سۇڭ پيڭ جولداستىڭ سۇيەگى بەيجيڭدە ورتەلدى

3 - ايدىڭ 10 - كۇنى سۇڭ پيڭ جولداستىڭ سۇيەگى بەيجيڭدەگى باباۋشان توڭكەرىستىك قۇرباندار قابىرستانىندا ورتەلدى. شي جينپيڭ، لي چياڭ، جاۋ لىجي، ۋاڭ حۋنيڭ، ساي چي، ديڭ شۋەشياڭ، لي شي، حان جىڭ قاتارلىلار باباۋشانعا بارىپ سۇيەكپەن قوشتاستى، حۋ جينتاۋ گۇل شەڭبەر ۇسىنىپ ازا ءبىلدىردى. سۋرەتتە: شي جينپيڭ سۇڭ پيڭنىڭ تۋىس - تۋعاندارىمەن قول الىسىپ، شىنايى حال سۇراۋدا.

سۋرەتتى شينحۋا اگەنتتىگىنىڭ ءتىلشىسى شيە حۋانچى تۇسىرگەن

شينحۋا اگەنتتىگى، 3 - ايدىڭ 10 - كۇنى بەيجيڭ. جۇڭگو كوممۋنيستىك پارتياسىنىڭ تاڭداۋلى مۇشەسى، ۇزاق سىننان وتكەن ادال كوممۋنيزم جاۋىنگەرى، كورنەكتى پرولەتاريات توڭكەرىسشىسى، ساياساتشى، پارتيا مەن مەملەكەتتىڭ كورنەكتى باسشىسى، جۇڭگو كوممۋنيستىك پارتياسى 13 - كەزەكتى ورتالىق كوميتەتى ساياسي بيۋروسىنىڭ تۇراقتى مۇشەسى، مەملەكەتتىك كەڭەستىڭ بۇرىنعى مۇشەسى سۇڭ پيڭ جولداستىڭ سۇيەگى 3 - ايدىڭ 10 - كۇنى بەيجيڭدەگى باباۋشان توڭكەرىستىك قۇرباندار قابىرستانىندا ورتەلدى.

سۇڭ پيڭ جولداس 2026 - جىلى 3 - ايدىڭ 4 - كۇنى ساعات 15 تەن 36 مينۋت وتكەندە بەيجيڭدە 109 جاسىندا ناۋقاستان قايتىس بولدى.

سۇڭ پيڭ جولداستىڭ ناۋقاسى اۋىرلاعان كەزدە جانە قايتىس بولعاننان كەيىن، شي جينپيڭ، لي چياڭ، جاۋ لىجي، ۋاڭ حۋنيڭ، ساي چي، ديڭ شۋەشياڭ، لي شي، حان جىڭ، حۋ جينتاۋ قاتارلى جولداستار شيپاحاناعا بارىپ كوڭىلىن سۇرادى نەمەسە ءتۇرلى فورمالارمەن سۇڭ پيڭ جولداستىڭ قايتىس بولعاندىعىنا قايعىلى ازا ءبىلدىردى ءارى ونىڭ تۋىس - تۋعاندارىنان شىنايى حال سۇرادى.

3 - ايدىڭ 10 - كۇنى تۇستەن بۇرىن باباۋشان توڭكەرىستىك قۇرباندار قابىرستانىنىڭ زالى قايعىلى جىم - جىرتتىققا شومىپ، ازالى مۋزىكا باياۋ تولقىپ تۇردى. زالدىڭ تورىنە ”سۇڭ پيڭ جولداسقا قايعىلى ازا بىلدىرەمىز“ دەگەن اق ءتۇستى جازۋ جازىلعان قارا كەرمە تۋ ىلىنگەن، كەرمە تۋدىڭ استىنا سۇڭ پيڭ جولداستىڭ سۋرەتى قويىلعان. سۇڭ پيڭ جولداستىڭ سۇيەگى گۇل شوقتارىمەن، ارشامەن قورشالىپ، ۇستىنە جۇڭگو كوممۋنيستىك پارتياسىنىڭ نارت قىزىل تۋى جابىلعان.

تۇستەن بۇرىن ساعات 9 دان 30 مينۋت وتكەندە، شي جينپيڭ، لي چياڭ، جاۋ لىجي، ۋاڭ حۋنيڭ، ساي چي، ديڭ شۋەشياڭ، لي شي، حان جىڭ قاتارلىلار ازالى مۋزىكا ءۇنى ىشىندە سۇڭ پيڭ جولداستىڭ سۇيەگىنىڭ الدىنا باياۋ كەلىپ، ءۇنسىز ازا ءبىلدىرىپ، سۇڭ پيڭ جولداستىڭ سۇيەگىنە 3 رەت تاعزىم ەتتى ءارى سۇڭ پيڭ جولداستىڭ تۋىس - تۋعاندارىمەن ءبىر - بىرلەپ قول الىسىپ، حال سۇرادى. حۋ جينتاۋ گۇل شەڭبەر ۇسىنىپ، سۇڭ پيڭ جولداستىڭ قايتىس بولعاندىعىنا ازا ءبىلدىردى.

پارتيا مەن مەملەكەتتىڭ قاتىستى باسشى جولداستارى سۇيەكپەن قوشتاستى نەمەسە ءتۇرلى تاسىلدەرمەن ازا ءبىلدىردى. ورتالىق پەن مەملەكەت ورگاندارىنىڭ قاتىستى تاراۋلارىنداعى جاۋاپتى جولداستار، سۇڭ پيڭ جولداستىڭ كوزى تىرىسىندەگى دوستارى مەن اۋىلداستارىنىڭ ۋاكىلدەرى دە سۇيەكپەن قوشتاستى.