14 - كەزەكتى مەملەكەتتىك حالىق قۇرىلتايى تۇراقتى كوميتەتىنىڭ 21 - ءماجىلىسى بەيجيڭدە اشىلدى

«حالىق گازەتى»، 2 - ايدىڭ 25 - كۇنى، بەيجيڭ (ءتىلشى پىڭ بو). مەملەكەتتىك 14 - كەزەكتى حالىق قۇرىلتايى تۇراقتى كوميتەتىنىڭ 21 - ءماجىلىسى 2 - ايدىڭ 25 - كۇنى تۇستەن كەيىن بەيجيڭدەگى حالىق سارايىندا ءبىرىنشى جالپى ءماجىلىسىن اشتى. كوميتەت باستىعى جاۋ لىجي باسقاردى.

تۇراقتى كوميتەت قۇرامىنداعىلاردان 152 ادام ماجىلىسكە قاتىناستى، ماجىلىسكە قاتىناسقان ادام سانى زاڭدا بەلگىلەنگەن ادام سانىنا ۇيلەسەدى.

ءماجىلىس مەملەكەتتىك حالىق قۇرىلتايى نەگىزگى زاڭ جانە زاڭدار كوميتەتىنىڭ ورىنباسار مەڭگەرۋشى مۇشەسى لو يۋان جاساعان قوعامدىق قۇتقارۋ زاڭى جوباسىنا وزگەرىس ەنگىزۋ احۋالى جونىندەگى مالىمەتتى تىڭدادى. جوبانىڭ 2 - رەت قارالعان نۇسقاسىندا زاڭ شىعارۋ ماقساتى كەمەلدەندىرىلىپ، جەكەلەردىڭ جەكە قۇپيالىعى مەن جەكەلەردىڭ ينفورماتسياسىن قورعاۋ جاعىنداعى بەلگىلەمەلەردى ونان ارى كۇشەيتۋ، ەرەكشە قيىنشىلىعى بارلاردى ەڭ تومەنگى تۇرمىستى قامتاماسىزداندىرۋ، قۇتقارۋ كولەمىنە ەنگىزىپ، قىزمەت وتەۋ تۇرىندەگى قۇتقارۋ جونىندە ارناۋلى بەلگىلەمە شىعارۋ ورتاعا قويىلدى.

قاتىستى ءتارتىپ مەحانيزمىن ونان ارى كەمەلدەندىرىپ، ەكونوميكالىق باقىلاۋدا جالعانشىلىق ىستەۋدى توسۋ، قازىنا ەكونوميكالىق باقىلاۋ ءتارتىبىن قالىپتاستىرۋ، تىركەۋگە الىنعان بۇعالترلار كاسىبىنىڭ اقاۋسىز دامۋىن جەبەۋ ءۇشىن، مەملەكەتتىك كەڭەس تىركەۋگە الىنعان بۇعالترلار زاڭىنا وزگەرىس ەنگىزۋ جوباسىن قاراۋعا ۇسىنۋ جونىندەگى كەڭەس جوباسىن العا قويدى. مەملەكەتتىك كەڭەستىڭ تاپسىرۋىمەن قازىنا مينيسترلىگىنىڭ مينيسترى لان فۋ - ان تۇسىنىك جاسادى.

مەملەكەتتىك ءورت ءسوندىرۋ - ورتتەن ساقتانۋ قۇتقارۋ - كومەكتەسۋ قىزمەتكەرلەرىن باسقارۋدى ارناعا ءتۇسىرىپ، ولاردىڭ زاڭدى ۇقىق - مۇددەسىن قامتاماسىزداندىرىپ، باقىلاۋدى كۇشەيتىپ، مىندەتىن دۇرىس اتقارىپ، جاۋاپكەرشىلىگىن ادا ەتۋدى جەبەپ، مەملەكەتتىڭ ءورت ءسوندىرۋ - ورتتەن ساقتانۋ امبەباپ قۇتقارۋ - كومەكتەسۋ قوسىنى قۇرىلىسىن جاپپاي ىلگەرىلەتۋ ءۇشىن، مەملەكەتتىك كەڭەس مەملەكەتتىك ءورت ءسوندىرۋ - ورتتەن ساقتانۋ قۇتقارۋ - كومەكتەسۋ قىزمەتكەرلەرى زاڭى جوباسىن قاراۋعا ۇسىنۋ جونىندەگى كەڭەس جوباسىن العا قويدى. مەملەكەتتىك كەڭەستىڭ تاپسىرۋىمەن شۇعىل جاعدايعا توتەپ بەرۋدى باسقارۋ مينيسترلىگى مينيسترىنىڭ ورىنباسارى شۇي جيا - اي تۇسىنىك جاسادى.

وسى كەزەكتى تۇراقتى كوميتەت ءماجىلىسىنىڭ ماڭىزدى مىندەتى 14 - كەزەكتى مەملەكەتتىك حالىق قۇرىلتايىنىڭ 4 - ماجىلىسىنە ازىرلىك كورۋ. ءماجىلىس مەملەكەتتىك حالىق قۇرىلتايى تۇراقتى كوميتەتى قىزمەت مالىمەتىنىڭ نۇسقاسى، كوميتەت باستىقتارى ءماجىلىسىنىڭ 14 - كەزەكتى مەملەكەتتىك حالىق قۇرىلتايى 4 - ءماجىلىسىنىڭ قارار جوباسى، جورالار القاسى جانە باس حاتشىنىڭ ەسىمدىگى جوباسى، سىرتتان قاتىناسۋشلاردىڭ ەسىمدىگى جوباسى سياقتى ءۇش ۇسىنىس جوبانى قاراپ شىقتى، مەملەكەتتىك حالىق قۇرىلتايى تۇراقتى كوميتەتىنىڭ زاڭدى اداقتاۋ قىزمەتىنىڭ جاعدايى جانە قاتىستى زاڭدار مەن قاۋلىلاردى ءبىر جاقتى ەتۋ پىكىرى جونىندەگى بايانداما نۇسقاسىن قارادى.

ءماجىلىس مەملەكەتتىك حالىق قۇرىلتايى تۇراقتى كوميتەتى ۋاكىلدەردىڭ تولىمدىلىعىن تەكسەرۋ كوميسسياسىنىڭ مەڭگەرۋشى مۇشەسى ياڭ شياۋچاۋدىڭ ءىشىنارا ۋاكىلدەردىڭ ۋاكىلدىك تولىمدىلىعى جونىندەگى بايانداماسىن تىڭدادى.

ماجىلىستە تاعى مىندەتكە تاعايىنداۋ، مىندەتتەن قالدىرۋ جوباسى قارالدى.

مەملەكەتتىك حالىق قۇرىلتايى تۇراقتى كوميتەتى باستىعىنىڭ ورىنباسارلارى لي حۇڭجۇڭ، ۋاڭ دۇڭميڭ، شياۋ جيە، جىڭ جيانباڭ، ديڭ جۇڭلي، ساي دافىڭ، حى ۋەي، ۋ ۋەيحۋا، تيە نيڭ، پىڭ چيڭحۋا، جاڭ چيڭ - ۋەي، لوساڭجياڭسۇن، شوكىرات زاكىر، باس حاتشى ليۋ چي ماجىلىسكە قاتىناستى.

مەملەكەتتىك كەڭەستىڭ مۇشەسى چىن ي - چين، ەڭ جوعارى حالىق سوت مەكەمەسىنىڭ باستىعى جاڭ جۇن، ەڭ جوعارى حالىق پروكۋراتۋراسىنىڭ باس پروكۋرورى يىڭ يۇڭ، مەملەكەتتىك باقىلاۋ - تەكسەرۋ كوميتەتىندەگى جاۋاپتى جولداستار، مەملەكەتتىك حالىق قۇرىلتايى ارناۋلى كوميتەتتەرىنىڭ مۇشەلەرى، ولكەلىك، اۆتونوميالى رايوندىق، توتە قاراستى قالالىق حالىق قۇرىلتايى تۇراقتى كوميتەتتەرىندەگى جاۋاپتى جولداستار، ءىشىنارا تەتە ولكە دارەجەلى قالالىق حالىق قۇرىلتايى تۇراقتى كوميتەتتەرىندەگى نەگىزگى جاۋاپتى جولداستار، قاتىستى تاراۋلارداعى جاۋاپتى جولداستار ماجىلىسكە سىرتتاي قاتىناستى.