شي جينپيڭ گەرمانيانىڭ زۇڭليى مەرزبەن كەزدەستى

2 - ايدىڭ 25 - كۇنى تۇستەن كەيىن مەملەكەت ءتوراعاسى شي جينپيڭ بەيجيڭدەگى دياۋيۇيتاي مەملەكەتتىك قوناق ۇيىندە جۇڭگوعا رەسمي ساپارمەن كەلگەن گەرمانيانىڭ زۇڭليى مەرزبەن كەزدەستى.

سۋرەتتى شينحۋا اگەنتتىگىنىڭ ءتىلشىسى لي شياڭ تۇسىرگەن

شينحۋا اگەنتتىگى، 2 - ايدىڭ 25 - كۇنى، بەيجيڭ (ءتىلشى دۇڭ شۋە). 2 - ايدىڭ 25 - كۇنى تۇستەن كەيىن مەملەكەت ءتوراعاسى شي جينپيڭ بەيجيڭدەگى دياۋيۇيتاي مەملەكەتتىك قوناق ۇيىندە جۇڭگوعا رەسمي ساپارمەن كەلگەن گەرمانيانىڭ زۇڭليى مەرزبەن كەزدەستى.

شي جينپيڭ مىنالاردى اتاپ كورسەتتى: جۇڭگو مەن گەرمانيا جەكە - جەكە دۇنيە جۇزىندەگى 2 -، 3 - ۇلكەن ەكونوميكالىق تۇلعا، جۇڭگو - گەرمانيا قارىم - قاتىناسى ەكى ەلدىڭ مۇددەسىنە عانا ەمەس، ەۆروپا مەن دۇنيە جۇزىنە دە ماڭىزدى ىقپال جاسايدى. قازىر حالىقارالىق جاعداي دۇنيە جۇزىلىك ەكىنشى سوعىس اياقتاعاننان بەرگى ەڭ تەرەڭ وزگەرىستەردى باستان كەشىرۋدە. دۇنيە ءجۇزى بىلىققان سايىن، جۇڭگو مەن گەرمانيا ستراتەگيالىق قارىم - قاتىناستى كۇشەيتىپ، ستراتەگيالىق ءوزارا سەنىمدىلىكتى ارتتىرىپ، جۇڭگو مەن گەرمانيانىڭ جان - جاقتى ستراتەگيالىق سەرىكتەستىك قارىم - قاتىناسىنىڭ ۇزدىكسىز تىڭ دامۋعا قول جەتكىزۋىن ىلگەرىلەتۋى كەرەك.

شي جينپيڭ كەلەسى قادامداعى جۇڭگو - گەرمانيا قارىم - قاتىناسىنىڭ دامۋى جونىندە 3 ءتۇرلى پىكىر ورتاعا قويدى. ءبىرىنشى، ءوزارا قولدايتىن سەنىمدى سەرىك بولۋ كەرەك. جۇڭگو مەن گەرمانيا ءوزىن تياناق ەتىپ، جەدەل دامىپ، ءوزارا قۇرمەت ەتۋگە، ءوزارا سەنىم ارتۋعا، اشىق سەلبەسۋگە تاباندى بولىپ، ءوزارا پايدا جەتكىزىپ، تەڭ يگىلىككە كەنەلۋدىڭ تابىستى حيكاياسىن جازدى. جۇڭگو بەيبىت دامۋ جولىنا تاباندى بولىپ، جۇڭگو ۇلگىسىندەگى وسىزامانداندىرۋدى جۇزەگە اسىرۋعا قابىلەتتى جانە جىگەرلى بولىپ، گەرمانيانى قامتىعان دۇنيە جۇزىندەگى ءار ەلمەن دامۋ ورايىنان ۇزدىكسىز يگىلىكتەنەدى. گەرمانيا جاقتىڭ جۇڭگونىڭ دامۋىنا وبيەكتيۆ، اقىلعا سيىمدى مامىلە جاساپ، جۇڭگوعا بەلسەندى، ناقتى ساياسات اتقارىپ، جۇڭگو جاقپەن بىرگە جۇڭگو - گەرمانيا قارىم - قاتىناسىنىڭ ورنىقتى، باياندى دامۋىن ىلگەرىلەتۋىن ءۇمىت ەتەمىن.

ەكىنشى، اشىق، ءوزارا ءتيىمدى جاڭالىق اشۋ سەرىگى بولۋ كەرەك. گەرمانيا ۇكىمەتى تەحنيكا، جاڭالىق اشۋ، سان - سيفر سياقتى سالالاردا جاڭا دامۋ ستراتەگياسىن العا قويىپ، جۇڭگونىڭ ”15 - بەسجىلدىق“ كەزىندەگى زەردەلىلەنۋ، جاسىلدانۋ، توعىسۋ سىندى دامۋ بەتالىسىمەن بارىنشا قابىستى. ەكى جاق دامۋ ستراتەگياسىن ۇشتاستىرۋدى كۇشەيتىپ، ەكى ەلدىڭ دارىندى، ءبىلىم، تەحنيكا جاقتارىندا قوس باعىتتا اۋىسۋىن قولداپ، جاساندى زەردە سياقتى الدىڭعى لەكتىك سالالارداعى پىكىرلەسۋ مەن سەلبەستىكتى جەبەۋى كەرەك. ەكى جاق باسەكە مەن سەلبەستىكتىڭ قاتىناسىن دۇرىس يگەرىپ، ءوزارا پايدا جەتكىزىپ، تەڭ يگىلىككە كەنەلەتىن سەلبەستىك جولىن قاراستىرىپ، كاسىپ سالاسى تىزبەگىنىڭ، قامداۋ تىزبەگىنىڭ ورنىقتى، ىركىلىسسىز بولۋىن بىرگە قورعاۋى كەرەك.

ءۇشىنشى، ءوزارا ءتۇسىنىسەتىن، تاتۋ - ءتاتتى گۋمانيتارلىق سەرىك بولۋ كەرەك. جۇڭگو مەن گەرمانيا _ تەرەڭ مادەنيەت نەگىزى بار ءىرى ەلدەر، ەكى جاق وركەنيەتتەردىڭ ءوزارا ۇيرەنۋىن، ءوزارا ۇلگى الۋىن كۇشەيتىپ، گۋمانيتارلىق اۋىس - كۇيىستى جيىلەتىپ، جۇڭگو - گەرمانيا دوستىعىنىڭ حالىق رايى نەگىزىن بەكەمدەۋى كەرەك.

شي جينپيڭ مىنالاردى باسا دارىپتەدى: جەدەل قۇبىلعان دۇنيە ءجۇزىنىڭ 100 جىلدىق وزگەرىس جاعدايى الدىندا، ءار ەل تار جول، تايعاق كەشۋلەردى بىرگە وتكەرىپ، تاعدىرلاس بولۋى كەرەك. جۇڭگو مەن گەرمانيا بىرلەسكەن مەملەكەتتەر ۇيىمىنىڭ ۇيتقىلىق ورنىنا تاباندى بولىپ، بىرلەسكەن مەملەكەتتەر ۇيىمىنىڭ جەتەكشىلىك رولىن قايتا سەرپىلتىپ، باستاماشىلدىقپەن كوپ جاقتىلىقتىڭ قورعاۋشىسى، حالىقارالىق زاڭمەن جونگە سالۋدىڭ امالياتتا ايگىلەۋشىسى، ەركىن ساۋدانىڭ قورعاۋشىسى، ىنتىماقتاسا سەلبەسۋدىڭ دارىپتەۋشىسى بولۋى كەرەك. جۇڭگو جاق ەۆروپانىڭ ءوز كۇشىنە سۇيەنىپ ءوزىن الۋەتتەندىرۋىن قولدايدى، ەۆروپا جاقتىڭ جۇڭگو جاقپەن ءبىر باعىتتا ءجۇرىپ، ستراتەگيالىق سەرىكتەستىك ورنىنا تاباندى بولىپ، اشىق، سيىسىمدى بولۋعا، سەلبەسىپ تەڭ يگىلىككە كەنەلۋگە تاباندى بولىپ، جۇڭگو - ەۆروپا قارىم - قاتىناسىنىڭ اناعۇرلىم زور دامۋىن جۇزەگە اسىرىپ، دۇنيە ءجۇزىنىڭ بەيبىتشىلىگى مەن دامۋىنا اناعۇرلىم زور ۇلەس قوسۋىن ءۇمىت ەتەدى.

مەرز مىنالاردى ءبىلدىردى: جۇڭگو حالقى كوكتەم مەرەكەسىن قۇتتىقتاعان كەزدە جۇڭگوعا ساپارلاي كەلگەنىمە وتە قۋانىشتىمىن، جۇڭگو حالقىنىڭ جىلقى جىلىنىڭ قۇتتى بولۋىن تىلەيمىن. گەرمانيا مەن جۇڭگو ديپلوماتيالىق قارىم - قاتىناس ورناتقاننان بەرى دوستىق بارىس - كەلىس پەن تىعىز سەلبەستىكتى ساقتاپ، ەكى ەل حالقىنا باقىت جاراتتى. گەرمانيا جاق جۇڭگومەن قارىم - قاتىناسىن قاستەرلەيدى، ءبىر جۇڭگو ساياساتىن باتىل اتقارادى، جۇڭگو جاقپەن بىرگە دوستىق ءداستۇردى جالعاستىرىپ، ءوزارا قۇرمەت ەتۋگە، اشىق سەلبەسۋگە تاباندى بولىپ، ەكى ەلدىڭ جان - جاقتى ستراتەگيالىق سەرىكتەستىك قارىم - قاتىناسىن ۇزدىكسىز تەرەڭدەتۋدى قالايدى. گەرمانيا كاسىپورىن سالاسى جۇڭگو بازارىنا ايرىقشا ءمان بەرەدى، جۇڭگومەن سەلبەستىكتى اناعۇرلىم تەرەڭدەتىپ، ءوزارا پايدا جەتكىزىپ، تەڭ يگىلىككە كەنەلۋدى، بىرگە دامۋدى جۇزەگە اسىرۋدى ءۇمىت ەتەدى. حالىقارالىق جاعدايدا تەرەڭ وزگەرىستەر تۋىلۋدا، گەرمانيا مەن جۇڭگو دۇنيە جۇزىلىك سايىستارعا بىرگە توتەپ بەرۋدىڭ ماڭىزدى جاۋاپكەرشىلىگىن ارقالاپ وتىر. گەرمانيا جاق جۇڭگو جاقپەن سايكەسۋدى كۇشەيتىپ، ەركىن ساۋداعا تاباندى بولىپ، قورعانىمپازدىققا قارسى تۇرۋدى ءۇمىت ەتەدى. ەۆروپا وداعىنىڭ جۇڭگومەن سەنىمدى جانە باياندى ەكونوميكا - ساۋدا سەلبەستىك قارىم - قاتىناسىن دامىتۋى ەكى جاقتىڭ مۇددەسىنە ۇيلەسەدى ءارى دۇنيە ءجۇزىنىڭ ورنىقتىلىعى مەن گۇلدەنۋىنە ءتيىمدى، گەرمانيا جاق ەۆروپا مەن جۇڭگونىڭ پىكىرلەسۋدى جانە سەلبەستىكتى كۇشەيتۋىن قولدايدى.

ەكى ەل باسشىلارى ۋكراينا داعدارىسى جونىندە پىكىر اۋىستىردى. شي جينپيڭ جۇڭگو جاقتىڭ پرينسيپتىك تۇرعىسىن بايىمداپ، بىلاي دەپ اتاپ كورسەتتى: شەشۋشى ءتۇيىن تىلدەسۋ، كەلىسسوز وتكىزۋ ارقىلى شەشۋ جوباسىن قاراستىرۋعا تاباندى بولۋ. ءار جاقتىڭ تەڭ تۇرعىدا ات سالىسۋىنا شىنايى كەپىلدىك ەتىپ، بەيبىتشىلىك نەگىزىن بەكەمدەۋ؛ ءار جاقتىڭ ۇيلەسىمدى كوڭىل ءبولىپ وتىرعان ماسەلەلەرىنە ءمان بەرۋگە شىنايى كەپىلدىك ەتىپ، بەيبىتشىلىك تىلەگىن كۇشەيتۋ؛ ورتاق حاۋىپسىزدىكتى جۇزەگە اسىرۋعا كەپىلدىك ەتىپ، باياندى بەيبىتشىلىك قۇرىلىمىن ورناتۋ كەرەك.

ەكى جاق «جۇڭحۋا حالىق رەسپۋبليكاسى مەن گەرمانيا فەدەراتسيالىق رەسپۋبليكاسىنىڭ بىرلەسكەن اقپاراتتىق مالىمدەمەسىن» جاريالادى.

ۋاڭ ي كەزدەسۋدە بىرگە بولدى.