىن «ىزدەنۋ» جۋرنالىنىڭ 4 - سانىندا جۇڭگو كوممۋنيستىك پارتياسى ورتالىق كوميتەتىنىڭ باس شۋجيى، مەملەكەت ءتوراعاسى، ورتالىق اسكەري ىستەر كوميتەتىنىڭ ءتوراعاسى شي جينپيڭنىڭ «كەزەكتەگى ەكونوميكالىق قىزمەتتىڭ ءتۇيىندى مىندەتتەرى» اتتى ماڭىزدى ماقالاسى جاريالانادى. بۇل باس شۋجي شي جينپيڭنىڭ 2025 - جىلى 12 - ايدىڭ 10 - كۇنى ورتالىقتىڭ ەكونوميكالىق قىزمەت ماجىلىسىندە سويلەگەن ءسوزىنىڭ ءبىر بولىگى.

ماقالادا مىنالار باسا دارىپتەلدى: 2026 - جىلعى ەكونوميكالىق قىزمەت سان سالالى، تەتىكتى مىقتى يگەرۋ، ارقاۋدى يگەرىپ باسقا ىستەرگە جول اشۋ كەرەك. ىشكى سۇرانىستى جەتەكشى ەتۋگە تاباندى بولىپ، قۋاتتى ەل ءىشى بازارىن قۇرۋ كەرەك. تۇتىنۋدى جەبەۋ مەن قارجى قوسۋدى كەڭەيتۋدى ءبىر تۇتاس جوسپارلاپ، ەلىمىزدىڭ اسا زور كولەمدى بازار باسىمدىعىنان ويداعىداي پايدالانۋ كەرەك. تۇتىنۋدى سەرپىلتۋ ارناۋلى ارەكەتىن ىشكەرىلەي اتقارىپ، قالا، اۋىل تۇرعىندارىنىڭ كىرىسىن ارتتىرۋ جوسپارىن جاساپ جانە اتقارىپ، ساپالى تاۋارلارمەن جانە قىزمەت وتەۋمەن قامداۋدى كەڭەيتىپ، ”ەكىنى جاڭالاۋ“ ساياساتىن اتقارۋدى ساپالىلاندىرىپ، تۇتىنۋ سالاسىنداعى ۇيلەسىمسىز شەكتەۋ شارالارىن اداقتاپ، مادەنيەت - ساياحات سياقتى قىزمەت وتەۋ تۇتىنۋىنىڭ كومەسكى كۇشىن جارىققا شىعارۋ كەرەك. حالىق تۇرمىسىنا تيىمدىلىك جاساۋدى، تەبىندى ارتتىرۋدى كوزدەپ، قارجى قوسۋدىڭ قۇلدىراۋىن تەجەپ، ورنىقتى قالپىنا كەلۋىن ىلگەرىلەتىپ، ورتالىقتىڭ مەجە ەسەبىندەگى قارجى قوسۋ كولەمىن لايىقتى ارتتىرىپ، ”ەكى كەلەلى“ نىساندى اتقارۋدى ساپالىلاندىرىپ، جەرگىلىكتى ۇكىمەتتەردىڭ ارناۋلى زايومىنىڭ ىستەتىلۋىن باسقارۋدى ساپالىلاندىرىپ، جاڭاشا ساياساتتىق فينانس قۇرال - جابدىقتارىنىڭ رولىن ۇزدىكسىز ساۋلەلەندىرىپ، قالانى جاڭالاۋدى جوعارى ساپالى ىلگەرىلەتىپ، حالىقتىق قارجى قوسۋدىڭ ومىرشەڭ كۇشىن ءونىمدى تاسقىنداتۋ كەرەك.

ماقالادا مىنالار اتاپ كورسەتىلدى: جاڭالىق اشۋ ارقىلى دەم بەرۋگە تاباندى بولىپ، جاڭا قوزعالىس قۋاتىن جەدەل جەتىلدىرۋ جانە زورايتۋ كەرەك. عىلىم - تەحنولوگيادا جاڭالىق اشۋ ارقىلى كاسىپ سالاسىنىڭ دارەجەسىن جوعارىلاتۋعا جەتەكشىلىك ەتۋگە تاباندى بولىپ، جاڭاشا وندىرگىش كۇشتەردى ۇزدىكسىز تۋىنداتۋ كەرەك. وقۋ - اعارتۋدى، عىلىم - تەحنولوگيانى، دارىندىلاردى دامىتۋدى ءبىر تۇلعالاندىرا ىلگەرىلەتۋ جوباسىن جاساپ، بەيجيڭ (بەيجيڭ − تيانجين − حىبەي)، شاڭحاي (چاڭجياڭ اتىراۋى)، گۋاڭدۇڭ − شياڭگاڭ − اۋمىن ۇلكەن شىعاناق رايونى حالىقارالىق عىلىم - تەحنولوگيادا جاڭالىق اشۋ ورتالىعىن قۇرىپ، دۇنيە جۇزىلىك عىلىم - تەحنولوگيادا جاڭالىق اشۋ قاينارىن تۇلعالاۋ كەرەك. كاسىپورىنداردىڭ جاڭالىق اشۋداعى نەگىزگى تۇلعالىق ورنىن كۇشەيتىپ، جاڭا تەحنولوگيادان، جاڭا ونىمنەن، جاڭا جاعدايدان پايدالانۋدان ۇلگى كورسەتۋدى كەڭەيتۋگە قولداۋ كورسەتىپ، جاڭادان گۇلدەنگەن سالالاردىڭ ءبىلىم مەنشىك ۇقىعىن قورعاۋ ءتۇزىمىن كەمەلدەندىرىپ، عىلىم - تەحنولوگيا جەتىستىگىن كادەگە جاراتۋدى جەدەلدەتۋ كەرەك. قىزمەت وتەۋ كاسىبىنىڭ قۋاتىن ارتتىرىپ، ساپاسىن جوعارىلاتۋ ارەكەتى جوباسىن جاساۋ كەرەك. جاڭا كەزەكتى ءتۇيىندى كاسىپ سالاسى تىزبەگىن جوعارى ساپالى دامىتۋ ارەكەتىن اتقارۋ كەرەك. ”جاساندى زەردە +“نى تەرەڭدەتىپ، كەڭەيتىپ، جاساندى زەردەنى باسقارۋدى كەمەلدەندىرۋ كەرەك. عىلىم - تەحنولوگياعا فينانستىق قىزمەت وتەۋدە جاڭالىق اشۋ كەرەك.

ماقالادا مىنالار اتاپ كورسەتىلدى: رەفورمادان قامال الۋعا تاباندى بولىپ، جوعارى ساپالى دامۋدىڭ قوزعاۋشى كۇشىن، ومىرشەڭ كۇشىن ارتتىرۋ كەرەك. مەملەكەتتىك ءبىر تۇتاس ۇلكەن بازار قۇرىلىسى ەرەجەسىن جاساپ، ”ىشكى قارا تالاسۋ ۇلگىسىندەگى“ باسەكەنى ىشكەرىلەي وڭاپ، تاماشا بازار ەكولوگياسىن قالىپتاستىرۋ كەرەك. مەملەكەت مەنشىگىندەگى مال - مۇلىك، مەملەكەت مەنشىگىندەگى كاسىپورىن رەفورماسىن ونان ارى تەرەڭدەتۋ جوباسىن جاساپ جانە اتقارىپ، حالىقتىق شارۋاشىلىقتى جەبەۋ زاڭىنىڭ سايكەستى زاڭ - ەرەجەلەرى مەن ساياساتتارىن كەمەلدەندىرۋ كەرەك. كاسىپورىنداردىڭ الاشاعىن كەشەۋىلدەتۋدى جەدەل اداقتاۋ كەرەك. تەكشە كاسىپورىندارى مەن تەكشەلەردەگى تيجاراتشىلاردىڭ، ەڭبەكشىلەردىڭ تەڭ يگىلىككە كەنەلىپ دامۋىن ىلگەرىلەتۋ كەرەك. فاكتورلاردى بازارلاندىرۋ رەفورماسىن تۇيىندە سىناق ەتۋدى كەڭەيتۋ كەرەك. قازىنانىڭ اۋىستىرىپ تولەۋ قۇرىلىمىن ساپالىلاندىرىپ، جەرگىلىكتى سالىق جۇيەسىن اقاۋسىزداندىرۋ كەرەك. ورتا، شاعىن فينانس قۇرىلىمدارىنىڭ مولشەرىن ازايتىپ، ساپاسىن جوعارىلاتۋدى ىشكەرىلەي ىلگەرىلەتىپ، كاپيتال بازارىنىڭ قارجى قوسۋ، قارجى قۇراۋ جالپىلىق رەفورماسىن ۇزدىكسىز تەرەڭدەتۋ كەرەك.

ماقالادا مىنالار اتاپ كورسەتىلدى: سىرتقا ەسىك اشۋعا تاباندى بولىپ، كوپ سالادا سەلبەسىپ تەڭ يگىلىككە كەنەلۋدى ىلگەرىلەتۋ كەرەك. حالىقارالىق ەكونوميكا - ساۋدا ارناسى قايتا قالىپتاسۋدا، ەسىك اشۋ ارقىلى سەلبەستىكتى كۇشەيتىپ، ەل ءىشى جانە حالىقارا سىندى قوس اينالىمدى ىركىلىسسىزدەندىرۋ كەرەك. تۇزىمدىك ەسىك اشۋدى ورنىقتى ىلگەرىلەتىپ، قىزمەت وتەۋ سالاسىن دەربەس اشىق ۇستاۋدى تارتىپپەن كەڭەيتىپ، ەركىن ساۋدا سىناق رايونىنىڭ ورنالاسىم كولەمىن ساپالىلاندىرىپ، حاينان ەركىن ساۋدا پورتى قۇرىلىسىن تىڭعىلىقتى ىلگەرىلەتۋ كەرەك. ساۋدا جانە قارجى قوسۋدى ءبىر تۇلعالاندىرا دامىتۋدى، ىشكى - سىرتقى ساۋدانى ءبىر تۇلعالاندىرا دامىتۋدى ىلگەرىلەتۋ كەرەك. قىزمەت وتەۋ ەكسپورتىن شابىتتاندىرىپ جانە قولداپ، سيفرلى ساۋدانى، جاسىل ساۋدانى بەلسەنە دامىتۋ كەرەك. شەتەل ساۋداگەرلەرىنىڭ قارجى قوسۋىن جەبەۋ ءتۇزىلىس - مەحانيزمى رەفورماسىن تەرەڭدەتىپ، شەتەل قارجىسىنىڭ ەل ىشىندەگى قايتالاي سالىنىمىن جەبەپ، جەرگىلىكتەندىرىپ ءوندىرۋدى كەڭەيتۋ كەرەك. شەتەلدەگى جالپىلىق قىزمەت وتەۋ جۇيەسىن كەمەلدەندىرۋ كەرەك. ”ءبىر بەلدەۋ، ءبىر جولدى“ بىرگە قۇرۋدىڭ جوعارى ساپالى دامۋىن ىلگەرىلەتۋ كەرەك. اناعۇرلىم كوپ وڭىرلىك جانە ەكى جاقتى ساۋدا قارجى قوسۋى كەلىسىمىنە كەڭەسىپ قول قويۋدى ىلگەرىلەتۋ كەرەك.

ماقالادا مىنالار اتاپ كورسەتىلدى: سايكەستى دامۋعا تاباندى بولىپ، قالا مەن اۋىلدىڭ توعىسۋىن جانە وڭىرلەردىڭ بىرلەسىپ ارەكەتتەنۋىن جەبەۋ كەرەك. اۋدان ورتالىعىن ماڭىزدى دانەكەر ەتكەن قالا - قالاشىقتاندىرۋ قۇرىلىسى مەن اۋىل - قىستاقتى جاپپاي گۇلدەندىرۋدى ءبىر تۇتاس جوسپارلاپ ىلگەرىلەتىپ، اۋدان ءوڭىرى ەكونوميكاسىنىڭ جوعارى ساپالى دامۋىن ىلگەرىلەتۋ كەرەك. ەگىستىك جەر قىزىل سىزىعىن قاتاڭ ساقتاپ، استىق ءوندىرىسىن تيتتەي دە بوساڭسىماي ويداعىداي يگەرىپ، استىق سياقتى ماڭىزدى اۋىل شارۋاشىلىق ونىمدەرىنىڭ باعاسىن ۇيلەسىمدى دەڭگەيدە ساقتاۋدى جەبەپ، شارۋالاردىڭ كىرىسىن ورنىقتى ارتتىرۋدى جەبەۋ كەرەك. كەدەيلىكتەن ارىلتۋدان قامال الۋ جەتىستىكتەرىن ۇزدىكسىز بەكەمدەپ، كەڭەيتىپ، ۇدايىلانعان كومەكتەسۋ - سۇيەمەلدەۋدى اۋىل - قىستاقتى گۇلدەندىرۋ ستراتەگياسىنا ەنگىزىپ ءبىر تۇتاس جوسپارلاپ اتقارىپ، كولەمدى قايتا كەدەيلەسۋ، كەدەيلەسۋ تۋىلماۋ تومەنگى شەگىن بەرىك ساقتاۋ كەرەك. ءارقايسى وڭىرلەر بۇكىل ەلدىڭ دامۋ كەلەلى جاعدايىنداعى ورنىن دالمە - ءدال يگەرىپ، تۇلعالىق يقۋاتتى كۇشەيتىپ، سالىستىرمالى باسىمدىقتى ساۋلەلەندىرۋى كەرەك. ەكونوميكالىق ءىرى ولكەلەردىڭ ۇلكەن جۇكتى ارقالاۋىنا قولداۋ كورسەتىپ، ءتۇيىندى قالالار شوعىرىنىڭ سايكەسە بىرلەسىپ ارەكەتتەنۋىن كۇشەيتىپ، اكىمشىلىك رايون اتتاعان سەلبەستىكتى تەرەڭدەتۋ كەرەك. نەگىزگى شىعاناقتاردى تۇتاس تۇلعالىق جوبالاۋدى كۇشەيتىپ، تەڭىز - مۇحيت ەكونوميكاسىنىڭ جوعارى ساپالى دامۋىن ىلگەرىلەتۋ كەرەك.

ماقالادا مىنالار اتاپ كورسەتىلدى: ”كومىر قىشقىل گازىنىڭ شىعارىلۋىن ەڭ جوعارى مانگە جەتكىزۋدى، كومىر قىشقىل گازىن بەيتاراپتاندىرۋدى“ جەتەكشى ەتۋگە تاباندى بولىپ، جاپپاي جاسىل تيپ جاڭالاۋدى ىلگەرىلەتۋ كەرەك. كومىر قىشقىل گازىنىڭ شىعارىلۋىن تومەندەتۋدى، لاستانۋدى ازايتۋدى، جاسىلدى كەڭەيتۋدى، ەكونوميكانى ارتتىرۋدى سايكەسە ىلگەرىلەتىپ، جاسىل دامۋ قوزعالىس قۋاتىن كۇشەيتۋ كەرەك. ءتۇيىندى سالالاردا ەنەرگيانى ۇنەمدەپ، كومىر قىشقىل گازىن ازايتۋ بويىنشا وزگەرتۋدى ىشكەرىلەي ىلگەرىلەتۋ كەرەك. ەنەرگيادا قۋاتتى ەل قۇرىلىسى جوبا باعدارلاماسىن جاساپ، جاڭاشا ەنەرگيا جۇيەسى قۇرىلىسىن تەزدەتىپ، جاسىل ەلەكتردەن پايدالانۋ كولەمىن كەڭەيتۋ كەرەك. مەملەكەت بويىنشا كومىر قىشقىل گازىن شىعارۋ ۇقىعى ساۋدا بازارى قۇرىلىسىن كۇشەيتۋ كەرەك. جاراقسىز قاتتى زاتتاردى جان - جاقتى جونگە سالۋ ارەكەتىن اتقارىپ، اشىق اسپاندى، تۇنىق سۋدى، تازا توپىراقتى قورعاۋ شايقاسىن ىشكەرىلەي ويداعىداي جۇرگىزىپ، جاڭا لاستاۋشى زاتتاردى جونگە سالۋدى كۇشەيتۋ كەرەك. ”ءۇش تەرىستىك“ ينجەنەرياسىنان قامال الۋ شايقاسىن تىڭعىلىقتى ىلگەرىلەتىپ، جاراتىلىستىق قورعالاتىن جەرلەردى بىرىكتىرىپ ساپالىلاندىرۋدى اتقارۋ كەرەك. اۋا رايىن باقىلاۋ - ولشەۋ، الدىن الا مالىمەت بەرۋ، ساقتاندىرۋ جۇيەسى قۇرىلىسىن كۇشەيتىپ، سولتۇستىك وڭىرلەردىڭ تاسقىننان ساقتانۋ، تاسقىن سۋدى ىعىستىرۋ، اپاتقا قارسى تۇرۋ نەگىزدىك قۇرىلعىلارىنداعى ولقىلىقتاردى جەدەل تولىقتاپ، ناشار اۋا رايىنا توتەپ بەرۋ قابىلەتىن جوعارىلاتۋ كەرەك.

ماقالادا مىنالار اتاپ كورسەتىلدى: حالىق تۇرمىسى بارىنەن ماڭىزدى دەگەنگە تاباندى بولىپ، حالىق بۇقاراسىنا كوپتەپ ناقتى ىستەر ىستەۋگە قۇلشىنىس جاساۋ كەرەك. جۇمىستاندىرۋدى الدىمەن ويلاستىرۋ ساياسات باعدارىن كۇشەيتىپ، جۇمىس ورنىن ورنىقتىرۋ، كولەمىن كەڭەيتۋ، ساپاسىن جوعارىلاتۋ ارەكەتىن اتقارىپ، جوعارى مەكتەپ بىتىرگەن وقۋشىلار، شارۋا جۇمىسكەرلەر سياقتى ءتۇيىندى قاۋىمنىڭ جۇمىستانۋىن كۇش سالا ورنىقتىرىپ، يكەمدى جۇمىستانۋشىلاردىڭ، جاڭا جۇمىستانۋ كۇيىندەگى ادامداردىڭ جۇمىسشى - قىزمەتكەرلەر قامسىزداندىرۋىنا قاتىناسۋىنا دەم بەرۋ جانە وعان قولداۋ كورسەتۋ كەرەك. وقۋ - اعارتۋ بايلىعىنىڭ ورنالاسۋ قۇرىلىمىن رەتتەۋدى ىلگەرىلەتىپ، ادەتتەگى ورتا مەكتەپتەرگە وقۋشى قابىلداۋ سانىمەن قامداۋىن جانە ساپالى جوعارى مەكتەپتەردىڭ تولىق كۋرسقا وقۋشى قابىلداۋىن ارتتىرۋ كەرەك. ءدارى - دارمەكتى شوعىرلى ساتىپ الۋدى ساپالىلاندىرىپ، ەمدەۋ قامسىزداندىرۋىنىڭ تولەۋ ءتاسىلى رەفورماسىن تەرەڭدەتۋ كەرەك. دەنساۋلىقتى قالپىنا كەلتىرۋ، كۇتىمدەۋ كولەمىن ارتتىرۋ، دارەجەسىن جوعارىلاتۋ ينجەنەرياسىن اتقارىپ، ۇزاق ۋاقىت كۇتىمدەۋدى قامسىزداندىرۋ ءتۇزىمىن اتقارىپ، جالعىز باستى قارت سياقتى قيىنشىلىعى بار قاۋىمعا قامقورلىق جاساۋدى، كومەكتەسۋ - سۇيەمەلدەۋدى كۇشەيتۋ كەرەك. ۇيلەنۋگە، بالالى بولۋعا بەلسەندى بولۋ كوزقاراسىن دارىپتەپ، جاڭادان تۋىلعان جان سانى كولەمىن قۇلشىنا ورنىقتىرۋ كەرەك. ءوندىرىس حاۋىپسىزدىگى، اپاتتان ساقتانۋ، اپات شىعىنىن ازايتۋ، اپاتتان قۇتقارۋ، ازىق - تۇلىك، ءدارى - دارمەك حاۋىپسىزدىگى سياقتى قىزمەتتەردى تىڭعىلىقتى ويداعىداي ىستەۋ كەرەك. قوعامدىق پسيحولوگيالىق جەتەكتەۋدى كۇشەيتۋ كەرەك.

ماقالادا مىنالار اتاپ كورسەتىلدى: تومەنگى شەكتى بەرىك ساقتاۋعا تاباندى بولىپ، ءتۇيىندى سالالارداعى حاۋىپ - قاتەرلەردى بەلسەندى، ۇيلەسىمدى جويۋ كەرەك. حاۋىپ - قاتەردەن ساقتانۋ جانە دامۋدى جەبەۋ ساياساتىنىڭ سايكەسۋىن كۇشەيتىپ، دامۋ سەرپىمدىلىگىن اناعۇرلىم كۇشەيتۋ كەرەك. قورا - جاي بازارىن كۇش سالا ورنىقتىرىپ، قالا جاعدايىنا قاراي ساياسات قولدانىپ، ارتۋ مولشەرىن تىزگىندەپ، ىركىندىنى ازايتىپ، قامداۋدى ساپالىلاندىرىپ، ىركىندى تاۋار ۇيلەردى ساتىپ الىپ قامتاماسىزداندىرۋ سيپاتتى تۇرعىن ءۇي قاتارلىلارعا ءتۇيىندى پايدالانۋعا شابىت بەرۋ كەرەك. تۇرعىن ءۇي الەۋمەتتىك قورى ءتۇزىمى رەفورماسىن تەرەڭدەتىپ، ”جاقسى ءۇي“ قۇرىلىسىن تارتىپپەن ىلگەرىلەتىپ، قورا - جاي شارۋاشىلىعىن دامىتۋدىڭ جاڭا ۇلگىسىن جەدەل قالىپتاستىرۋ كەرەك. جەرگىلىكتى ۇكىمەتتەردىڭ قارىز حاۋىپ - قاتەرىن بەلسەندى، ءتارتىپتى جويىپ، جەر - جەردىڭ قارىزدى ىرىقتىلىقپەن قايتارۋىنا قۋزاۋ سالۋ كەرەك. قارىزدى قايتا ۇيىمداستىرۋ جانە اۋىستىرۋ ءادىسىن جاقسارتىپ، كوپ ءتۇرلى شارانى قاتار قولدانىپ، جەرگىلىكتى ۇكىمەتتەردىڭ قارجى قۇراۋ تەكشەسىنىڭ تيجارات سيپاتتى قارىز حاۋىپ - قاتەرىن جويۋ كەرەك.