تۇرعىن ءۇي الەۋمەتتىك قورىنان پايدالانۋ كولەمىن كەڭەيتۋ جوسپارلاندى، مىناداي 9 ءتۇرلى جاعدايدا اقشا الۋعا بولادى 

6 - ايدىڭ 5 – كۇنى، تۇرعىن ءۇي جانە قالا – اۋىل قۇرىلىسى مينيسترلىگى «تۇرعىن ءۇي الەۋمەتتىك قورىن باسقارۋ ەرەجەسى (وزگەرىس ەنگىزىلىپ پىكىر الىناتىن نۇسقاسى)» جونىندە اشىق پىكىر الۋ جونىندەگى ۇقتىرۋدى جاريالادى.

بۇل جولعى پىكىر الىناتىن نۇسقادا پايدالانۋ كولەمىن كەڭەيتۋ، قاراجات تاپسىرۋدىڭ قامتيتىن كولەمىن كەڭەيتۋ، قاراجاتتى باسقارۋ مەحانيزمىن ساپالىلاندىرۋ، حالىققا قولايلى قىزمەت وتەۋ ونىمدىلىگىن جوعارىلاتۋ قاتارلى جاقتاردى توڭىرەكتەي وتىرىپ وزگەرىس ەنگىزىلگەن، مۇنداعى ماقسات — تۇرعىن ءۇي الەۋمەتتىك قورىن باسقارۋدى كۇشەيتۋ، تۇرعىن ءۇي الەۋمەتتىك قورى يەلەرىنىڭ زاڭدى ۇقىق – مۇددەسىن قورعاۋ، قاراجات تاپسىرۋشىلاردىڭ تۇرلىشە كەزەڭدەگى تۇرعىن ۇيگە قاتىستى ءار ءتۇرلى تۇتىنۋ قاجەتىن اناعۇرلىم ويداعىداي قاناعاتتاندىرۋ.

پىكىر الىناتىن جوبادا جۇمىسشى - قىزمەتكەرلەردە تومەندەگى جاعدايلاردىڭ ءبىرى بولسا، جۇمىسشى - قىزمەتكەرلەردىڭ تۇرعىن ءۇي الەۋمەتتىك قورى ەسەپشوتىندا ساقتالعان قالدىق سومانى شىعارىپ الۋىنا بولادى دەپ بەلگىلەنگەن:

ءبىرىنشى، مايعا العان ءۇيدىڭ اقىسىن تولەگەندە؛

ەكىنشى، وزىنە تۇرعىن ءۇي ساتىپ العاندا، تۇرعىن ءۇي سالعاندا، قايتا سالعاندا، تۇتاس جوندەتكەندە؛

ءۇشىنشى، ءۇي ساتىپ الۋعا العان قارىزدىڭ نەگىزگى سوماسى مەن ءوسىمىن قايتارعاندا؛

ءتورتىنشى، ءوزىنىڭ تۇرعىن ءۇيىن اشەكەيلەۋگە جۇمسالاتىن قاراجات بەلگىلى شەكتەن اسپاعان جاعدايدا؛

بەسىنشى، ءوزىنىڭ تۇرعىن ءۇيىنىڭ مۇلىك باسقارۋ اقىسىن تولەگەن جاعدايدا؛

التىنشى، دەمالىسقا شىققان، زەينەتكە شىققان جاعدايدا؛

جەتىنشى، ەڭبەك قابىلەتىنەن تۇگەلدەي ايرىلعان جانە جۇمىس ورنىمەن ەڭبەك (ادام ىستەتۋ) قاتىناسىن توقتاتقان جاعدايدا؛

سەگىزىنشى، شەكارا سىرتىندا وتىرىقتانعاندا؛

توعىزىنشى، مەملەكەتتىك كەڭەستىڭ بەكىتۋىمەن وتكەن تۇرعىن ۇيگە قاتىستى باسقا دا تۇتىنۋ جاعدايلارى.

مۇنان سىرت، پىكىر الىناتىن نۇسقادا جەكە ونەركاسىپشىلەر مەن ساۋداگەرلەر، تولىق كۇندىككە جاتپايتىن جۇمىسپەن شۇعىلداناتىندار جانە باسقا دا يكەمدى جۇمىستانۋشىلار تۇرعىن ءۇي الەۋمەتتىك قورى تۇزىمىنە ەرىكتى تۇردە قاتىناسۋىنا بولادى، ناقتىلى ءتاسىلىن رايونعا بولىنگەن قالاداعى حالىق ۇكىمەتى بەلگىلەيدى دەپ ايقىن تۇراقتاندىرىلعان.

كەلۋ قاينارى: حالىق تورابى