شي جينپيڭ ساۋد ارابياسىنىڭ پاتشا مۇراگەرى، قوسىمشا باس ءۋازىرى مۇحاممەدپەن تەلەفوندا سويلەستى

شينحۋا اگەنتتىگى، 4 - ايدىڭ 20 - كۇنى، بەيجيڭ. 4 - ايدىڭ 20 - كۇنى تۇستەن كەيىن مەملەكەت ءتوراعاسى شي جينپيڭ ۋاعدا بويىنشا ساۋد ارابياسىنىڭ پاتشا مۇراگەرى، قوسىمشا باس ءۋازىرى مۇحاممەدپەن تەلەفوندا سويلەستى.

شي جينپيڭ بىلاي دەپ اتاپ كورسەتتى: جۇڭگو جاق ساۋد ارابياسىمەن قارىم - قاتىناستى دامىتۋعا ايرىقشا ءمان بەرەدى، ءوزارا قۇرمەت ەتۋ، تەڭ تۇرعىدا مامىلە جاساۋ، ءوزارا پايدا جەتكىزىپ، تەڭ يگىلىككە كەنەلۋ پرينسيبىنە باستان - اياق تاباندى بولادى. بيىل _ ەكى ەلدىڭ جان - جاقتى ستراتەگيالىق سەرىكتەستىك قارىم - قاتىناس ورناتقاندىعىنىڭ 10 جىلدىعى، جۇڭگو جاق ساۋد ارابياسى جاقپەن وسىنى وراي ەتىپ، ستراتەگيالىق ءوزارا سەنىمدىلىكتى تەرەڭدەتىپ، ناقتى سەلبەستىكتى كۇشەيتىپ، ءار جىكتەگىلەردىڭ بارىس - كەلىسىن كەڭەيتىپ، جۇڭگو - ساۋد ارابياسى قارىم - قاتىناسىنىڭ كەڭدىگى مەن تەرەڭدىگىن ۇزدىكسىز كەڭەيتىپ، جۇڭگونىڭ اراب ەلدەرىمەن قارىم - قاتىناسىنىڭ دامۋىندا ۇلگىلىك رول اتقارۋدى قالايدى.

قازىرگى ورتا شىعىس، شىعاناق رايونىنىڭ جاعدايىنا قاراتا، شي جينپيڭ بىلاي دەپ باسا دارىپتەدى: جۇڭگو جاق سوعىستى دەرەۋ توقتاتۋدى دارىپتەپ، بەيبىتشىلىكتى قالپىنا كەلتىرۋگە ءتيىمدى بارلىق قۇلشىنىستى قولداپ، تالاس - تارتىستى ساياسي، ديپلوماتيالىق جولمەن شەشۋگە تاباندى بولادى. حورمۋز بۇعازى قالىپتى قاتىناۋدى ساقتاۋى كەرەك، بۇل وڭىردەگى ەلدەر مەن حالىقارالىق قوعامنىڭ ورتاق مۇددەسىنە ۇيلەسەدى. جۇڭگو جاق وڭىردەگى ەلدەردىڭ تاتۋ كورشىلىك، دامۋ، حاۋىپسىزدىك، سەلبەستىك سىندى ورتاق مەكەندى قۇرىپ، بولاشاق تاعدىرىن ءوز قولىندا ۇستاپ، ءوڭىردىڭ باياندى تىنىشتىعىن جەبەۋىن قولدايدى.

مۇحاممەد مىنالاردى ءبىلدىردى: ساۋد ارابياسى - جۇڭگو قارىم - قاتىناسى ستراتەگيالىق سيپات الادى، جۇڭگومەن قارىم - قاتىناستى دامىتۋ ساۋد ارابياسى جونىنەن توتەنشە ماڭىزدى. قازىر ورتا شىعىس سوعىسى شىعاناق ەلدەرىنىڭ حاۋىپسىزدىگىنە زيان جەتكىزىپ، دۇنيە ءجۇزىنىڭ ەنەرگيامەن قامداۋى مەن ەكونوميكالىق اينالىمىنا اۋىر ىقپال جاساپ وتىر. ساۋد ارابياسى قايشىلىقتار مەن الاۋىزدىقتاردى پىكىرلەسۋ ارقىلى شەشۋگە كۇش سالىپ، جاعدايدىڭ ۋشىعۋىنان ساقتانۋدى ءۇمىت ەتەدى. جۇڭگو _ دۇنيە جۇزىندەگى جاۋاپكەرشىلىك ارقالايتىن ءىرى ەل، ەجەلدەن ءادىل مايداندا تۇرىپ، ورتا شىعىس ەلدەرىنىڭ تاتۋ كورشىلىك دوستىعىن، پىكىرلەسۋىن، سەلبەستىگىن قولداپ كەلەدى. ساۋد ارابياسى جۇڭگو جاقپەن پىكىرلەسۋدى، سايكەسۋدى كۇشەيتىپ، سوعىس توقتاتۋ جاعدايىن قورعاپ، سوعىس ءورتىنىڭ قايتا تۇتانۋىنان ساقتانىپ، حورمۋز بۇعازىنىڭ قاتىناۋ حاۋىپسىزدىگى مەن ەركىندىگىنە كەپىلدىك ەتىپ، ءوڭىردىڭ باياندى تىنىشتىعىن جۇزەگە اسىرۋدىڭ ءادىسىن بىرگە قاراستىرۋدى قالايدى.