حالىقارالىق بازاردا مۇناي باعاسى كۇرت قىمباتتاۋدان زور مولشەردە ارزانداۋعا ءوتتى 

بازاردا ورتا شىعىس وڭىرىندەگى قاقتىعىستىڭ ىقپالى تۋرالى الاڭداۋدىڭ باسەڭدەۋى سەبەبىنەن، حالىقارالىق بازاردا مەرزىمدەمەلى تاۋار تۇرىندەگى شيكىزاتتىق مۇنايدىڭ باعاسى كۇرت وزگەرىپ، بارىنشا قىمباتتاۋدان زور مولشەردە ارزانداۋعا اۋىستى.

بەيجيڭ ۋاقىتى بويىنشا 3 - ايدىڭ 10 - كۇنى تۇستەن بۇرىن ساعات 11 گە دەيىن، نيۋ - يورك تاۋار ايىرباسى بيرجاسىندا 4 - ايدا تاپسىرىلاتىن مەرزىمدەمەلى تاۋار تۇرىندەگى جەڭىل شيكىزاتتىق مۇنايدىڭ ءار باررەلىنىڭ باعاسى ەڭ تومەن بولعاندا 84.43 ا ق ش دوللارىنا، 5 - ايدا تاپسىرىلاتىن لوندون برەنت بازارىنداعى مەرزىمدەمەلى تاۋار تۇرىندەگى مۇنايدىڭ ءار باررەلىنىڭ باعاسى ەڭ تومەن بولعاندا 88.05 ا ق ش دوللارىنا تومەندەدى. وسىدان ءبىر كۇن بۇرىن، حالىقارالىق بازاردا مۇناي باعاسى ءبىر مەزەت 120 ا ق ش دوللارىنا جۋىقتاعان ەدى.

جەرگىلىكتى ۋاقىت بويىنشا 3 - ايدىڭ 9 - كۇنى، ا ق ش زۇڭتۇڭى دونالد ترامپ ءبىر رەتكى اقپار جاريالاۋ ماجىلىسىندە، ا ق ش مەن يزاريلدىڭ يرانعا جاساعان سوققىسى بازاردا الاساپىران تۋدىرعانى سەبەپتى، مۇنايدىڭ باعاسىن تەجەۋ ءۇشىن، مۇنايعا قاتىستى ءبىرقىدىرۋ جازالاۋ شارالارىن كۇشىنەن قالدىراتىنىن ايتقان. ول تاعى اسكەري ارەكەتتىڭ ”تەز ارادا“ اياقتايتىنىن، ءبىراق وسى اپتادا اياقتامايتىنىن بىلدىرگەن.

7 مەملەكەت توبىنىڭ قازىنا مينيسترلەرى 3 – ايدىڭ 9 - كۇنى ينتەرنەت ارقىلى ءماجىلىس وتكىزىپ، قازىرگى ورتا شىعىس وڭىرىندەگى جاعدايدىڭ ىقپالىن تالقىلاعان. ماجىلىستەن كەيىن مالىمدەمە جاريالاپ، ەنەرگيا بازارىنداعى وزگەرىستەردى ۇزدىكسىز باقىلايتىنىن ءارى دۇنيە جۇزىلىك ەنەرگيامەن قامداۋ تىزبەگىنە قولداۋ كورسەتۋ ءۇشىن قورداعى مۇنايدى ىسكە قوسۋ قاتارلى قاجەتتى شارالاردى قولدانۋعا دايىن ەكەنىن بىلدىرگەن.

كەلۋ قاينارى: حالىق تورابى